Məlum olduğu kimi, 10 noyabr 2020-ci il tarixində imzalanmış üçtərəfli bəyanata əsasən, işğaldan azad edilmiş Laçın və Kəlbəcər rayonlarının Ermənistanla həmsərhəd bölgələrində çətin dağ relyefi quruluşuna və iqlim şəraitinə malik olan məntəqələrdə hava şəraitinin yaxşılaşması ilə Azərbaycan sərhəd bölmələri ölkəmizə aid mövqelərdə yerləşdirilir.
Proses mayın 12-dən başlayıb. Ermənistan adi rejimdə və sistematik qaydada icra edilən bu prosesi ölkəsinin ərazisinə müdaxilə kimi qələmə verib. Bundan sonra Paşinyan KTMT-yə müraciət edib. KTMT Ermənistanın müraciətinə cavab verib və KTMT-nin Sünikdə yaranmış vəziyyətə müdaxilə etməyəcəyini bildirib. Bu isə bir daha Ermənistanın irəli sürdüyü arqumentlərin reallıqdan uzaq və əsası olmadığını göstərir.
Sözügedən məsələdə maraqlı məqam odur ki, hətta bəzi qatı ermənipərəstlər də artıq sərhəd məsələsində Ermənistanın ortaya atdığı arqumentlərlə razılaşmırlar. Rusiyanın “Regnum” xəbər agentliyinin redaktoru Modest Kolerov bəyan edib ki, Ermənistan Azərbaycanla olan sərhədlərini delimitasiya və demarkasiya edəndən sonra KTMT-yə müraciət edə bilər: “Bu insidentin səbəbi odur ki, Ermənistan və Azərbaycan sərhədi dəqiqləşdirilməyib. O, kiminsə beynində, hansısa bir kağızda çəkilib, lakin demarkasiya və delimitasiya edilməyib. Ermənistan rəsmi olaraq KTMT-yə özünü təcavüzdən qorumaq xahişi ilə müraciət edirsə, öz sərhədini, sərhədçilərini, sərhəd xəttini, sərhəd keşikçisini, sərhəd məntəqələrini göstərməlidir. Belə bir daimi sərhəd hələlik mövcud deyil. O zaman KTMT-yə müraciət etmək üçün əsas yoxdur”.
Görünən odur ki, Ermənistanın sərhəd məsələsində KTMT-dən alət kimi istifadə etmək cəhdlərini hətta Rusiyadakı məlum ermənipərəst dairələr belə qəbul etmək istəmirlər.
“KTMT ilə bağlı ermənilərin istəklərinin həm hüquqi əsası yoxdur, həm də ölkəmiz 30 il əvvəlki dövlət deyil”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, Azərbaycan güclü olduğu üçün hətta ermənipərəst dairələr belə bizimlə hesablaşırlar: “Bax, məsələnin kökündə dayanan başlıca faktor budur. Tarix boyu Rusiya ermənidən öz imperiya siyasəti üçün istifadə edib. Türkmənçay müqaviləsindən sonra ermənilərin kütləvi şəkildə Qarabağa köçü təşkil edildi. Vətəni olmayan erməni xalqı Qafqaza gəlib rusların köməyi ilə Azərbaycan əraziləri hesabına dövlət yaradıb. SSRİ dağılanda əvvəlki respublikaları Moskvanın nəzarətində saxlamaq məqsədilə müxtəlif münaqişə ocaqları yaradıldı. Ancaq Azərbaycanın son illər, xüsusən də 2016-cı ildən yeritdiyi siyasət öz düzgün nəticəsini verdi. Yəni Azərbaycanın ortaya güc qoyması, nəticə etibarilə, bir sıra dövlətlərin bizimlə hesablaşmasına gətirib çıxardı. Görəndə ki, ATƏT-in Minsk Qrupu bu problemləri həll etmək iqtidarında deyil, o zaman güc yolu ilə ərazilərini azad etdi. Zəif Ermənistan isə indi KTMT-nin yedəyində getməklə nəyisə öz xeyrinə dəyişmək istəyir. Bu isə alınmır. Ona görə ki, həm bunun hüquqi əsası yoxdur, həm də Azərbaycan 30 il əvvəlki dövlət deyil. Bu səbəbdən hətta qatı ermənipərəstlər belə, Ermənistana haqq qazandırmırlar. Rusiya kimi dövlət forpost Ermənistanla deyil, Azərbaycanla münasibətlərin səmərəli olduğunu nəzərə alır. Başqa bir tərəfdən, KTMT-də təmsil olunan dövlətlərin Azərbaycanla çox yaxşı münasibətləri var. O üzdən, Ermənistanın Azərbaycana yönəlik təxribatları alınmır”.
Professor onu da qeyd etdi ki, Ermənistan məğlubiyyətə məhkumdur.
Vidadi ORDAHALLI
