Ötən gün Ermənistan silahlı qüvvələrinin bölmələri davamlı olaraq Ermənistan-Azərbaycan dövlət sərhədinin Naxçıvan Muxtar Respublikasının Sədərək rayonu istiqamətində yerləşən Azərbaycan Ordusunun mövqelərini və ətraf ərazilərini müxtəlif çaplı silahlardan atəşə tutduqdan sonra mövqelərin qarşısında və ətraf ərazilərdə yanğınlar baş verib.
Bu barədə Naxçıvan Muxtar Respublikası Fövqəladə Hallar Nazirliyindən məlumat verilib. Yanğın ocaqlarının söndürülməsinə cəlb olunan Naxçıvan Muxtar Respublikası Fövqəladə Hallar Nazirliyinin Sədərək rayon yanğınsöndürənlərinə qarşı saat 13.00 radələrində Ermənistan silahlı qüvvələrinin bölmələri müxtəlif çaplı silahlardan atəş açıb. Atəş nəticəsində Fövqəladə Hallar Nazirliyinin əməkdaşı, daxili xidmət mayoru Əhmədli Elvin Südeyif oğlu çiyin nahiyəsindən yaralanıb. Yaralıya ilkin tibbi yardım göstərilib.
Qeyd edək ki, iyulun 14-ü saat 10.00 radələrində Ermənistan silahlı qüvvələrinin bölmələri Ermənistan-Azərbaycan dövlət sərhədinin Naxçıvan Muxtar Respublikasının Sədərək rayonu istiqamətində yerləşən Azərbaycan Ordusunun mövqelərini müxtəlif çaplı silahlardan atəşə tutub. Azərbaycan Müdafiə Nazirliyinin yaydığı məlumatda bildirilib ki, nəticədə Azərbaycan Ordusunun hərbi qulluqçusu Mərdanlı İbadulla Məhsud oğlu yaralanıb. Yaralıya ilkin tibbi yardım göstərilib və o, tibb müəssisəsinə təxliyə olunub. Cavab atəşi ilə düşmən susdurulub. Hazırda bu istiqamətdə vəziyyət sabitdir, əməliyyat şəraiti bölmələrimizin nəzarəti altındadır.
Belə həssas məqamda Ermənistanın məhz Naxçıvanı hədəf kimi seçməsi təsadüfdürmü?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, bununla bağlı bir neçə mülahizə irəli sürmək olar: “Birincisi budur ki, Ermənistan dövlət sərhədi istiqamətində Azərbaycanı provokasiyaya çəkir. Bununla onlar müəyyən üstünlük əldə etməyə çalışır. Biz bilirik ki, Ermənistan müharibədə məğlub olandan sonra sülh sazişini imzalamaqdan yayınmağa çalışır. Çox təəssüf ki, vasitəçilik missiyasını üzərinə götürən Rusiya da bu məsələdə loyallıq nümayiş etdirir. Naxçıvan həm Azərbaycan, həm də bölgə üçün olduqca strateji əhəmiyyət kəsb edən ərazilərdəndi. Orada baş verən proseslərə hamı həssas yanaşır. Ermənistan tərəfi düşünür ki, bununla diqqəti Qarabağdan yayındırmağa nail olacaqlar. İki gün əvvəl onlar yenidən Şuşanı atəşə tutublar. Ancaq Ermənistan həmin məsuliyyətdən yayınmaq istəyir. Əksinə, bizi ittiham edən fikirlər səsləndirirlər. Onlar Qarabağda baş verən prosesləri Naxçıvana transver etməklə, münaqişənin miqqyasını böyütməyə çalışırlar. Həm də KTMT-ni prosesə cəlb etməyi hədəfləyirlər. Onların qənaəti budur ki, Naxçıvandakı təxribatlarla Türkiyəni də qıcıqlandıra bilərlər və bunun nəticəsində KTMT tərəf kimi Ermənistanı dəstəkləməli olacaq. Ermənistan həmin hərbi bloku prosesə cəlb etmək üçün dəfələrlə cəhdlər edib, ancaq uğursuz alınıb. Hesab edirəm ki, Ermənistanın da üzvü olduğu hərbi blokun üzvləri məsələyə diqqətlə yanaşacaq. Biz gördük ki, 44 günlük müharibə dönəmində də Ermənistan KTMT-dən hər hansı dəstəyi görə bilmədi. Ermənistan Naxçıvana həmlələrini davam etirəcəyi təqdirdə çox ciddi zərbələr alacaq. Çünki bizim həmin bölgədə çox müasir ordu birləşmələrimiz və silahlarımız var. Bir qənaətim də budur ki, Ermənistan ordusunun daxilində Paşinyana tabe olmayan generalların da bu təxribatlarda əli ola bilər”.
Məhəmmədəli QƏRİBLİ
