Ermənistanda son dövrlərdə Soros Fondunun yenidən fəallaşması müşahidə edilir. Belə görünür ki, Corc Soros Ermənistanın baş naziri səlahiyyətlərini icra edən Nikol Paşinyan vasitəsilə bu ölkədə təsir dairəsini saxlamaqda maraqlıdır.
Xatırladaq ki, hələ 3 il vvəl Nikol Paşinyan Ermənistanda çevriliş yolu ilə hakimiyyətə gələndə bütün dünya, xüsusilə də Rusiya mətbuatı onun Corc Sorosun adamı olduğunu yazırdı. Məlumdur ki, hələ o vaxt Paşinyan mitinqlərdə, hətta ondan əvvəl deputat olduğu zaman həmişə Ermənistanın Rusiya ilə əməkdaşlığının əleyhinə çıxış edirdi. Paşinyan hər zaman Rusiyanın orbitində olan Kollektiv Təhlükəsizlik Müqaviləsi Təşkilatından, Avrasiya İqtisadi Birliyindən çıxmağın tərəfdarı olduğunu bəyan edib. İlk vaxtlarda Paşinyanın bütün komandası praktik olaraq Qərbin, Soros Fondunun, “Amnesty International”, “Transparency”, “Human Rights Watch”, “Freedom House”un maliyyələşdirdiyi qeyri-hökumət təşkilatlarının nümayəndələrindən ibarət oldu. Parlament seçkilərindən sonra da, görünür, bu hal davam edəcək. Xatırladaq ki, hələ o vaxt “Transparency International” təşkilatının seçki proqramlarının keçmiş əlaqələndiricisi Armen Qriqoryan Milli Təhlükəsizlik Şurasının rəhbəri vəzifəsinə təyin edilib. Sorosun adamı olan bu şəxs uzun müddət qeyd edilən vəzifəni icra edib. Parıament seçkilərindən sonra bu günlərdə Nikol Paşinyan Armen Qriqoryanın Təhlükəsizlik Şurasının katibi vəzifəsindən azad edilməsi və xarici işlər nazirinin birinci müavini vəzifəsinə təyin edilməsi haqqında qərar qəbul edib.
Qeyd edək ki, Ermənistan xarici işlər naziri postuna Paşinyan tərəfindən namizəd axtarışı uzun müddət davam edib. Nikol Paşinyan bu məsələ ilə bağlı dalana dirənib və bu vəzifəyə namizəd tapa bilməyib. "Qraparak" nəşri bu xüsusda yazırdı: "Müxtəlif adlar səslənirdi: buraxılan parlamentin xarici əlaqələr üzrə daimi komissiyasının sədri Ruben Rubenyan, parlamentin spikeri Ararat Mirzoyan, baş nazirin müavini səlahiyyətlərini icra edən Mqer Qriqoryan və hətta Ermənistanın sabiq müdafiə naziri David Tonoyanın da adı var idi. Mqer Qriqoryan isə "siyasətdən kənar" baş nazirin müavini statusunda özünü yaxşı hiss edir, Xarici İşlər Nazirliyinə getməyə və siyasi məsuliyyəti bölüşməyə meylli deyil. Ermənistan XİN-dən azad düşünən diplomatların uzaqlaşdırılması prosesi də bu fonda davam etdirilib. Bu qəbildən olan diplomatların "Facebook" hesabı hökumət tərəfindən diqqətlə araşdırılır. Tanrı göstərməsin, "Vətəndaş müqaviləsi" partiyasının əleyhinə yazılan postda şərh və ya layk görülsə, diplomatlar yalnız xaricdə işləmək hüququndan deyil, karyera inkişafı perspektivindən də məhrum olacaqlar. Nikol Paşinyan ona qarşı çıxmış nazirliyin kollektivini bağışlamaq niyyətində deyil. Bu halda XİN əməkdaşlarına səbr etmək və yeni nazirin təyinatını gözləməyi məsləhət görürlər. Lakin hələ də yeni nazir tapılmır”. Xarici işlər nazirinin birinci müavini vəzifəsinə təyin edilən Armen Qriqoryan isə Sorosun adamıdır. Onun bu təyinatında Sorosun rol oynaması istisna olunmur. Rusiyalı politoloq Vladimir Lepexin bu xüsusda bildirir ki, Ermənistan xarici işlər nazirinin birinci müavini vəzifəsinə Armen Qriqoryanın təyin edilməsilə Nikol Paşinyan çoxvektorlu siyasətini nizamlamağa çalışır. Onun sözlərinə görə, bundan sonra Ermənistanda hərbi və iqtisadi blok Rusiya ilə, maliyyə bloku isə Qərblə aktiv çalışacaq: “Niyə Qriqoryan kimi açıq sorosçunu güc blokundan xarici siyasətə keçirirlər? İrəvan Rusiyaya münasibətdə daha praqmatik olmağa, yəni Rusiyadan maksimum nəsə sıxıb çıxartmağa çalışacaq. Paşinyan hökuməti qlobalizm tələsinə doğru gedəcək. Faktiki olaraq, Ermənistanda gələn ilin payızından ikisektorlu iqtisadiyyat yaranacaq. Rusiya erməni iqtisadiyyatının çox zərərlərini qarşılamaq yükünü üzərinə götürəcək, Ermənistanın hakim sinfi isə Qərbin dəstəyilə erməni iqtisadiyyatından götürdüyü “qaymaq” hesabına piylənəcək”.
"Qraparak" nəşri baş verənlər fonunda qeyd edir: “Bir neçə gün əvvəl Nikol Paşinyan xarici işlər naziri, nazir müavinləri məsələsini idarə rəisləri ilə müzakirə etmək üçün Ermənistan Xarici İşlər Nazirliyinə gedib. Məlumata görə, nəticədə qərar verilib ki, ən azı 2 nazir müavini vəzifəsini o qədər də məşhur və nüfuzu olmayan diplomatlar tutacaq. Seçim iki Tiqranın, yəni Tiqran Seyranyan və Tiqran Mkrtçyanın üzərində dayanıb. Tiqran Seyranyan Çexiya və Slovakiyada Ermənistanın səfiri olub, hazırda isə Ermənistanın Ukraynadakı səfiridir. Tiqran Mkrtçyan isə Baltikyanı ölkələrdə Ermənistanın səfiri olub, lakin 15 mart tarixli sərəncamla geri çağrılıb və kadrlar ehtiyatındadır. Onlar hər ikisi Sorosa bağlı şəxs kimi də tanınır”. Bunlar fonunda erməni mətbuatı yazır ki Soros cərəyanları yenidən Ermənistanda qızışır. Qeyd edilir ki, buna görə də hazırda ölkədə bir çox ekspertlər anti-Rusiya meylli əhval-ruhiyyənin artdığını deyir.
Ehtiyatda olan rus polkovnik Viktor Baranets Ermənistanın anti-Rusiya açıqlamalarının onu Rusiyanın dəstəyindən məhrum edə biləcəyini vurğulayıb. Onun sözlərinə görə, Moskva belə bir vəziyyətdə nəticə çıxarmaq məcburiyyətindədir, belə olan halda, hətta Rusiya hərbi bazasını Ermənistandan çıxarmaq da daxil olmaqla, müttəfiq öhdəliklərindən imtina etməlidir: “İndi də Ermənistanda hər gün sorosçuların təşəbbüsü ilə baş tutan yeni proqramlar haqqında danışılır. Bu davranış Nikol Paşinyan və komandasının Ermənistanda qərbyönümlü antimilli qüvvələr tərəfindən hakimiyyətə gətirilməsindən və müharibədən sonra da ölkədə baş verənlərdən dərs almadıqlarından, yarımçıq qalan işlərini davam etdirmələrindən xəbər verir”.
Nahid SALAYEV
