Məlum olduğu kimi, Ukraynanın daxili işlər naziri, 2014-cü il Maydan hərəkatı nəticəsində baş vermiş hakimiyyət dəyişikliyindən bəri həmin vəzifəni tutan Arsen Avakov istefa ərizəsi yazıb. Daxili işlər naziri istefa ərizəsini Prezident Vladimir Zelenskiyə təqdim edib. Ukrayna Ali Radası ölkənin daxili işlər naziri Arsen Avakovun istefasını dəstəkləyib. 291 millət vəkili müvafiq qərarı plenar iclasda səs çoxluğu ilə qəbul edib.
Ukrayna daxili işlər nazirinin müavini Anton Geraşenko bildirir ki, Arsen Avakov prezident Vladimir Zelenskinin istəyi ilə daxili işlər naziri postunu tərk etdi: “Prezidentin qərarı Avakovun istefasını təklif etmək idi və o, bu qərarı qəbul etdi”. Onun sözlərinə görə, bu addım olduqca sakit, tarazlı idi: “Qərar çoxdan hazırlanmışdı və məhdud çevrədə bu barədə məlumatlı idilər”. Xatırladaq ki, Arsen Avakov milliyyətcə ermənidir, Bakıda anadan olub və daxili işlər naziri olandan sonra Ukrayna hakimiyyətində ən güclü fiqurlardan birinə çevrilib. Eyni zamanda, yüz milyonlarla dollarlıq sərvət toplayıb. O, həm də böyük silahlı dəstəyə malikdir. Avakovun zərərsizləşdirilməsinə Zelenski çoxdan can atırdı və nəhayət, istəyinə nail oldu.
Ukraynanın yeni daxili işlər naziri isə Ali Radanın deputatı Denis Monastrski olacaq. Onu da qeyd edək ki, Ukrayna millətçiləri Avakovun istefasını bayram edir. Daxili İşlər Naziriyinin qarşısına toplaşan yüzlərlə insan yollarda rəqs edib. Aksiya iştirakçıları nazirliyin binasına yaxınlaşmağa çalışsalar da, polis onlara mane olub. Aksiyada iştirak edən “Sağ Sektor” millətçi hərəkatının Odessa bölməsinin keçmiş lideri Sergey Sterenko Avakovun istefasını qələbə adlandırıb.
Baş verənləri şərh edən “armenianreport” portalı yazır: “Ukraynada hakim komandanın Avakova mənfi münasibəti var. Onun vəzifədən uzaqlaşmasını bayram edənlərdən biri bildirir: “Nəhayət, şeytan nazir vəzifəsindən uzaqlaşdırıldı. Növbəti addım ona qarşı bir sıra cinayət işlərinin açılması, sonra isə həbsxana olmalıdır”. Bu, Avakovu təhqir etmək üçün yeni kampaniyanın başlanğıcıdır, gələcək cinayət təqiblərinin, ona qarşı repressiyaların elanıdır. Bu, rəsmi Kiyevin Bakı və Ankaranın könlünü xoş etmək üçün atdığı addımdır. Bu arada xatırladaq ki, Ukrayna hökumətinin, xüsusən də “erməni Soyqırımı” məsələsindəki antierməni təşəbbüslərinə sərt reaksiya verən Avakov idi. Avakov 44 günlük müharibədə Azərbaycana Ukraynadan silah göndərilməsinin də qarşısını alıb. Əldə etdiyimiz məlumata görə, Kiyev tərəfindən Bakıya belə kömək göstərilə bilərdi. Bu cür planları öyrənən Avakov Ukrayna prezidentinin belə təşəbbüsünün qarşısını almağa müvəffəq oldu. Bu səbəbdən Avakovun istefası açıq şəkildə Bakıda və Ankarada qələbə kimi qeyd olunur. Zelenski Arsen Avakovun vəzifəsindən azad edilməsilə Ukraunada antierməni kampaniyasına yaşıl işıq yandırdı. O zaman, təbii ki, Ukraynadakı erməni biznesinin təqibləri və Avakovun bütün əlaltılarının "təmizlənməsi" başlayacaq. Ona qarşı cinayət işi başlayanda təəccüblənmək lazım deyil”.
Ukrayna Ali Radasının Antikorrupsiya siyasəti məsələləri üzrə komitə sədrinin 1-ci müavini, xalq deputatı Yaroslav Yurçişin də bildirib ki, Avakov vəzifədə olarkən böyük qanun pozuntularına yol verib. O, bu xüsusda “report” portalına açılamasında qeyd edib: “Ukrayna 2014-cü ildən bəri yeni antikorrupsiya infrastrukturunun qurulması üzrə çox çətin yol keçib. Korrupsiyanın qarşısının alınması üzrə Milli Agentlik və məmurların görünməmiş dərəcədə açıq və hesabatlı elektron bəyannamə sistemi yaradılıb. Keçmiş prezidentlərdən tutmuş yerli özünüidarəetmə orqanlarının rəhbərlərinə qədər yüksək vəzifəli məmurların korrupsiyasını araşdıran xüsusi hüquq-mühafizə orqanı - Ukrayna Milli Antikorrupsiya Bürosu (UMAB) formalaşdırılıb. Prokurorluq daxilində isə İxtisaslaşdırılmış Antikorrupsiya Prokurorluğu yaradılıb və bu struktur Ali Antikorrupsiya Məhkəməsində UMAB-nin məhkəmə işlərinin təqdim olunması ilə məşğul olur”. O qeyd edib ki, məhkəmə də doğru qərarlar qəbul edərək hakimləri, prokurorları və korrupsioner məmurları dəmir barmaqlıqlar arxasına göndərir: “Ancaq bu kifayət deyil. Çünki hər bir nazir nazirliyin postsovet strukturunu miras aldıqdan sonra yeni qaydalar tətbiq edərək və yeni kadrlar cəlb etməklə onu yenidən formalaşdırmalıdır. Xüsusən bu, hüquq-mühafizə orqanları kimi spesifik sahədirsə... Təəssüf ki, sabiq daxili işlər naziri Arsen Avakov bu istiqamətdə uğurlu olmadı. Düzdür, o əvvəlcə ictimai təzyiq nəticəsində sovetlərdən qalma Dövlət Avtomobil Müfəttişliyində islahatlar apararaq, onun yerində Patrul Polisi yaratdı. Eyni zamanda, Milli Qvardiyanı dirçəltməklə Ukraynanın hərbi gücünü artırdı. Ancaq məhz onun dövründə 2014-cü ilə qədərki zaman kəsiyində korrupsiya hidrasında iştirak edən Yanukoviç dövrünün məmurları yenidən attestasiyadan keçmə prosedurundan yayınaraq polis sıralarında vəzifələrə qayıtdı. O, polis tərəfindən gücdən və səlahiyyətdən sui-istifadə ilə əlaqədar istintaqın qarşısını aldı. Buna görə də Avakov korrupsiyaya qarşı mübarizədə daha çox retroqrad, keçmişə qayıdan oldu. Bu isə sözügedən mənfi fenomenə qarşı effektiv mübarizəyə mane olurdu”.
Samirə SƏFƏROVA
