“Biz Ermənistanla sülh müqaviləsini imzalamağa hazırıq. Yəni bu işlərin başlanmasına hazırıq. Ancaq Ermənistan tərəfindən buna reaksiya yoxdur, rəsmi reaksiya yoxdur”.
Bunu Prezident İlham Əliyev şəhid ailələri və müharibə əlilləri ilə görüşü zamanı deyib.
Ölkə başçısının sözlərinə görə, Ermənistanın sülhə hazır olmaması ilə bağlı informasiyalar gəlir: “Qeyri-rəsmi kanallarla bizə çatan məlumat budur ki, Ermənistan buna hazır deyil. Hesab edirəm, bu çox böyük bir səhv olacaq. Necə ki, müharibə ərəfəsində və müharibə dövründə Ermənistan tərəfi böyük səhvlər buraxıb, hərbi cinayətlər törədib. Bu, növbəti böyük səhv ola bilər. Çünki bizim bu təklifimiz yeni real vəziyyətə əsaslanır. Biz hesab edirik ki, məsələ həll olunub, Ermənistan və Azərbaycan arasında sülh müqaviləsi olmalıdır. Bir-birinin ərazi bütövlüyünün tanınması olmalıdır, sərhədlərin tanınması olmalıdır, delimitasiya işlərinə start verilməlidir. Onu da bildirməliyəm ki, delimitasiya işləri ilə bağlı indi beynəlxalq təşkilatlar da müsbət reaksiya verirlər. Əgər Ermənistan bunu etmək istəmirsə, özü bilər, ancaq yaxşı fikirləşsinlər, sonra gec ola bilər. Necə ki, vaxtilə əgər öz xoşları ilə bizim torpaqlarımızdan çıxsaydılar, bu qədər rəzil duruma düşməzdilər. Bizim bu təklifimiz qalib ölkənin təklifidir, güclü tərəfin təklifidir, müzəffər xalqın təklifidir”.
Maraqlıdır, Ermənistan niyə Azərbaycanla sülh bağlamaqdan yayınır? Qarşı tərəf nə vaxt buna hazır olacaq?
“Tərəflər nə zaman işğalçı tərəfə güclü təzyiq göstərsələr, o zaman Ermənistan sülhə hazır olacaq”
Sözügedən məsələ ilə bağlı fikirlərini “Bakı-Xəbər”lə bölüşən Yeni Yol Partiyasının sədri Ramil Hüseynov Ermənistanın sülh sazişindən yayınmasını bir sıra amillərlə əlaqələndirdi: “Əvvəl deyirdilər ki, 10 noyabrdan sonra ölkədə vəziyyət qeyri-sabitdir və hansısa sülh sazişi vəziyyəti daha da gərginləşdirə bilər. Daha sonra dedilər ki, Ermənistanda seçki olacağı üçün sülh müqaviləsi imzalamaqdan ötrü münasib vaxt deyil. Bunun legitim əsası olmayacaq. Məlum olduğu kimi, 20 iyunda seçki keçirildi və Paşinyan qalib gəldi. Belə olan halda sual yaranır - niyə Paşinyan hakimiyyəti sülhə hazır deyil? Bunun bir səbəbi ermənilərin mənfur xisləti ilə bağlıdır. Onlar ciddi məğlubiyyətə uğrasalar da, mövcud vəziyyətlə barışmaq istəmirlər. İkincisi, Paşinyan himayədarlarından ilham alaraq sülhdən yayınır. Problem ondadır ki, bir sıra aparıcı dövlətlər Qarabağ məsələsinin ədalətli həllini istəmir. Söhbət ATƏT-in Minsk Qrupu həmsədrlərindən gedir. Onlar Qarabağ məsələsindən öz maraqları naminə təzyiq rıçaqı kimi istifadə etmək istəyirlər. Başqa bir tərəfdən, Ermənistan hesab edir ki, bölgədə rus sülhməramlıları olduğu üçün Azərbaycan növbəti dəfə hərb yoluna əl atmağa cəsarət etməz. Bu zaman Rusiya ilə üz-üzə gəlməli olacaq. Sözügedən amili əllərində əsas tutub, bir növ cığallıq edirlər və 10 noyabr, 11 yanvar razılaşmalarını sabotaj edirlər. Ən nəhayət, ABŞ və Fransa məsələnin yalnız Rusiyanın moderatorluğu ilə həll olunmasını istəmir. Yenidən proseslərdə aktiv rol almaq istəyirlər. Bu səbəbdən Ermənistan sülhdən yayınır”.
Partiya sədri hesab edir ki, tərəflər nə zaman işğalçı tərəfə güclü təzyiq göstərsələr, o zaman Ermənistan sülhə hazır olacaq.
Vidadi ORDAHALLI
