Ermənistanda keçirilən hökumət müşavirəsində baş nazir əvəzi Nikol Paşinyan növbəti dəfə sərsəmləyib. Belə ki, Paşinyan Azərbaycan qoşunlarının may ayından bəri Ermənistan ərazisinə daxil olduqları və orda qaldıqları barədə iddiaları təkrar edib.
Paşinyan bəyan edib ki, Azərbaycan həmsərhəd bölgələrdən qoşunlarını geri çəkməli, burada Rusiya sülməramlıları və beynəlxalq müşahidəçilər yerləşdirilməli, daha sonra isə delimitasiya işinə başlanmalıdır. Nikol iddia edib ki, Azərbaycan Ermənsitanın delimitasiya və demarkasiya prosesinə mane olduğunu göstərməyə çalışsa da, əslində hər şey əksinədir: “Sərhədlərin delimitasiyası və demarkasiyasına qarşı olan Azərbaycandır, çünki saxta xəritələr göstərir, silahlı qüvvələrinin Ermənistanın suveren ərazisində, xüsusən də Sotk-Xoznavar hissəsində olmasına haqq qazandırmağa çalışır”.
Həmçinin Paşinyan Azərbaycanın “hansısa Zəngəzur dəhlizi” barədə bəyanatlarından çaşqınlıq keçirdiyini deyib. Onun sözlərinə görə, Azərbaycanın bu kimi bəyanatları guya Moskvada yanvarın 11-də üç liderin imzaladıı bəyanata ziddir.
Görünən odur ki, Paşinyan növbəti pozuculuq missiyası ilə məşğuldur. Demarkasiya prosesini sürətləndirmək əvəzinə, əksinə bunu əngəlləməklə məşğuldur.
“Ermənistan demarkasiya prosesinə başlamağa və kommunikasiya xətlərini açmağa məhkumdur”
Məsələyə münasibət bildirən “Səs” Media Qrupunun rəhbəri, politoloq Bəhruz Quliyevin sözlərinıə görə, Paşinyanın bu cür pozucu açıqlamaları daxili auditoriyaya hesablanıb: “O, seçkilərdə qalib gəlsə də bilir ki, qələbəsi yekdil deyil. Ona görə ki, 20 iyun seçkilərində seçici hüququ olanların 50 faizi iştirak etmədi. Bu bir daha onu göstərir ki, erməni cəmiyyətinin böyük bir hissəsi Nikolun populist vədlərindən və 44 günlük müharibənin nəticələrindən məyusdur. Sadəcə, Robert Köçəryan kimi quldur növbəti dəfə hakimiyyəti qamarlamasın deyə Paşinyana səs verdilər. Ümumiyyətlə, Paşinyanın müxtəlif dövrlərdə səsləndirdiyi fikirlər böyük qalmaqal yaradıb və nəticədə Ermənistanın əleyhinə yönəlib. Delimitasiya və demarkasiya ilə bağlı səsləndirdiyi fikirlərin də Ermənistanın əleyhinə yönələcəyini istisna etmirəm. Hesab edirəm ki, Paşinyanın bu fikirləri daxili publikaya yönəlib. Üstəlik, bu məsələdə onun müəyyən xarici dairələrdən sifariş alması da güman edilir. Çünki seçkidən sonra Paşinyanın siyasi fəaliyyətində anormal gedişlərin daha çox özünü göstərməsi müəyyən şübhələrə əsas yaradır. Ancaq bu cür siyasət yeritməklə uzağa getmək mümkün olmayacaq. Ona görə ki, Ermənistan demarkasiya prosesinə başlamağa və kommunikasiya xətlərini açmağa məhkumdur. Çünki onların başqa çıxış yolu yoxdur. Nə fikrləşsələr də, hansısa himayədarları olsa da Azərbaycan qalib tərəfdir. Bu reallığı heç kəs dəyişə bilməyəcək. Vaxtın uzadılması yalnız Ermənistanın zərərinə işləyəcək”.
Politoloq onu da qeyd etdi ki, regionda proseslər Azərbaycanın maraqları daxilində inkişaf edəcək.
Vidadi ORDAHALLI
