Rusiyanın siyasi xadimi, Dövlət Dumasının deputatı, Qafqaz məsələləri üzrə aktiv təbliğat aparan, xaricdən maliyyələşən Konstantin Zatulin çıxışında bəyan edib ki, Azərbaycan Demokratik Respublikasının yaradıcısı Məhəmməd Əmin Rəsulzadə "faşıst" olub və SSRİ-yə qarşı vuruşub, eyni vaxtda o, Qaregin Njdenin antisovet hərəkatını isə "türk- islam təhlükəsi" ilə əsaslandırıb.
Üzümüzə baxa-baxa yalan danışan "siyasi xadim" əslində bütün baş verənləri təhrif edir. M.Rəsulzadə 1942-ci ildə Berlində baş tutan danışıqlarda Azərbaycanın lehinə heç bir fayda və əlaqə görmədiyindən oranı tərk etmişdi. Ömrünün sonuna qədər Rəsulzadə öz ideyalarına sadiq qalıb.
Zatulin həyasızcasına iddia edir ki, almanlar azərbaycanlıları SSRİ-yə qarşı mübarizəyə qaldıra bildilər, erməniləri isə yox. Az qala bütün xalqı "nasistlərlərin əlaltısı" adlandırmaqdan çəkinməyən ermənipərəst siyasətçinin 640 min azərbaycanlının müharibədə iştirakını və onların 40 mininin könüllü olduğunu xatırlamamaqda kimin dəyirmanına su tökdüyü məlumdur.
Qaregin Njdeyə "qəhrəman" kimi heykəl qoyulmasını alqışlayan üzdəniraq siyasətçi onun faşist olmadığını və Zəngəzuru və erməni xalqını növbəti "genosid"dən qoruduğunu qeyd edib.
Zatulinin Məhəmməd Əmin Rəsulzadə ilə Njde kimi faşisti “eyniləşdirməsinə” tarixçilərin münasibəti necədir?
Tarix üzrə fəlsəfə doktoru, professor Məhərrəm Zülfüqarlı “Bakı-Xəbər”ə açıqlamasında bildirdi ki, bunu geniş izah etmək lazımdır: “SSRİ 1939-cu ildə imzaladığı Molotov-Ribbentrop müqaviləsilə faşist Almaniyasının ən yaxın müttəfiqi oldu. Bilirsiniz ki, həmin razılaşmadan sonra sərhədlər haqda “Dostluq” müqaviləsi imzalandı. Bununla da faşizmlə kommunist rejimi müttəfiq oldu. Bu da 1941-ci ilə kimi oldu. Yəni Almanlar Rusiyaya müharibə elan edən ana kimi. Sadəcə, SSRİ təbliğatı həmin ölkələri əzəli düşmən kimi göstərirdi. Zatulin kimi ermənipərəstin dediklərinin də mahiyyəti aydındır. Çünki Rusiya ermənilərin əli ilə hər zaman imperiya siyasətini həyata keçirib. Bu siyasətin də axırı olmayacaq. İkinci Dünya müharibəsi dönəmində SSRİ əleyhinə diviziyalar yaranmışdı. Məsələ ondan ibarət idi ki, 1918-20-ci illərdəki respublikalar yenidən öz azadlıqlarını istəyirdilər. Bu hərəkata ermənilər və gürcülər də qoşulmuşdu. İstək bu idi ki, almanlar qalib gələrsə, onlar öz müstəqil dövlətlərini bərpa edə bilərlər. Njde isə sırf faşistlərlə əməkdaşlıq etmiş və Sovet dövlətinə qarşı mübarizə aparmış bir erməni cəlladıdır. Bu adamla Rəsulzadəni bir tərəziyə qoymaq olmaz. Rəsulzadənin o zaman ən böyük fəaliyyəti həmin vaxt almanlara əsir düşən azərbaycanlıların kütləvi şəkildə qırğınının qarşısını almaq olub. Bilirsiniz ki, yəhudilərlə müsəlmanlar arasında sünnətlə bağlı oxşarlıq var. Faşist konslagerlərində yəhudiləri kütləvi şəkildə bu amilə görə aşkar edirdilər. Rəsulzadə bu amili alman rəhbərliyinə izah etməklə soydaşlarımızın kütləvi qırğınının qarşısını aldı. 1943-cü ildə alman rəhbərliyi elan etdi ki, onlar heç bir dövlətə müstəqillik verməyəcək. Həmin vaxt Rəsulzadə buna etiraz olaraq bəyanat verib Türkiyəyə gəldi. Rəsulzadə heç vaxt Njde kimilər kimi SSRİ-yə qarşı əyninə hərbi forma geyib mübarizə aparmayıb. İdeoloji mübarizədə də hər zaman öz sözünü çəkinmədən deyib. Zatulin Njdeni Düdənginski ilə müqayisə edə bilər. Əgər biz Düdənginskiyə heykəllər qoysaydıq, müqayisəni oxşar saya bilərdik. Rəsulzadənin bütün mübarizəsi Azərbaycanın müstəqil olmasına yönəlib. Omrünün sonuna qədər də bu amllara sadiq alıb. Azərbaycanı istəməyən, təxribatçılar çox söz danışa bilər, onların məqsədi bəllidir”.
Məhəmmədəli QƏRİBLİ
