“Ordan-burdan eşidirəm, yenə də başlayıb ki, məsələ öz həllini tapmalıdır, bu münaqişə həll olunmayıb”. Bunu Prezident İlham Əliyev şəhid ailələri və müharibə əlilləri ilə görüşü zamanı deyib.
Dövlət başçısı bir daha bildirib ki, Ermənistan-Azərbaycan Dağlıq Qarabağ münaqişəsi öz həllini tapıb: “Bu münaqişə həll olunub. Bunu da həll edən tərəf bizik, Azərbaycan dövlətidir. Biz bunu birtərəfli qaydada həll etmişik. Əgər kimsə, mən ordan-burdan eşidirəm, yenə də başlayıb ki, məsələ öz həllini tapmalıdır, bu münaqişə həll olunmayıb, çox yanlış və təhlükəli yoldadırlar. Əgər həll olunmayıbsa, onda qoy bizə izahat versinlər, necə həll olunmalıdır. Biz hesab edirik ki, bu, həll olunub, artıq müharibə dövrü arxada qalıb. Amma buna baxmayaraq, biz müharibəyə hər an hazırıq və hazır olmalıyıq. İyunun 26-da Silahlı Qüvvələr Günündə mən öz açıqlamalarımda bunu demişəm. Biz ordumuzla bağlı yeni planları həyata keçiririk. Ancaq biz hesab edirik ki, münaqişə həll olunub, biz ərazi bütövlüyümüzü bərpa etmişik. Biz Qələbə qazanmışıq. Bizim bu gün gündəlikdə duran hər hansı başqa bir məsələmiz yoxdur. Biz öz sərhədlərimizə çıxmışıq, Ermənistan-Azərbaycan sərhədini nəzarətə almışıq. Biz artıq quruculuq işlərinə başlamışıq. Əgər kimsə deyirsə ki, münaqişə həll olunmayıb, gəlsin desin bunun həllini necə görür, nə həll olunmayıb?”.
Göründüyü kimi, prezident arqumentləri ilə münaqişənin həll edilmədiyini iddia edənləri fakt qarşısında qoydu.
“Belə görünür ki, bəzi beynəlxalq dairələr bununla tarix olmuş ATƏT-in Minsk Qrupunu diriltmək istəyir”
Məsələyə münasibət bildirən AMİP sədri Arzuxan Əlizadənin sözlərinə görə, müəyyən xarici dairələr bu cür pozucu yanaşmalarla vəziyyəti gərginləşdirmək istəyir: “Münaqişənin həll olunmadığını deyənlər ortaya ciddi arqument qoymalıdılar. Belə bir arqument qoya bilmirlər. Azərbaycan 44 günlük müharibə zamanı torpaqlarının əhəmiyyətli hissəsini işğaldan azad edib. Dövlət sərhədlərini nəzarətə götürüb. Hansı ki, Vətən müharibəsindən əvvəl Azərbaycanın Ermənistanla olan sərhəddinin böyük hissəsi nəzarətsiz idi. Söhbət Zəngilan, Qubadlı, Laçın və Kəlbəcərin Ermənistanla olan sərhədlərindən gedir. Belə ki, 28 il idi sözügedən sərhədlərə nəzarət olunmurdu. Vətən müharibəsi zamanı ordumuz keçmiş Dağlıq Qarabağın əhəmiyyətli hissəsini işğaldan azad etdi. Azərbaycan beynəlxalq hüquqdan irəli gələrək öz ərazi bütövlüyünü bərpa edib. Belə olan halda nə əsasla münaqişənin həll olunmadığını iddia edirlər? Belədirsə, o zaman izahat versinlər və bunu hüquqi baxımdan əsaslandırsınlar. Hesab edirəm ki, münaqişənin həll olunmadığını deyənlər heç bir əsası olmayan mövqe ortaya qoyur. Belə görünür ki, bəzi beynəlxalq dairələr bununla tarix olmuş ATƏT-in Minsk Qrupunu diriltmək istəyir. Çünki münaqişənin həll olunduğunu etiraf etmək bunların işinə yaramır”.
Partiya sədri hesab edir ki, əvvəlki danışıqlar formatı ilə bağlı əsla xarici oyunçulara fürsət vermək olmaz.
Vidadi ORDAHALLI
