UNESCO özünü gözdən tam saldı, ISESCO isə Ermənistanın antimədəniyyət vəhşiliklərinin izinə texniki komissiya salır...

Fərhad Quliyev: “ISESCO UNESCO-dan fərqli olaraq, beynəlxalq təşkilat kimi öz üzərinə götürdüyü öhdəlikləri yerinə yetirir”

img

“Biz razılığa gəldik, gələcəkdə ICESCO işğaldan azad edilmiş ərazilərimizə texniki missiya göndərəcək”. Bunu Mədəniyyət naziri Anar Kərimov keçirdiyi brifinqdə deyib.

Onun sözlərinə görə, ICESCO nümayəndə heyəti Füzuli və Ağdama səfər edib: “Onlar öz gözləri ilə şahid olublar ki, ermənilər tərəfindən hansı cinayətlər törədilib. Füzulidə bir sağlam bina tapılmayıb. Nümayəndə heyəti Ağdamda Cümə Məscidi və ətrafdakı ərazilərə səfər edib. Ermənilər tərəfindən etnik təmizləmə ilə yanaşı, mədəni təmizləmə aparıldığına şahid olublar. Bu hadisələr göstərir ki, ermənilər insanlığa qarşı cinayət törədiblər. Biz ümid edirik ki, ICESCO öz hesabatında bu cinayətləri qeydiyyata alacaq və onları sənədləşdirərək dünyaya, geniş ictimaiyyətə təqdim edəcək”.

UNESCO-dan fərqli olaraq, ISESCO-nun öz missiyası, üzərinə düşən vəzifələri qüsursuz icra etdiyini deyən ekspertlər hesab edirlər ki, bu qurumun gələcəkdə azad edilmiş ərazilərə texniki missiya göndərməsi çox böyük əhəmiyyətə malikdir.

  • “ISESCO-nun gələcəkdə azad edilmiş ərazilərimizə texniki missiya göndərmək niyyəti çox təqdirəlayiqdir”

Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutunun şöbə müdiri, tarix üzrə fəlsəfə doktoru, tanınmış mütəxəssis Fərhad Quliyev “Bakı-Xəbər”ə şərhində bildirdi ki, ISESCO UNESCO-dan fərqli olaraq, öz üzərinə götürdüyü missiyanı layiqincə yerinə yetirir. “Əlbəttə ki, ISESCO-nun bu fəaliyyəti təqdirəlayiqdir. ISESCO UNESCO-dan fərqli olaraq, beynəlxalq təşkilat kimi öz üzərinə götürdüyü öhdəlikləri yerinə yetirir.  ISESCO-nun baş direktorunun rəhbərliyilə missiyanın azad olunmuş ərazilərimizə gəlməsi, tarixi, mədəni, dini abidələrin erməni vandalları tərəfindən dağıdılmasını öz gözləri ilə görməsi və reaksiya verməsi müsbət haldır. Belə bir xəbər yayıldı ki, Azərbaycanda ISESCO-nun regional mərkəzi yaradılacaq, bu özü də mühüm hadisədir. Hesab edirəm ki, bu regional mərkəzin çox böyük faydası var. Azərbaycanda bu qurumun regional mərkəzinin olması daha məqsəduyğundur, burada təkcə Azərbaycanda olan İslam maddi irsindən söhbət getmir, bütün Qafqazda olan İslam dininə aid olan abidələrdən gedir. Qafqazda olan bütün İslam dini abidələrinin burada cəmləşməsi onu göstərir ki, Bakıda yaradılacaq regional mərkəz bunlara nəzarət edə biləcək. Biz bunu təqdirəlayiq hesab edirik. Fikrimizcə, eyni qaydada UNESCO ilə də münasibətlərimizdə ciddi irəliləyiş olmalıdır və Azərbaycanda UNESCO-nun regional mərkəzlərindən, institutlarından biri açılsın”.

F.Quliyev hesab edir ki, ISESCO-nun missiyasının Azərbaycana səfəri ilə ölkəmizlə bu qurum arasında yeni əməkdaşlıq formatı yarandı, yeni əməkdaşlıq istiqamətləri açıldı. “ISESCO-nun Azərbaycana olan münasibəti və ölkəmizdəki gələcək fəaliyyəti təqdirəlayiqdir. Şübhəsiz ki, ISESCO-nun nümayiş etdirdiyi bu addımlar UNECSO rəsmiləri üçün bir nümunə olmaldır. İndiyə qədər Azərbaycan dövlətinin ISESCO ilə əlaqələri həmişə möhkəm olub, bu qurum ölkəmizin bir çox tədbirində iştirak edib, öz mövqeyini bildirib. Bu dəfə də ISESCO-nun missiyasının Azərbaycana gəlməsi, gördükləri ilə bağlı mövqeyini ortaya qoyması, burada regional mərkəzin yaradılması ilə bağlı razılığa gəlinməsi, habelə gələcəkdə azad edilmiş ərazilərimizə texniki missiya göndərmək niyyəti çox təqdirəlayiqdir. Azərbaycanda dini abidələrə göstərilən yüksək münasibətə görə Prezident İlham Əliyevə xüsusi təşəkkürlərini bildirməsi müsbət haldır. Çünki dövlət başçımız Azərbaycanda İslam abidələrinin qorunması məsələsini gündəmə gətirdi və açıq şəkildə bildirdi ki, məhz bütün İslam ölkələri Ermənistanın İslam dini abidələrinə qarşı necə hörmətsizlik etdiyini, təhqir etdiyini, dağıtdığını görməlidir və buna reaksiya verməlidirlər. ISESCO tərəfindən bu çox müsbət qəbul olundu. Artıq mətbuat orqanlarından görürük ki, bir çox müsəlman ölkəsi tərəfindən bu məsələyə reaksiya verilir ki, işğal zamanı Ermənistan İslam abidələrinə qarşı hörmətsizlik göstərib, onları məhv edib, o abidələrdən tövlə kimi istifadə edib. Hesab edirəm ki, bütün bu reaksiyalar Azərbaycan dövlətinin düzgün qurduğu fəaliyyət nəticəsində baş verib. ISESCO-nun Ermənistanın bu cinayətlərinə kəskin reaksiya verməsi və Azərbaycanın ədalətli, haqlı mövqeyini müdafiə etməsi təqdirəlayiqdir. ISESCO Azərbaycanın mövqeyini müdafiə etməli idi, çünki hər şey göz qabağındadır. UNESCO, təbii ki, bu məsələdə geri qalır və buna reaksiyası yoxdur. Bu da ondan irəli gəlir ki, ISESCO-dan fərqli olaraq, UNESCO-da anti-Azərbaycan qüvvələri var və onlar neytrallaşdırılmalıdır. Gələcəkdə UNESCO bir də belə qərəzli mövqe sərgiləsə, bu məsələ gündəmə gətirilməli və hər şey aydınlaşdırılmalı, UNESCO ilə əməkdaşlığa yenidən baxılmalıdır” - deyə F.Quliyev vurğuladı.

İradə SARIYEVA

Son xəbərlər