Prezident İlham Əliyev Belarus Respublikasının ölkəmizdə yeni təyin olunmuş fövqəladə və səlahiyyətli səfiri Andrey Ravkovun etimadnaməsini qəbul edərkən qeyd edib ki, Azərbaycanda iki ölkənin müştərək müəssisələrinin yaxşı nümunələri var.
Sözügedən məsələ ilə bağlı ölkə başçısı bir sıra məqamlara toxunaraq qeyd edib ki, əməkdaşlığın yaxşı nümunələri ticarət sahəsinə də aiddir: “Hərçənd, pandemiya ilə əlaqədar təbii ki, bütün ölkələrdə ümumdaxili məhsulun və əmtəə dövriyyəsinin azalması müşahidə olunur. Buna baxmayaraq, düşünürəm ki, pandemiyadan sonra biz qısa müddətdə vəziyyəti bərpa edəcəyik. Bütövlükdə, pandemiyadan əvvəlki son illərdə bizim ticari-iqtisadi münasibətlərin çox fəal dinamikası, idxal və ixrac etdiyimiz malların çeşidinin genişlənməsi müşahidə olunurdu.
Əlbəttə, sənaye kooperasiyası əməkdaşlığın mühüm istiqamətidir. Azərbaycanda Belarus-Azərbaycan müştərək müəssisələrinin yaxşı nümunələri var. Biz hətta üçüncü ölkələrin bazarlarına birlikdə çıxırıq. Fikrimcə, bu istiqamətdə əlavə addımlar atılacaq. Uzun illər boyu uğurla həyata keçirilən hərbi-texniki əməkdaşlıq mühüm sahədir. Biz hərbi-texniki əməkdaşlığın potensialını artırmaqla, o cümlədən, yüksək texnologiyalar sahəsində də əməkdaşlıq edirik”.
Məlumat üçün qeyd edək ki, Gəncə Avtomobil Zavodunda Belarus traktorları yığılır. İki ölkə əczaçılıq sahəsində əlaqələri genişləndirir və bununla bağlı müştərək müssisələr fəaliyyət göstərir.
Bütövlükdə, Azərbaycanla Belarus arasında sənaye kooperasiyalarının, birgə müəssisələrin sayının artırılması perspektivini ekspertlər necə dəyərləndirirlər?
“Həmin maşınları İrana, Orta Asiya ölkələrinə ixrac etmək olar”
Məsələyə münasibət bildirən iqtisadçı-ekspert Fuad İbrahimovun sözlərinə görə, Azərbaycanla Belarus kənd təsərrüfatı və sənaye sektorunda birgə müəssisələrin sayını artıra bilərlər: “Bunun üçün hər iki ölkədə yaxşı potensial var. SSRİ süqut edəndən sonra Azərbaycanla Belarus arasında münasibətlər hər zaman dinamik inkişaf edib. Həm siyasi, həm də iqtisadi nöqteyi-nəzərdən iki ölkə arasında əlaqələr yüksək səviyyədədir. Belarus digər MDB dövlətlərindən bir sıra göstəricilərinə görə seçilir. İlk növbədə, ötən illər ərzində Belarusda hər hansı qarşıdurma, digər ölkələrlə münaqişə müşahidə edilməyib. Kənd təsərrüfatının inkişafı, bu sahə üçün lazım olan maşınqayırma məhsullarının istehsalı ilə əlaqədar Belarusun yaxşı təcrübəsi var. Azərbaycanla bu sahədə əməkdaşlıq var. İki ölkənin birgə müəssisələri fəaliyyət göstərir. Hesab edirəm ki, Azərbaycanla Belarus kənd təsərrüfatı və maşınqayırma sahəsində əlaqələri daha da dərinləşdirməlidir. Çünki hər iki dövlətdə bununla bağlı potensial böyükdür. Elə etməliyik ki, Gəncədə yığılan Belarus traktorlarının ehtiyat hissələri ölkəmizdə istehsal olunsun. Həmin maşınları İrana, Orta Asiya ölkələrinə ixrac etmək olar. Bununla yanaşı, hərbi sənayedə də əməkdaşlığı genişləndirmək olar. Həmçinin, Azərbaycan Belarusda müxtəlif investisiya yönümlü proqramlar həyata keçirə bilər. Çünki Qərbin bəzi sanksiyaları üzündən bu ölkənin xarici sərmayələrə olan tələbatı artır. Azərbaycan bu amildən maksimum faydalanmalıdır”.
İqtisadçı-ekspert onu da qeyd etdi ki, qarşılıqlı əlaqələrin genişlənməsi daha çox birgə müəssisənin açılmasına şərait yaradacaq.
Vidadi ORDAHALLI
