Misir, İngiltərə, Çin və Hollandiya şirkətləri Azərbaycanın işğaldan azad olunmuş ərazilərində və digər bölgələrdə tikinti layihələrinə böyük maraq göstərirlər. Beynəlxalq maliyyə institutları həm Qarabağ və Azərbaycanın işğaldan azad olunmuş ərazilərində, həm də digər bölgələrdə tikinti sektoruna investisiya qoymağa maraqlıdırlar". Bunu “Sputnik Azərbaycan”a müsahibəsində Misirin "Dorra" inşaat şirkətinin direktor müavini Məhəmməd Həsən Dorra bildirib.
O qeyd edib ki, bir çox investisiya institutu ilə əməkdaşlıq edirik və onlarla güclü işgüzar əlaqələrimiz var: “Misirdə və ya ölkə sərhədindən kənarda əməkdaşlıq etdiyimiz İngiltərə, Çin və Hollandiya şirkətləri Azərbaycandakı layihələrə böyük maraq göstərirlər”.
Qeyd etdiyimiz kimi, xarici ölkələr işğaldan azad edilən ərazilərdə tikinti layihələrinə maraq göstərirlər. Onu da bildirək ki, Qarabağa yatırım etmək istəyən Misir, İngiltərə və Çin ilə Azərbaycanın yaxşı münasibətləri var. Qarabağa maraq göstərən ölkələrdən biri də Hollandiyadır. Hollandiyanın belə bir təşəbbüsdə olması maraqlıdır. Bəllidir ki, Hollandiya hər zaman Azərbaycana qarşı qərəzli mövqe nümayiş etdirib. Bu ölkə Azərbaycana qarşı sanksiyaların tətbiq olunmasını belə tələb etmişdi. Hətta qondarma “Dağlıq Qarabağ respublikası”nın tanınmasını də tələb edən ölkə məhz Hollandiya olub. Belə bir şəraitdə Hollandiyanın Qarabağda investisiya yatırmaq istəyinə necə baxmalıyıq?
“...siyasətdə bizə qara yaxıb, iqtisadiyyatda isə gəlirlərimizdən istifadə edəcəklər, Azərbaycan buna razı olmayacaq”
Millət vəkili Aydın Mirzəzadə “Bakı-Xəbər”ə açıqlamasında qeyd etdi ki, Azərbaycanı qəbul etməyən ölkələr müəyyən mərhələdə bizimlə əməkdaşlıq etmək istəyirlər: “Avropa Parlamentinin nümayəndələri vaxtaşırı ölkəmizə qarşı qərəzli mövqe nümayiş etdiriblər. Dağlıq Qarabağ məsələsində Azərbaycanın mövqeyinə kölgə salmaq istəyiblər. Azərbaycan tərəfdən buna siyasi qiymət verilib. Bu kimi ölkələrin işğaldan azad olunan torpaqlara investisiya yatırmaq istəyi açıqlanarkən onların Azərbaycana olan münasibəti də nəzərə alınacaq. Bu gün işğaldan azad olunan ərazilərdə 100 milyard dollarlıq işlər var. Qarabağda tək Azərbaycan deyil, xarici ölkələr də tikinti işləri aparacaq. Onu da qeyd edim ki, Qarabağa investisiya yatırmaq istəyən hər ölkəyə Azərbaycan tərəfdən “hə” deyilməyəcək. Azərbaycana investisiya yatırmaq istəyən şirkətlər Hollandiya parlamentinin Dağlıq Qarabağ məsələsində qərəzli mövqe nümayiş etdirdiyini bildirsinlər. Yox, onlar hesab edirlər ki, siyasətdə bizə qara yaxıb, iqtisadiyyatda isə gəlirlərimizdən istifadə edəcəklər, Azərbaycan buna razı olmayacaq. Haqqı müdafiə edən ölkələrlə əməkdaşlıq bizim üçün daha önəmlidir”.
Günel CƏLİLOVA
