Prezident İlham Əliyevin tapşırıqlarının tam icra olunmama problemi - məmur səhvinin ziyanı xalqa dəyir...

Bəhruz Quliyev: “Cənab Prezidentin məmurlara verdiyi bu mühüm mesaj o deməkdir ki, dövlət qurumlarında vəzifə tutan hər bir şəxs dövlət, Vətən, xalq qarşısında məsuliyyət daşıyır”

img

Prezident İlham Əliyev yanvarın 26-da Rəşad Nəbiyevi nəqliyyat, rabitə və yüksək texnologiyalar naziri təyin olunması ilə əlaqədar videoformatda qəbul edərkən məmurların onun tapşırıqlarını tam icra etmədiyini də vurğulayıb.

Ölkə başçısı bildirib ki, əgər  verdiyi tapşırıqlar məmurlar tərəfindən tam icra olunarsa, heç bir sahədə hər hansı bir axsama olmayacaq: “...Məsələn, nə üçün biz ictimai xidmətlər sahəsində texnologiyaları icad edən və ixrac edən ölkəyə çevrilə bilmişik? Çünki qarşıya düzgün hədəflər qoyulmuşdur, kadr təminatı düzgün seçilmişdir və Prezident tərəfindən bu sahəyə daim diqqət göstərilib. Ancaq bu diqqət bütün qurumlar tərəfindən göstərilməlidir. Çünki mənim tərəfimdən verilən tapşırıq bəzi hallarda müəyyən müddət ərzində icra edilir, ondan sonra icra edilmir, ya da ki, unudulur, yaxud da hansısa başqa xoşagəlməz hallar meydana çıxır. Ona görə dövlət qurumları, nazirliklər, dövlət şirkətləri mənim göstərişlərimi axıra qədər icra etməlidirlər və belə olan halda, heç bir yerdə axsama olmayacaq”.

Ekspertlər qeyd edirlər ki, ölkə başçısı bu fikirləri səsləndirməklə bəzi məmurların onun tapşırıqlarına məsuliyyətsiz yanaşdığını, məmur səhvindən isə vətəndaşlarımızın əziyyət çəkdiyini vurğulayıb.

Prezidentin bu fikirlərinin öz işinə məsuliyyətsiz yanaşan məmurlara növbəti xəbərdarlıq olduğunu deyən ekspertlər hesab edirlər ki, məmurlar öz fəaliyyətlərində dönüş etməli, ölkə başçısının bütün tapşırıqlarını zamanındaca həll etməlidirlər.

  • ...üzərinə düşən işi layiqincə görməyən hər bir məmur ölkə başçısının “dəmir yumruğunu görür, görəcək də”

“Səs” media qrupunun rəhbəri, siyasi şərhçi Bəhruz Quliyev “Bakı-Xəbər”ə şərhində bildirdi ki, bütün məmurlar Prezidentin verdiyi tapşırıqları qüsursuz icra etməyə borcludur, çünki ölkə başçısı onları vəzifəyə təyin edərkən qarşılarına konkret tələblər qoyur, bu tələblər də xalqın rifahının təmin edilməsi, problemlərinin həll edilməsi ilə bağlıdır. “Bu həqiqətən də çox aktual məsələdir. Ümumiyyətlə, cənab Prezidentin Prezident seçildiyi vaxtdan indiyə qədər baxışı necə olub? Cənab Prezident qeyd edib ki, mənim apardığım siyasətin mərkəzində vətəndaş amili dayanır. Bilirsiniz ki, Azərbaycan dövlətinin ən böyük sərvəti onun vətəndaşıdır. Dövlət, konkret olaraq cənab Prezident bu sərvətin qiymətini, dəyərini yaxşı bilir və ona görə də bu sərvəti qorumaq üçün dövlət çox əhəmiyyətli, mühüm proqramlar həyata keçirir. Aparılan siyasətin mərkəzində əgər vətəndaş amili dayanıbsa və cənab Prezident bunu dəfələrlə öz çıxışlarında, müsahibələrində xüsusi vurğulayıbsa, sözsüz ki, bütün dövrlərdəki fəaliyyətində ölkə başçısı vətəndaş amilini nəzərə alır. Amma bəzi məmurlar əgər ölkə başçısının verdiyi tapşırıqları tam olaraq yerinə yetirmirlərsə, həmin məmurlar cənab Prezident tərəfindən lazımi qaydada cəzalandırılır. Birincisi, cənab Prezident səsləndirdiyi bu fikirləri ilə məmurlara mesaj verir ki, siz vətəndaşın qulluqçususunuz, xidmətçisisiniz, Prezidentin yerlərdə sözçüsüsünüz. Cənab Prezident tərəfindən müxtəlif vəzifələrə təyin olunmuş məmurlar vətəndaşın xidmətində dayanmalıdırlar. Onlar əgər düzgün xidmət göstərmirlərsə, vətəndaşları incidirlərsə, şübhəsiz, öz layiqli cəzalarını alırlar. Qeyd etməliyəm ki, bütün dövrlərdə “dəmir yumruğa” ehtiyac var. Cənab Prezidentin “dəmir yumruğu” təkcə düşmənə qarşı deyil (təbii o “dəmir yumruq” düşmənin başbilənlərinin başını əzdi - B.Q). Bütövlükdə, bu “dəmir yumruğu” Azərbaycan dövlətçiliyinə, Azərbaycan xalqına, ölkəmizə qarşı xəyanət yolu tutan hər bir şəxs, məmur qarşısında görəcək və görür də. Prezidentin tapşırıqlarının icrasına məsuliyyətsiz yanaşan, öz vəzifəsini, üzərinə düşən işi layiqincə görməyən hər bir məmur ölkə başçısının “dəmir yumruğunu” görür, görəcək də. Prezidentin “dəmir yumruğu” xalqla Prezident, xalqla dövlət birliyinin  bir simvoludur. Hesab edirəm ki, xalqımızın Prezidentlə yumruq kimi birləşməsi “dəmir yumruğa” çevrilib. Lazım gələndə dövlətin gücü, xalqın öz Prezidenti, lideri ilə birliyi həmin o “dəmir yumruğu” idarə edir və o yumruq düşmənin də, Azərbaycana xəyanət edənlərin də, öz vəzifəsini doğru-dürüst anlayıb icra etməyən, səlahiyyətlərindən sui-istifadə edən məmurların da başına dəyə bilir. Ona görə də hər kəs o “dəmir yumruğu” görməlidir və dərk etməlidir ki, Vətən, dövlət, xalq yolunda dövlətçiliyimiz, dövlətimizin milli maraqları naminə fəaliyyət göstərməlidir. Məmurlar da cənab Prezidentin qüsursuz fəaliyyətindən nümunə götürərək ölkə başçısının verdiyi tapşırıqların icrasında səhvə yol verməməli, bunu öz əməllərində göstərməlidirlər”.

B.Quliyevin sözlərinə görə, ölkə başçısının verdiyi bu mühüm mesajdan məmurlar nəticə çıxarmalıdırlar ki, onların aqibəti də keçmiş həmkarlarının aqibəti kimi olmasın. “Cənab Prezidentin məmurlara verdiyi bu mühüm mesaj o deməkdir ki, dövlət qurumlarında vəzifə tutan hər bir şəxs dövlət, Vətən, xalq qarşısında məsuliyyət daşıyır, onlar öz məsuliyyətlərini düzgün dərk etməlidirlər. Daşıdıqları məsuliyyət məmurlar tərəfindən düzgün dərk olunmalı, verilən tapşırıqlar və bu istiqamətdə aparılan bütün işlər xalqın, dövlətin maraqlarına uyğun olmalı, məmurların şəxsi maraqları dövlətçilik və xalq maraqlarından üstün olmamalıdır. Bütün məmurlar dövlətin gördüyü işlərə çox ciddi dəstək verməlidirlər” - deyə B.Quliyev vurğuladı.

İradə SARIYEVA

Son xəbərlər