Son günlər tez-tez həm dövlət sərhədi boyunca, həm də Qarabağın ermənilər yaşayan hissəsində Azərbaycanın mövqeləri və yaşayış məntəqələri ermənilər tərəfindən atəşə tutulur. Ağdam rayonunda törədilmiş silahlı təxribatın ardınca ermənilər bu dəfə Azərbaycan ordusunun Şuşa şəhərindəki mövqelərini atəşə tutub.
Bütün bunların fonunda Rusiya Müdafiə Nazirliyinin rəsmi saytında, Qarabağdakı sülhməramlı əməliyyatlara aid bölmədə qəribə məlumat yerləşdirilib. Orada deyilir ki, Şuşanıın şimal-qərbində Azərbaycan ordusu ilə “Ermənistan silahlı qüvvələri” arasında “nizamsız atışma” baş verib, Rusiya sülhməramlıları vəziyyətə müdaxilə edib və atəş dayandırılıb. Hansı “Ermənistan silahlı qüvvələri”?. Ermənilər açıq deyir ki, “Arsaxın” özünümüdafiə ordusu, Rusiya MN isə deyir “Ermənistan silahlı qüvvələri”. Axı Şuşa ətrafında, ümumiyyətlə Qarabağda Ermənistan silahlı qüvvələri olmalı deyil, bu qüvvələr ötən ilin payızında darmadağın edilib və qalıqları 10 noyabr üçtərəfli razılaşması əsasında Azərbaycan ərazisindən çıxarılmalı idi. Qarabağda qanunsuz silahlı birləşmənin elementləri niyə hansısa nizami ordu birləşmələri kimi təqdim olunur, üstəlik, Ermənistana mənsub olduğu göstərilir?
Bir sözlə, Şuşanın şimal-qərbində Ermənistan silahlı qüvvəlıri var? Bu nə məlumatdı Rusiya yayır? Niyə demir ki, qanunsuz silahlılardı?
“Çünki Kreml münaqişənin həllində maraqlı deyil”
Məsələyə münasibət bildirən hərbi ekspert İbrahim Rüstəmlinin sözlərinə görə, Rusiya bu cür rəsmi məlumatlar yaymaqla açıq-aşkar ikili oyun oynayır: “Buna başqa ad vermək çətindir. Zatən, Rusiya sülhməramlılarının bölgədə yerləşdirilməsinin Azərbaycana çox az yaxşı şey vəd etdiyini hamı bilirdi. Sadəcə, mövcud vəziyyət bizi bununla razılaşmağa bir növ vadar etdi. Bundan daha yaxşı alternativ həmin vaxt yox idi. Hər kəsə məlumdur ki, Qarabağda erməni separatizminin genişlənməsində Rusiyanın bu və ya digər dərəcədə rolu olub. Tarixən bu belə olub. Sülhməramlıların bölgəyə yerləşdikləri ilk gündən biz onların qanunsuz erməni hərbi birləşmələrinə necə isti münasibət sərgilədiklərini zaman-zaman müşahidə etmişik. Bütün bunlar da münaqişənin davam etməsinə zəmin yaratmaq məqsədi güdür. Bunu anlamaq üçün alim olmaq lazım deyil. Hər şey ortadadır. Nəzərə almaq lazımdır ki, 10 noyabrda üçtərəfli sənəd imzalanıb. Bu razılaşmanın 4-cü bəndinə əsasən, qanunsuz erməni silahlı birləşmələri Qarabağdan çıxarılmalıdır. İndiyəcən bu baş verməyib. Belə olan halda “Ermənistan silahlı qüvvələri” ifadəsi nə deməkdir? Bütün bunlar onu göstərir ki, Rusiya sülhməramlıları öz missiyasını düzgün yerinə yetirmir. Ermənistan ordusunun indiyə qədər Şuşada nə işi var? Rusiya bilərəkdən ordaki qüvvələri qanunsuz silahlı birləşmə kimi təqdim etmir. Çünki Kreml münaqişənin həllində maraqlı deyil. Maraqlı olsaydı, o zaman ermənilər atəşkəsi pozmağa cəsarət etməzdilər”.
Hərbi ekspert hesab edir ki, Azərbaycan açıq formada buna öz rəsmi etirazını bildirməlidir.
Vidadi ORDAHALLI
