Xaricdə yaşayan Leyla Yunus adlı hüquq müdafiəçisi yenə köhnə fəaliyyətini bərpa edib. “Azərbaycan siyasi məhbuslarına azadlıq uğrunda” İttifaq adlı yönü bilinməyən bir təşkilat, güya ölkəmizdə 146 nəfər “siyasi məhbusun” olduğuna dair məlumat yayıb.
Maraqlıdır ki, Leyla Yunus tərəfindən tərtib edilən siyahıda rüşvətə, reketçiliyə görə həbs edilənlərdən tutmuş koronavirus infeksiyasını qəsdən yaymaqda ittiham olunanlara qədər var. Görünən budur ki, L.Yunus yenə də qərəzli əməllərindən geri qalmır. Leyla Yunusun bu siyahını hansı zamanda yaydığı da maraqlıdır. Ölkəmiz 44 günlük müharibədə zəfər qazanadan sonra Türkmənistanla “Dostluq” adlanan mühüm saziş imzalandı. Məhz belə bir məqamda Leyla Yunusun yenə saxta bir siyahı ilə meydana çıxması təsadüfdürmü?
Hüquqşunas Mehman Muradlı “Bakı-Xəbər”ə açıqlamasında bildirdi ki, burada təsadüf yox, onların məntiqinə söykənən ardıcıllıq var: “Həmin siyahıya nəzər saldım. Konkret cinayət əməllərinə görə həbsə salınan adamlar var. Həmin cinayətlər hansı ölkədə törədilsəydi, adamlara bundan da ağır cəzalar veriləcəkdi. Kiminsə siyasi partiya və ya jurnalist vəsiqəsi gəzdirməsi həmin şəxslərə cinayət məsuliyyətinə cəlb edilməyəcəyi ilə bağlı immuniteti yarada bilməz. Bu baxımdan da hesab edirəm ki, Azərbaycanda “siyasi məhbus” anlayışı yoxdur. Bu adla müxtəlif dairələr Azərbaycana təzyiq yolunu tuturlar. Biz fikir vermişik ki, məhz həlledici, ölkəmiz üçün həssas olan məqamlarda belə təzyiqlər artmağa başlayır. Hazırda da biz ölkə olaraq ciddi uğurlara imza atmışıq. Ərazi bütövlüyümüzü tam bərpa etmişik. Ardınca Xəzərdə Türkmənistanla möhtəşəm Memorandum imzalanıb. Məzh belə məqamda Leyla Yunusun əlinə yenidən siyahı alıb gəzməsi bu uğurları qaralamağa yönəlib. Təəssüf ki, biz bu hüquq müdafiəçisini ermənilərin etdiyi vəhşiliklərin fonunda səsini çıxaran görmədik. 44 gün ərzində ermənilər bizim dinc əhalimizi qətlə yetirdilər. Niyə Leyla Yunus həmin hadisələrlə bağlı siyahı tutmurdu?
Hüquqşunas bizim sadaladığımız ardıcıllığa birini də əlavə etdi: “Mən bura Baydenin vəzifəsinin icrasına başlaması hadisəsini də əlavə edərdim. Onun yeni administrasiyasının diqqətinə Azərbaycanda demokratiyanın olmadığını çatdırmaq istəyirlər. Təbii ki, bu çirkin üsullarda məqsəd ölkəmizin imicinə zərbə vurmaqdır. Azərbaycanın mükəmməl hüquq sistemi var. Bu baxımdan da burada kimsə özünün siyasi fəaliyyətinə görə həbs edildiyini iddia edə bilməz. Bəziləri elə fikirləşir ki, fürsətdir, bu vəziyyətdən təzyiq kimi istifadə etmək lazımdır. Azərbaycan dövləti vətəndaşların hüquq və azadlıqlarını qorumağa borcludur, bu istiqamətdə addımlar atır”.
Məhəmmədəli QƏRİBLİ
