İran prezidenti Rəisinin "ərazisi bütöv Azərbaycan" bəyanatı erməniləri qızdırıb...

Yeganə Hacıyeva: “Azərbaycan müharibədən sonra nəzarətsiz qalan İranla aramızdakı sərhədi bərpa edib ki, bunun da həmin ölkənin təhlükəsizliyi üçün ciddi faydası var”

img

İranın yeni prezidenti Seyid İbrahim Rəisinin Azərbaycan prezidenti İlham Əliyevi təbrik etməsi Ermənistanda narahatlığa səbəb olub. Erməni siyasətçilər İran rəhbərlərinin müharibədən sonra ərazi bütövlüyümüzün bərpasından aşkar şəkildə məmnun qalmalarını ifadə etməklərindən gileylənirlər.

Məsələn, "Çiçəklənən Ermənistan" partiyasının nümayəndəsi Arman Abovyan Rəisinin Azərbaycan prezidentinə ünvanladığı xoş sözlərdən danışıb. Yerli mediaya açıqlama verən Abovyan Ermənistana yaxınlığı ilə seçilən İranın Qarabağ məsələsində Azərbaycanın yanında olmasından gileylənib.

İran prezidentinin "Azərbaycanın ərazilərini uğurla azad etməsi" cümləsini "hamımızın üzünə vurulan daha bir şillə" kimi dəyərləndirən erməni siyasətçi xalqı iranlıları günahlandırmamağa çağırıb. O qeyd edib ki, İran sadəcə erməni səlahiyyətlilərin xarici cəbhədəki absurd davranışlarının nəticəsindən çıxış edərək belə addım atıb:

"Rəisi prezident İlham Əliyevi “Azərbaycan ərazilərinin uğurla azad edilməsi” münasibətilə təbrik etdi. Xarici İşlər Nazirliyinin yanından keçəcəksinizsə, onlara zəng edin və bu barədə deyəcək bir sözlərinin olub-olmadığını soruşun”.

Qeyd edək ki, İranın yeni prezidenti Seyid İbrahim Rəisi Azərbaycan prezidenti İlham Əliyevə məktub yazıb. O, İlham Əliyevdən təbrik məktubu almaqdan məmnun olduğunu qeyd edərək vurğulayıb ki, iki ölkə arasında əlaqələr xalqlarımızın ortaq mədəniyyət və tarixinə, qardaşlıq bağlarına söykənir. Rəisi, həmçinin, İlham Əliyevi Azərbaycanın öz tarixi torpaqlarını uğurla azad etməsi münasibətilə təbrik edib.

İranın yeni dövlət başçısı bildirib ki, Azərbaycanın işğal olunmuş ərazilər üzərində suverenliyinin qaytarılması və ortaq sərhədlərin bərpa olunması ilə regional sülh və təhlükəsizliyi təmin etmək üçün qarşılıqlı səylər vasitəsilə yeni imkanlardan yararlanmaq və əməkdaşlıq səviyyəsini artırmaq yaxşı olardı. İran prezidenti məktubunun sonunda prezident İlham Əliyevə can sağlığı və uğur, Azərbaycan xalqına isə əminamanlıq arzulayıb.

Ermənilərin İranın obyektiv mövqeyindən bu şəkildə ehtiyat etməsi nə ilə bağlıdır?

Politoloq Yeganə Hacıyeva  “Bakı-Xəbər”ə açıqlamasında bildirdi ki, İran-Azərbaycan  münasibətləri tarixi və milli bağlara bağlıdır: “Bu münasibətlər heç vaxt üçüncü tərəfin istəyi və arzusuna uyğun şəkildə qurulmayıb. İki dost xalqın firavan yaşaması hədəf götürülərək formalaşıb. Biz müəyyən qrupların bu iki ölkə arasındakı münasibətləri korlamağa yönələn təxribatlarının şahidi oluruq. Azərbaycan prezidenti işğaldan azad edilən torpaqları ziyarət edəndə İranla sərhədi dostluq sərhədi adlandırdı. 44 günlük müharibə və ondan bir il əvvəlki dönəmdə İran sərhədindən Ermənistana aktiv silah nəqli həyata keçirildi. Bu hal Azərbaycan cəmiyyətində ciddi narazılıq doğurdu. Belə hallar qonşu ölkəyə qarşı antipatiya meyllərini çoxaldır. İran bunun fərqindədir. Ona görə də İranın yeni seçilən prezidenti bu məqamları nəzərə alır. Biz bunu son təbrik məktubunun məzmunundan da sezirik. Erməni siyasətçilərinin bundan narahat olmasının bir əsası var. Bu, doğrudan da, Azərbaycan-İran münasibətlərini korlamağa çalışanların üzünə vurulan yağlı şillədir. Burdan bir də görünür ki, Azərbaycanın yaratdığı yeni reallıqlardan İran məmnundur və prosesdə yer almağa çalışır. İran anlayır ki, yeni kommunikasiyaların bərpası onun üçün də ciddi iqtisadi dividendlər gətirmiş olacaq. Bizim Prezident də yaxın zamanlardakı çıxışlarında İranla bağlı çoxsaylı pozitiv mesajlar verib. Azərbaycan müharibədən sonra nəzarətsiz qalan İranla aramızdakı sərhədi bərpa edib ki, bunun da həmin ölkənin təhlükəsizliyi üçün ciddi faydası var”.

Məhəmmədəli QƏRİBLİ

Son xəbərlər