Rusiyanın “Kommersant” nəşri Azərbaycanın Qarabağda əldə etdiyi qələbənin ölkəyə ciddi inkişaf vəd etdiyindən yazıb.
Qeyd edilir ki, ümumiyyətlə, Qarabağ ərazisi nəinki qanuni olaraq, hətta rəmzi səviyyədə heç vaxt Azərbaycan ərazisi olmaqdan çıxmayıb: müvafiq xəritələr mütəmadi olaraq yerli mətbəələrdə nəşr olunurdu, “Şuşa” və ya “Ağdam” yol nişanları illərlə yerlərində idi və səylə yenilənib. Bakının xarici əlaqələrindəki aslan payı Qarabağ problemi və BMT Təhlükəsizlik Şurasının “Dağlıq Qarabağ erməniləri”nin nəzarəti altında olan bölgələrin Azərbaycana qaytarılmasına dair 4 qətnamə üzərində qurulub.
“Kommersant” yazır ki, indi müharibə artıq keçmişdə qalıb: “Ermənistan tərəfinin “Dağlıq Qarabağın təhlükəsizlik kəməri” adlandırdığı Azərbaycanın 7 bölgəsi Bakının nəzarətinə qayıdıb. Quru ərazi baxımından bu, 7,5 min kv/km-dən çoxdur. Bir zamanlar 600 mindən çox insanın qaçmaq məcburiyyətində qaldığı ərazi. Onlar ölkənin digər bölgələrinə köçürülüb. “Azərbaycan iri addımlarla addımlayır” - sovet baş katibi Leonid Brejnevin bu kəlamı bəlkə də günümüzə tətbiq oluna bilər. Qarabağ müharibəsində qalib gəlmiş və özünü bölgədəki nüfuzlu güclərdən biri kimi göstərmiş olan Bakı, nəhayət, həm Rusiya, həm Türkiyə, həm də bölgənin digər güclərinin əsas bərabər məsafəli və ən vacib tərəfdaşı statusu qazanmağa çalışır. Bir növ, “Cənubi Qafqazın İsveçrəsi”. Bu, ardıcıl bir taktikadır. İndiyə qədər bu taktika torpaqların qaytarılması şəklində həm diplomatik, həm də real bəhrəsini verir”.
“Azərbaycanın bərabər tərəfdaş olaraq rolu və bölgədəki əhəmiyyəti artır”
Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucovun fikrincə, İkinci Qarabağ müharibəsində əldə edilən qələbədən sonra Azərbaycanın region dövlətləri ilə bərabər tərəfdaşlıq imkanları artıb: “Bu tendensiya müşahidə edilir. Rəsmi Bakı bəlli bir məsafəli siyasət yeridərək, region ölkələrinin maraqlarını uzlaşdırır. Məsələn, Qarabağda atəşkəsə, sülhyaratma əməliyyatlarına Türkiyənin də qoşulması bu baxımdan mühüm hadisədir. Nəzərə almalıyıq ki, Türkiyə həm də bir NATO ölkəsidir. Türkiyənin regionda iştirakı Qarabağ məsələsində böyük güclər arasında balansın qorunmasında mühüm faktordur. Ərazilərin minalardan təmizlənməsində Rusiya ilə yanaşı, Türkiyə də yardım edir. Bununla belə, Böyük Britaniyanın da sözügedən işə qoşulacağı gözlənir. Azərbaycanın qarşısında duran başlıca məsələlərdən biri də işğaldan azad edilən rayonların bərpasıdır. Bu işin təkcə ölkənin öz imkanları hesabına həyata keçirilməsi çətin olacaq. Ona görə də bərpa işlərində daha çox ölkənin, xarici şirkətlərin iştirakına ehtiyac var. Müşahidələr göstərir ki, Azərbaycan bu məsələdə də bərabər tərəfdaşlıq prinsiplərindən çıxış edir. İranla bu istiqamətdə müəyyən müzakirələr aparılır. Eyni zamanda, Böyük Britaniya, İtaliya başda olmaqla, bir sıra Avropa ölkələri bərpa prosesində iştirak etməkdə qərarlıdırlar. Həmçinin, ölkədə həyata keçirilən müxtəlif enerji və nəqliyyat layihələri bütün tərəflərin maraqlarına uyğundur”.
Bütün bunlardan çıxış edən partiya funksioneri hesab edir ki, Azərbaycanın bərabər tərəfdaş olaraq rolu və bölgədəki əhəmiyyəti artır.
Vidadi ORDAHALLI
