Ermənistan Qarabağda terrorçu və muzdlu dəstələr hazırlamaq prosesini dayandırmayıb. Bu, Teleqramdakı erməni kanallarının yaydığı məlumatlar sayəsində ortaya çıxıb. Belə ki, Azərbaycanın Qarabağ bölgəsinin rus sülhməramlılarının müvəqqəti məsuliyyət zonasında olan hissəsində “Böyük Tiqran” (Metsn Tiqran) hərbi birliyinin nümayəndələri peyda olub.
Birliyin bu ərazidə həm Ermənistan, həm də Qarabağdan olan erməni gənclər üçün hərbi hazırlıq kursları keçdiyi müəyyən edilib. Muzdlu hazırlığı ilə məşğul olan kurslara mayın 31-dən start verilib. Sosial şəbəkələrdəki paylaşımlar hazırlığın Ağdam rayonunun yaxınlığında yerləşən digər Azərbaycan rayonlarında aparıldığı ehtimalı yaradıb.
Qeyd edək ki, “Böyük Tiqran” birliyi 1989-cu ildə I Qarabağ savaşında iştirak üçün yaradılıb. Onun yaradılmasında Ermənistanın keçmiş baş naziri Vazgen Sarkisyan iştirak edib. Müharibə dövründə batalyonun komandiri sonradan Ermənistan parlamentində təşkil edilən teraktda öldürülən Armenak Armenakyan olub. Batalyon Ermənistan-Azərbaycan sərhədi ilə bərabər Tərtər, Ağdam, Laçın istiqamətlərində aktiv döyüşlərdə iştirak edib.
Batalyon müharibədən sonrakı dövrdə “Böyük Tiqran” beynəlxalq alayı və “Böyük Tiqran” hərbi təlim mərkəzi olaraq fəaliyyət göstərib. Proses Ermənistan Müdafiə Nazirliyinin (nazir Seyran Ohanyan) nəzarəti altında aparılıb. Ayvazyanın o dönəmdəki açıqlamalarından bəlli olur ki, birlik üzv olmaq istəyənlərə 3 aylıq hazırlıq keçib, sonra sıralarına qəbul edib. Birlik təkcə Qarabağda deyil, Suriyadakı döyüşlər üçün də muzdlular yetişdirib.
Qarabağda bu cür halın baş verməsinin məsuliyyətini kim daşımalıdır?
Təhlükəsizlik qurumunun sabiq əməkdaşı, ekspert Elşən Həsənov “Bakı-Xəbər”ə açıqlamasında bildirdi ki, Ermənistan uzun müddət işğal altında saxladığı ərazilərdən öz çirkin məqsədləri üçün istifadə edib: “Bütün bu illər ərzində Azərbaycan belə hallara biganə qalmayıb. İstər dövlət səviyyəsində, istərsə də ictimaiyyət səviyyəsində biz hər zaman həyəcan təbili çalmışıq. Ermənilərin mədəni irsimizi dağıtmasını, ekoloji fəlakətə səbəb olan addımlar atmasını, qanunsuz narkotrafiklə məşğul olmasını, terrorçuların qanunsuz yerləşdirilməsi və onlara təlimlər keçməsini konkret faktlar əsasında ifşa etmişik. Təəssüflər olsun ki, beynəlxalq birlik bu məsələlərə daima biganə qalıb. Hazırda bizə aid ərazidə terrorçu yetişdirirlərsə, bunun ilk günahı Rusiyadadır. Həmin ölkə sülh yaratmaq missiyasını üzərinə götürüb. Əraziyə qoşun yeridib. Necə ola bilir ki, onların nəzarəti altında olan ərazidə belə hallar yaşanır? Bu faktları biz ictimailəşdirmirik. Məlumatları erməni teleqram kanalları yayıb. Mən sosial şəbəkələrdə faktı təsdiq edən videolara da rast gəlmişəm. Azərbaycan bununla bağlı Birgə Monitorinq Mərkəzinə və Rusiya sülhməramlılarının rəhbəri Rüstəm Muradova müraciət etməlidir. Prosesi sona qədər izləməlidir ki, həmin düşərgələr darmadağın edilsin. Ermənistan üzərinə öhdəlik götürüb ki, bir nəfər də olsun silahlı Qarabağ ərazisində qalmayacaq. Bunların həm silahlıları qalır, həm də ərazidə terrorçu hazırlayırlar. Bu, bəşəri bir problemdir. Çünki bütün dünya terrorçuluqdan əziyyət çəkir. Onların Qarabağda hazırladığı terrorçular qaynar nöqtələrə göndərilirsə, deməli, vəziyyət düşünüldüyündən də ciddidir. Bu faktla bağlı bütün nüfuzlu beynəlxalq təşkilatlara müraciət edilməlidir. Beynəlxaql qurumlar deyilən koordinatlar üzrə monitorinq aparmalıdır. Ermənilər tabeçilik göstərməsə, Azərbaycan öz ərazisində baş qaldıran həmin terror ocaqlarını söndürməlidir”.
Məhəmmədəli QƏRİBLİ
