Son günlər ərzində ermənilər tərəfindən Azərbaycan ordusunun yerləşdiyi istiqamətlərə atəş açılması halları yenidən intensivləşib. Məlumata görə, iyulun 15-i gecə saatlarında Azərbaycan ordusunun Şuşa şəhəri ətrafındakı mövqeləri atıcı silahlardan atəşə tutulub. Atəş Rusiya sülhməramlılarının müvəqqəti yerləşdirildiyi Azərbaycan ərazisindəki qanunsuz erməni silahlı dəstələri tərəfindən açılıb. Müdafiə Nazirliyindən bildirilib ki, qarşı tərəfin susdurulması məqsədilə cavab atəşi açılıb.
Bundan əvvəl də Rusiya sülhməramlılarının müvəqqəti yerləşdirildiyi Azərbaycan ərazisində qanunsuz erməni silahlı dəstələri tərəfindən iyulun 13-də saat 21:34-də və saat 21:45-də Şuşa şəhəri ətrafındakı Azərbaycan ordusunun mövqeləri pulemyot və avtomatlardan atəşə tutulub. İyulun 14-ü saat 10.00 radələrində Ermənistan silahlı qüvvələrinin bölmələri Ermənistan-Azərbaycan dövlət sərhədinin Naxçıvan Muxtar Respublikasının Sədərək rayonu istiqamətində yerləşən Azərbaycan Ordusunun mövqelərini müxtəlif çaplı silahlardan atəşə tutub. Müdafiə Nazirliyinin mətbuat xidmətindən bildiriblər ki, nəticədə Azərbaycan Ordusunun hərbi qulluqçusu Mərdanlı İbadulla Məhsud oğlu yaralanıb. Yaralıya ilkin tibbi yardım göstərilib və o, tibb müəssisəsinə təxliyə olunub. Bundan əvvəl Ermənistan Müdafiə Nazirliyi bildirmişdi ki, Naxçıvan istiqamətində, Yerasx rayonunda baş vermiş atışma zamanı bir erməni hərbi qulluqçusu ölüb. İddia edilirdi ki, insident “Azərbaycan tərəfinin mühəndis-istehkam işləri görməsinin qarşısı alınarkən” baş verib. Ermənilər son bir həftə ərzində Ağdam istiqamətində də atəş açıblar. Bu vəziyyət göstərir ki, Rusiya sülhməramlı missiyasını yerinə yetirə bilmir. Vəziyyətdən çıxış yolu kimi hesab olunur ki, ya 10 noyabr razılaşmasının 4-cü bəndi, yəni erməni qoşunlarının Azərbaycan ərazisindən çıxarılması tam icra edilməli, ya da Azərbaycan antiterror əməliyyatına başlamalıdır. Bölgədə təhlükəsizliyə nəzarət edə bilməyən Rusiya, eyni zamanda, Türkiyə hərbçilərinin də sülhyaratma prosesində daha geniş təmsilçiliyini qəbul etməlidir. Xüsusən də Ağdamdakı Monitorinq Mərkəzinin fəaliyyəti və imkanları genişləndirilməlidir. Əks halda Azərbaycanın ərazilərimizdə qalan qanunsuz erməni silahlı dəstələrinə qarşı əməliyyata start verməsi qaçılmaz olacaq. Yuxarıda qeyd olunduğu kimi, artıq 10 noyabr razılaşmasının 4-cü bəndinin, erməni qoşunlarının çıxarılması aktuallaşır.
Türkiyənin ölkəmizdəki keçmiş hərbi attaşesi, briqada generalı Yücel Karauz baş verənlərlə bağlı “axar” portalına açıqlamasında qeyd edir ki, 10 noyabr bəyanatının əsas şərtlərindən biri məhz Azərbaycan ərazisində mövcud olan qanunsuz erməni silahlılarının buradan çıxarılması və sülhməramlılar vasitəsilə mərhələli şəkildə bölgədə normallaşma prosesinin həyata keçirilməsidir: “Ağdam bölgəsinə, Şuşaya rus sülhməramlılarının olduğu ərazidən erməni terrorçularının atəş açması Rusiyanın ikili standartlar siyasətinin təzahürüdür. Rusiya bir tərəfdən diplomatik korpusun Şuşa səfərinə qatılmır, digər tərəfdən erməni terrorçularının Azərbaycan əsgərlərini atəşə tutmasına göz yumur”. Y.Karauzun sözlərinə görə, rus sülhməramlılarının erməni terrorçularının atəşkəsi pozmasından xəbərsiz olması mümkün deyil: “Ordakı separatçılar Rusiya sülhməramlılarından icazəsiz su belə içə bilməzlər. Heç kim bizim ağlımızla oynamamalıdır. Bu, tamamilə danışıqlı döyüşdür. Azərbaycan Silahlı Qüvvələri cənab İlham Əliyevin rəhbərliyi altında öz dövlətini bütün təhlükələrdən qorumağa qadirdir. Ancaq Azərbaycan məsələnin sülh yolu ilə həll edilməsi üçün son dərəcə diqqətli və həssas davranır. Türkiyə və Azərbaycanın səbrinin bir sonu var. Əgər rus sülhməramlıları erməni separatçılarından silahlarını ala bilmirsə, Azərbaycan ordusu bunu yerinə yetirəcək qədər gücə və peşəkarlığa sahibdir”. Karauz xatırladıb ki, Rusiya lideri Putin özü də dəfələrlə işğaldan azad edilən ərazilərin Azərbaycanın ərazisi olduğunu ifadə edib: “Cənab Putin həm böhran dövründə, həm də 44 günlük müharibə ərzində ən az üç dəfə bu ərazilərin beynəlxalq aləm tərəfindən Azərbaycan ərazisi olaraq tanındığını hər kəsə açıq şəkildə bəyan edib. Bəs vəziyyət belə olduğu halda, Azərbaycan ordusunun atəşə tutulması hansı məqsədləri daşıyır? Burada məqsəd prosesi və rus sülhməramlılarının fəaliyyət müddətini uzatmaq, eyni zamanda problemi daha qarmaşıq, çoxtərəfli hala gətirməkdir. Rus sülhməramlılarının erməni təxribatları qarşısında səssiz qalması qəbuledilməzdir. Əslində biz 10 noyabr bəyanatı imzalanarkən uzun və incə bir yola girildiyini qeyd etmişdik. Bu yolda çətinliklər də var”. General problemdən çıxış yolunun Türkiyə-Azərbaycan qardaşlığının gücləndirilməsindən keçdiyini vurğulayıb: “Azərbaycan ordusunu daha da gücləndirməli, Türkiyə ilə əlaqələrini sıxlaşdırmalıdır. Şuşa Bəyannaməsinin imzalanması bu istiqamətdə atılmış ən ciddi addımdır. Belə təxribatları isə Cıdır düzündə yüksələn qardaşlığımıza, diplomatik korpusun Şuşa səfərinə cavab kimi qəbul etmək lazımdır. Türkiyə-Azərbaycan qardaşlığını daha da möhkəmləndirmək üçün əlimizdən gələni etməliyik”. İndilikdə görünən budur ki, Azərbaycanın bölgədə sülh, əməkdaşlıq və dayanıqlı inkişafı təmin etmək istiqamətində addımlar atdığı bir vaxtda Ermənistan destruktiv yanaşma nümayiş etdirir. Bakı bildirir ki, bölgədə vəziyyətin bu şəkildə inkişafının bütün məsuliyyəti Ermənistanın üzərindədir.
Samirə SƏFƏROVA
