Azərbaycan və Macarıstan macar şirkətlərinin İkinci Qarabağ müharibəsi nəticəsində azad edilmiş ərazilərin bərpasında iştirak etməsini müzakirə ediblər. Bu barədə Macarıstanın xarici işlər və ticarət naziri Peter Siyarto öz "Facebook" səhifəsində yazıb.
O bildirib ki, həmin məsələ Azərbaycanın əmək və əhalinin sosial müdafiəsi naziri Sahil Babayevlə videokonfrans zamanı müzakirə olunub: "Macarıstan həmişə Azərbaycanın ərazi bütövlüyünü dəstəkləyib. Münaqişə başa çatdıqdan sonra biz macar şirkətlərinin müharibə nəticəsində zərər dəyən rayonların bərpasında iştirakı məsələsini müzakirə etmişik. Azərbaycan tərəfi bu fikri alqışlayıb və Macarıstanın "EximBank"ı rekonstruksiya proqramında iştirak etmək niyyətində olan macar şirkətləri üçün 100 milyon dollar məbləğində kredit xətti açıb”.
Qeyd edək ki, Macarıstan və bir sıra xarici ölkələr Qarabağın bərpasında maraqlıdırlar. Onlar bu işdə ölkəmizə dəstək olmağa hazırdırlar.
“Müharibə dönəmində Azərbaycanın haqlı mövqeyini müdafiə edən, beynəlxalq hüquqa hörmətlə yanaşan ölkələrin şirkətlərinin prosesə cəlbi həm ümumi işin keyfiyyətinə, həm də onun daha qənaətli icrasına səbəb olacaq”
İqtisadçı-ekspert Xalid Kərimli bildirdi ki, Qarabağda yaşayışın yenidən təmin olunması ilə əlaqədar ölkədə genişmiqyaslı yenidənqurma və bərpa işləri aparılacaq. Bu prosesdə həm yerli, həm də xarici dost ölkələrin şirkətləri yaxından iştirak edəcəklər. Müharibə dönəmində Azərbaycanın haqlı mövqeyini müdafiə edən, beynəlxalq hüquqa hörmətlə yanaşan ölkələrin şirkətlərinin prosesə cəlbi həm ümumi işin keyfiyyətinə, həm də onun daha qənaətli icrasına səbəb olacaq: “Xarici şirkətlərin yenidənqurma və bərpa işlərinə cəlbi bir neçə səbəbdən vacibdir. Yenidənqurma işlərinin miqyasca çox böyük olacağı proqnozlaşdırılır. Buna görə də tək ölkə şirkətlərinin resursları hesabına bu işlərin görülməsi uzun zaman tələb edər. Xarici şirkətlərin cəlbi tender proseslərində ədalətli qiymətlərin formalaşmasına imkan verə bilər. Tenderlərdə nə qədər çox şirkət iştirak edirsə, bir o qədər çox təklif verilir, müqayisə imkanları genişlənir. Ölkəyə gələn şirkətlər özləri ilə yeni texnologiyalar, ənənələr, sistemlər, yanaşmalar və tərzlər gətirirlər. Yeni sahibkarlıq və rəqabət mədəniyyəti formalaşdırırlar ki, bu da sonradan ölkə sahibkarlığına mühüm töhfə vermiş olur”.
Günel CƏLİLOVA
