İslama dönən ermənilərin sayı artır - "müsəlman ermənilərə" qarşı "türk casusları" deyilən təqib də qızışır…

Tural İrfan: “Şəxsi marağı təmin olunandan sonra, hətta öz dinində qalan erməni də kimi istəsən satacaq”

img

Ermənistanın radikal millətçi dairələrində son illər ermənilər tərəfindən İslamın qəbul edilməsi hallarının artmasından ciddi narahatlıq ifadə edilir. 

Tanınmış erməni köşə yazarı Artyom Yerkanyan "Sputnik.Armeniya" nəşrində  "Könüllü mürtədlik və ya ermənilərin İslamı qəbul etməsi niyə təhlükəlidir" başlığı altında dərc olunmuş məqaləsində bunu milli təhlükəsizlik məsələsi kimi xarakterizə etməyə çalışır:

“Ermənistan bütün dinlərə hörmət edən dünyəvi bir ölkədir. Etnik ermənilər də daxil olmaqla, Ermənistan vətəndaşları, destruktiv məzhəblər istisna, hər hansı bir dinə etiqad etmək hüququna malikdirlər. İslamdan şikayət yoxdur və ola da bilməz. Ancaq məlum şərtlər üzündən etnik ermənilərin dinini dəyişməsi milli təhlükəsizlik məsələsi kimi qəbul edilə bilər”.

Yerkanyan soydaşları tərəfindən İslamın qəbul edilməsini sanki detektiv janrında izah edir. Onun sözlərinə görə, bəzi ölkələrdə müsəlman dini ermənilərə zorla təlqin olunur və onlar ölüm təhlükəsi altında inanclarını dəyişdirmək məcburiyyətində qalırlar. Müəllif hesab edir ki, ermənilərin dini inancları, Azərbaycan da daxil olmaqla, neofitləri (mürtədlər-dinini dəyişmiş insanlar) öz agentlərinə çevirən və hətta onları "radikal islamçı qruplar"a sızdıran xarici ölkələrin xüsusi xidmət orqanları tərəfindən izlənilir.

Azərbaycan kəşfiyyatının erməni neofitlərini cəlb etməyə çalışdığı konkret hallar var. Bakıdakı Aza.az onlayn nəşri yazır: "Moskva, Soçi, Krasnodar, Mahaçqala və Maykopda İslamı qəbul etmiş yüzlərlə erməni Ermənistanın Dağlıq Qarabağla bağlı haqsız olduğunu etiraf edir".  Beləliklə məlum olur ki, imamlar ermənilərin mürtədliyini təşviq edərək, onları xarici kəşfiyyat xidmətləri üçün təsir vasitəsinə çevirməyə kömək edirlər. Aydın məsələdir ki, Ermənistan xüsusi xidmət orqanları buna biganə qala bilməz”.

Erməni millətçi dairələrin bu narahatlığının kökündə hansı amillər durur?

İlahiyyatçı Tural İrfan “Bakı-Xəbər”ə açıqlamasında bildirdi ki, erməni millətçiliyi ilə erməni xislətinin fərqli cəhətlərinə nəzər salmalıyıq: “Erməni xislətində olanlar daşnaklardı. Onlar  yalnız türklərə qarşı deyil, başqa millətlərə qarşı da  aqresiv mövqe sərgiləyirlər. Bunların çoxu qarışıq köklü ermənilərdi. Bunlar daima barışmaz mövqedədilər. Yalnız milliyyəti erməni olanlar isə fərqli baxışa sahibdirlər. Onlar üçün Qarabağ  və başqa mövzular maraqlı deyil. İslamı qəbul edənlər ikinci qrupa aid olanlardı. İslam dininin qapısı onlar üçün də açıqdır. Çünki bizim dinimiz milliyyət anlayışına önəm vermir. İslam dəyərlərini qəbul edən istənilən erməni bu dinin daşıyıcısı ola bilər. Onlar digər müsəlman qardaşlarının hüquqlarını müdafiə etməyə borcludurlar. Artıq bu axının çoxlaması erməni xislətinin dünyada ifşa edilməsilə bağlıdır. İslamı qəbul edən erməniləri təqdir etməliyik. Onları erməni xislətində olanların basqılarından qorumalıyıq. Ancaq onları nəzarətsiz də buraxmaq olmaz. Çünki ola bilər ki, məhz İslama, türklərə zərbə vurmaq üçün bu yolu seçiblər. Ermənilər tarix boyu bir çox millətlərə qarşı vəhşiliklər həyata keçiriblər. Onlara erməni xislətlilərin indidən casus damğası vurması prosesi ləkələməyə hesablanıb. Erməninin başqa millətə casusluq etməsi çətin məsələ deyil. Bunun üçün mütləq deyil ki, o, dinini dəyişsin. Şəxsi marağı təmin olunandan sonra, hətta öz dinində qalan erməni də kimi istəsən satacaq”.

Məhəmmədəli QƏRİBLİ

Son xəbərlər