Paşinyanın Zəngəzur dəhlizi barədə ağ yalanına Rusiyadan klassik rədd cavabı...

Aydın Mirzəzadə: “Burada Azərbaycan və Ermənistandan başqa Rusiyanın da imzası var”

img

Paşinyan ayın 15-də hökumətin toplantısında 10 noyabr razılaşmasında “Zəngəzur dəhlizi” ilə bağlı heç bir söhbətin getmədiyini deyib.

O bildirib ki, Ermənistan, Azərbaycan və Rusiyanın baş nazirləri səviyyəsində olan üçtərəfli komissiya regional kommunikasiyaların açılmasına dair konstruktiv və effektiv iş aparsa da, “Zəngəzur dəhlizi”nin açılmasını müzakirə etmir: “Zəngəzur dəhlizi” adlanan yer haqqında Azərbaycanın anlaşılmaz açıqlamalarının işçi qrupun fəaliyyəti ilə heç bir əlaqəsi yoxdur. Azərbaycan işçi qrupun işini pozmaq və regional kommunikasiyaların açılmasına mane olmaq üçün belə açıqlamalar verir”.

Ancaq onun bu yalanına Rusiya reaksiya verdi. Dövlət Dumasının MDB, Avrasiya inteqrasiyası və xaricdəki soydaşlarla əlaqələr Komitəsinin sədri Leonid Kalaşnikov bəyan etdi ki, “Zəngəzur dəhlizi” haqda razılıq üçtərəfli Bəyanatda əksini tapıb və bu layihənin qarşısını almaq Bəyannaməni pozmaq cəhdindən başqa bir şey deyil: “Zəngəzur dəhlizi”nin açılması ilk növbədə Ermənistana lazımdır. Ermənilər özləri türklərə deməlidirlər: "Gəlin, sərhədləri açaq və ticarətə başlayaq!" Qoy, Azərbaycan da sərhədləri açsın və dəmiryolu Ermənistanla Rusiyanı birləşdirsin”.

Bu bir daha onu göstərir ki, Paşinyan publikaya hesablanmış ağ yalan danışır.

  • “Onun açıqlaması məsuliyyətdən qaçmaq, manevr etmək və sazişdən kənar hansısa dividendlər əldə etmək cəhdidir”

Məsələyə münasibət bildirən millət vəkili Aydın Mirzəzadənin sözlərinə görə, Paşinyan məsuliyyətdən qaçmaq üçün bu cür yalançı açıqlamalarla çıxış edir: “Paşinyanın həm 10 noyabr, həm də 11 yanvar razılaşmalarını təhrif cəhdləri birinci dəfə deyil. Gah altına imza atdıqları sənəddən imtina edirlər, gah da onu təhrif edirlər. Beləcə, öz imzalarına hörmətsiz yanaşırlar. Bununla bir daha Azərbaycanın necə bir narahat ölkə ilə qonşu olduğunu bütün dünya görür. 10 noyabr razılaşmasında Naxçıvanla nəqliyyat əlaqəsinin bərpa olunması nəzərdə tutulub. Həmin ərazinin də tarixi adı Zəngəzurdur. O baxımdan Azərbaycan çox doğru olaraq həmin dəhlizi Zəngəzur adlandırır. Cənab Prezident bir neçə dəfə çıxışlarında Zəngəzurun Şərq tərəfinin Azərbaycanda, Qərb tərəfinin Ermənistanda olduğunu bildirib. Paşinyanın bu açıqlaması məsuliyyətdən qaçmaq, manevr etmək və bu sazişdən kənar hansısa dividendlər əldə etmək cəhdidir. Paşinyana səs verən seçicilər bu gün ondan konkret fəaliyyət gözləyir. Ortada isə hələ bir şey yoxdur. Seçkidən artıq bir ay vaxt keçib, amma hökumət formalaşmayıb, götürdüyü öhtəliklərin heç birini yerinə yetirməyib. Ona görə də Paşinyan ictimaiyyəti bu cür yalan bəyanatlarla çaşdırmağa, razılaşmanın mahiyyətini təhrif etməyə çalışır. Ancaq Paşinyanın nə deməsindən asılı olmayaraq, “Zəngəzur dəhlizi” açılacaq. Çünki burada Azərbaycan və Ermənistandan başqa Rusiyanın da imzası var. Üçtərəfli komissiya bununla bağlı işləyir. Həmçinin bu dəhlizin açılması Ermənistan üçün faydalıdır. Çünki bu dəhlizdən gediş-gəlişə görə Ermənistana ödənişlər olacaq. Bu isə çətin vəziyyətdə olan Ermənistan üçün maliyyə yardımı deməkdir. Başqa bir tərəfdən, dəhliz açılarsa, o zaman gələcəkdə Ermənistan Azərbaycanın təşəbbüskarı olduğu regional layihələrin iştirakçısı ola bilər. Ümumən götürdükdə, Azərbaycan üzərinə düşən vəzifəni yerinə yetirir. Azərbaycan, öz ərazisinin sahibi kimi, ərazi bütövlüyünü qorumaq üçün bütün addımları atır. Ona görə də Ermənistanın etdikləri əbəsdir. Paşinyanın bu cür açıqlamaları ilk növbədə Ermənistanın özünə zərbədir”.

Millət vəkili bir daha qeyd etdi ki, dəhliz mütləq açılacaq.

Vidadi ORDAHALLI

Son xəbərlər