“Hərəkat COVID-19-dan sonrakı dövr üçün də güclü, əlaqəli və məqsədyönlü addımlar atmalıdır”. Bunu Prezident İlham Əliyev Qoşulmama Hərəkatının Xarici işlər nazirlərinin aralıq konfransında çıxışı zamanı deyib.
Ölkə başçısı postpandemiya dövrü ilə bağlı önəmli təkliflərlə çıxış edib: “Pandemiyadan sonra bərpa mərhələsinə dair fikir mübadiləsinin aparılması və Hərəkatın mövqeyinin müəyyən edilməsi baxımından Qoşulmama Hərəkatına üzv dövlətlərin yüksəksəviyyəli iclasının keçirilməsi faydalı ola bilər. Pandemiyadan irəli gələn çətinliklərin mürəkkəbliyini nəzərə alaraq, Qoşulmama Hərəkatı tərəfindən COVID-19-dan sonra qlobal bərpaya dair BMT-nin Yüksək Səviyyəli Panelinin yaradılması təşəbbüsü ilə çıxış edilməsi məqsədəmüvafiq olardı. Həmin panel dünyanın pandemiyadan daha yaxşı şəkildə çıxması üçün qlobal tədbirlərə dair tövsiyələr hazırlaya bilər”.
Postpandemiya dövrü ilə bağlı xüsusi iclasın keçirilməsi iqtisadi nöqteyi-nəzərdən faydalı olacaq.
“Xüsusi iclasın keçirilməsinə, bundan irəli gələn məsələlərin müzakirə edilməsinə, ortaq çıxış yolu tapılmasına ehtiyac var”
Sözügedən məsələ ilə bağlı fikirlərini “Bakı-Xəbər”lə bölüşən ekspert Rəsul Cahangirli hesab edir ki, postpandemiya dövründə ölkələrin əlaqəli şəkildə fəaliyyət göstərməsi olduqca zəruridir: “Çünki məlum olduğu kimi, pandemiya dünya iqtisadiyyatına sarsıdıcı zərər vurub. Dünyada ümumi daxili məhsulun həcmi azalıb. Elə sektorlar var ki, pandemiyanın ora vurduğu zərbə ölçüyəgəlməz dərəcədə böyükdür. Söhbət turizm sektorundan gedir. Halbuki, pandemiyaya qədər bəzi ölkələrin milli gəlirinin formalaşmağında turizm sektoru mühüm çəkiyə malik olub. İndi həmin sahələrdə böhran yaşanır. Düzdür, bu, ötənilki kimi kəskin deyil. Ona görə ki, bu ilin əvvəllərindən bir sıra ölkələrdə məhdudiyyətlər yumşaldılıb. Ancaq o da var ki, pandemiyanın dünya iqtisadiyyatına vurduğu zərəri aradan qaldırmaq üçün illər lazımdır. Bütün bunları tez bir zamanda aradan qaldırmaq çətin olacaq. Ona görə də ölkələr birgə təşəbbüslərlə çıxış etməlidir. Postpandemiya dövrü ilə bağlı əlaqələrini koordinasiya etməlidirlər. Bunun üçün də Qoşulmama Hərəkatı çərçivəsində xüsusi iclasın keçirilməsinə, bundan irəli gələn məsələlərin müzakirə edilməsinə, ortaq çıxış yolu tapılmasına ehtiyac var. Bir məqama xüsusi diqqət edilməlidir ki, iqtisadi baxımdan zəif inkişaf edən ölkələr pandemiyadan daha çox zərər görür. O baxımdan postpandemiya dövründə bərpa prosesini sürətləndirmək üçün səyləri birləşdirmək çox zəruri və vacibdir”.
Ekspert hesab edir ki, bu yöndə əlaqələr genişləndirilməlidir.
Vidadi ORDAHALLI
