Zəngilan rayonundan olan məcburi köçkünlər Almaniyanın “CRONIMET” şirkəti ilə bağlı tədbir görülməsi üçün bu ölkənin Azərbaycandakı səfiri Volfqanq Maniqə müraciət ediblər.
Müraciətdə Zəngilan rayonundan olan məcburi köçkünlər doğma yurd yerlərində Ermənistanın işğalı zamanı törədilən ekoloji terrorla əlaqədar kəskin etirazlarını bildirirlər: “Biz 30 ilə yaxın müddətdə Azərbaycanın müxtəlif şəhər və rayonlarında müvəqqəti məskunlaşmışıq. Bir an da olsa doğma yurd-yuvamıza qayıdacağımıza inamımızı itirməmişik. Ötən ilin sentyabrında Prezident İlham Əliyevin rəhbərliyilə rəşadətli Azərbaycan Ordusu işğal altındakı ərazilərimizi, o cümlədən, məcburi köçkün düşdüyümüz Zəngilan rayonunu işğaldan azad edib.
Qazandığımız Qələbə böyükdən-kiçiyə hər birimizdə böyük ruh yüksəkliyi yaratdı, tezliklə əvvəlki yaşayış yerlərimizə qayıdacağımız günü gözləyirik. Amma Zəngilanın ekoloji terrora məruz qalması bizdə məyusluq yaradır. Zəngilanlılar Oxçuçaydan həm suvarma, həm də ətrafında istirahət etmək, orada balıq tutmaq üçün istifadə ediblər. İndi Ermənistanın çayın mənbəyində yerləşən Qacaran mis-molibden, Qafan mis saflaşdırma kombinatlarının toksik tullantıları, eyni zamanda, həmin şəhərlərin məişət-çirkab suları təmizlənmədən birbaşa Oxçuçaya axıdılır. Ermənistanda mədənçıxarma sahəsi üzrə fəaliyyət göstərən Almaniyanın “CRONIMET” şirkəti ekostandartlara riayət etmir, nəticədə yalnız Zəngilan rayonu üçün deyil, ətraf regionlar üçün də ekoloji terror təhlükəsi yaranır. Yaranmış problem çaydan suvarma məqsədilə istifadəni qeyri-mümkün edir, balıqlar kütləvi şəkildə məhv olur. Biz - 30 ilə yaxın bir müddətdə yurd həsrəti ilə yaşayan zəngilanlılar ata-baba torpaqlarımızda törədilən bu terrorun dayandırılmasını tələb edirik. Ekoloji standartlar ölkəsi olan Almaniyanı digər ölkələr üçün təhlükəli vəziyyətin yaranmasına səbəb olan “CRONIMET” şirkətinə qarşı təcili tədbir görməyə çağırırıq”.
“Beynəlxalq qurumlar adi, xırda problemi böyüdərək Azərbaycana qarşı çıxırdılar, ancaq indi qlobal miqyasda hadisə baş verir…”
Zəngilanlı məcburi köçkünlərin ekoloji terrorla bağı Almaniyanın Azərbaycandakı səfirinə müraciəti ilə bağlı fikir bildirən AVCİYA-nın vitse-prezidenti, professor Məhərrəm Zülfüqarlı nəzərə çatdırdı ki, ermənilərin ekoloji terroru uzun illərdir yaşanır: “Ekoloji problemlərin həlli ilə məşğul olan qeyri-hökumət təşkilatları dəfələrlə bu mövzu ilə bağlı öz etirazlarını bildiriblər. Hətta erməni QHT nümayəndələrinə də etiraz edilib. Məlumdur ki, Almaniyanın “CRONIMET” şirkətinin o ərazidə işləməsi, ərazinin tullantılarla zəhərlənməsi danılmaz faktdır. Bu səbəbdən də həmin şirkət qanun qarşısında cavab verməlidir. Eyni zamanda, adıçəkilən şirkət öz fəaliyyəti haqqında da geniş məlumat açıqlamalıdır. Məlumdur ki, Azərbaycanla yanaşı, İran tərəfi də zəhərlənməyə məruz qalıb. Bu səbəbdən də şirkət törətdiyi ekoloji terrora görə cavab verməlidir”.
Həmsöhbətimiz onu da əlavə etdi ki, beynəlxalq qurumlar adi, xırda problemi böyüdərək Azərbaycana qarşı çıxırdılar. Ancaq indi qlobal miqyasda hadisə baş verir, ancaq həmin təşkilatlar, hər zaman olduğu kimi, susurlar. Bu isə o deməkdir ki, həmin təşkilatlar üçün demokratiya, insan haqları ikili standartlar əsasında müəyyən edilir: “Hesab edirəm ki, bu tip kampaniyalar dayanmamalı, sona qədər davam etməlidir. Azərbaycan vətəndaşları, QHT-lər və rəsmi qurumlar bir araya gəlib, ekoloji terrorla bağlı mübarizə aparmalıdırlar. Nəticə əldə olunana qədər işlər görülməlidir”.
Günel CƏLİLOVA
