Vətən müharibəsində qələbəmizi təmin edən “bütün amillərin sintezi” - Prezident nələri nəzərdə tutdu...

Seyid Camal Əzimbəyli: “Ölkəyə daxil olan neft gəlirlərindən səmərəli şəkildə istifadə edildi”

img

“Bütün amillərin sintezi həm qələbəni şərtləndirdi, həm də bundan sonra bizim inkişaf dinamikamızı da şərtləndirəcək”. Bunu Prezident İlham Əliyev Rəşad Nəbiyevi nəqliyyat, rabitə və yüksək texnologiyalar naziri təyin olunması ilə əlaqədar videoformatda qəbul edərkən çıxışı zamanı deyib.

Ölkə başçısının sözlərinə görə, müharibə bir çoxuna Azərbaycanın potensialının nədən ibarət olduğunu göstərdi: “Biz döyüş meydanında qələbə qazandıq, biz mülki sahədə qələbə qazandıq. Çünki əgər güclü iqtisadiyyat qurmasaydıq, güclü ordu qura bilməzdik. Ona görə bütün amillərin sintezi həm qələbəni şərtləndirdi, həm də bundan sonra bizim inkişaf dinamikamızı da şərtləndirəcək. Hətta pandemiya dövründə də bizim qeyri-neft sənayemiz artmışdır, özü də böyük dərəcədə. Keçən il qeyri-neft sənayemiz 12,5 faiz artmışdır. Nəyə görə? Texnoloji inkişaf, sənayeləşmə, investisiyalar, güzəştli şərtlərlə kreditlərin verilməsi, dövlət-özəl sektor tərəfdaşlığı - bütün bu amillər öz rolunu oynayıb. Texnologiyalar, telekommunikasiya sahələrində artıq bir çox yerli şirkətlər yaranmışdır və həm Azərbaycanda, həm də xaricdə fəaliyyət göstərir. Biz onlara da dəstək verməliyik”.

Göründüyü kimi, bütün amillərin sintezi Azərbaycanın həm mülki, həm də hərbi sahədə qəti qələbəsini təmin etdi. Ümumilikdə, Prezidentin bununla bağlı dedikləri nə deməkdir? Ekspertlər bunu necə dəyərləndirirlər?

  • “Artan iqtisadi imkanlar hesabına güclü ordu yaradıldı, Silahlı Qüvvələrimiz ən müasir silah kompleksləri ilə təchiz edildi

Məsələyə münasibət bildirən şərqşünas Seyid Camal Əzimbəylinin sözlərinə görə, Prezidentin sözügedən dəyərləndirməsi bir sıra məqamları özündə ehtiva edir: “Vətən müharibəsində bir sıra amillərin vəhdət şəklində bir arada olması bizim qəti qələbəmizə gətirib çıxardı. Müstəqillikdən üzü bəri Azərbaycanda belə xalq-iqtidar birliyi olmayıb. Müharibə dövründə, demək olar, bütün siyasi qüvvələr hakimiyyətə dəstək verdi. Azərbaycan bir yumruq kimi birləşərək düşmənə zərbələr endirdi. İllərlə davam edən torpaq həsrətinə son qoyuldu. Bütün bunlarla yanaşı, Azərbaycanın qələbəsini şərtləndirən başlıca amil ölkənin iqtisadi və hərbi gücü oldu. Ötən illər ərzində ölkədə bütün sahələri əhatə edən islahatlar aparıldı. Təsadüfi deyil ki, dünyanın reytinq cədvəllərində Azərbaycan ən islahatçı ölkələrdən biri hesab olunur. Ölkəyə daxil olan neft gəlirlərindən səmərəli şəkildə istifadə edildi. Əhalinin sosial vəziyyəti yaxşılaşdı. Yeni-yeni sənaye sahələri quruldu. Beynəlxalq əlaqələr genişləndirildi. Bir sıra mötəbər qurumlar səviyyəsində keçirilən tədbirlərdə Azərbaycanın ərazi bütövlüyünə dəstək verildi. Qarabağ həqiqətləri dünya ictimaiyyətinə çatdırıldı. Güclü ordu yaradıldı. Əldə edilən neft gəlirləri və artan iqtisadi imkanlar hesabına ordumuz ən müasir silah kompleksləri ilə təchiz edildi. Bir sıra silahların istehsalı ölkə daxilində həyata keçirildi. Azərbaycan kosmosa öz süni peykini göndərdi. Bütün bunların sayəsində biz həm mülki, həm də hərbi sahədə qələbə qazandıq. Bütün amillərin sintezi deyilərkən söhbət bu deyilənlərdən gedir”.

Şərqşünas hesab edir ki, sadalanan amillər Azərbaycanın bundan sonra da dinamik inkişafını da təmin edəcək.

Vidadi ORDAHALLI

Son xəbərlər