Azərbaycan-Pakistan hərbi əməkdaşlığında mühüm mərhələ başlanır...

img

44 günlük Vətən müharibəsinin gedişində və ondan sonra Azərbaycanın haqlı mövqeyinə ən yaxından dəstək verən ölkələrdən biri də Pakistan olub. Əslində, Pakistan qardaş Türkiyə ilə yanaşı əvvəlcədən Azərbaycana Dağlıq Qarabağ məsələsi və digər istiqmətlərdə hərtərəfli dəstək verib. Hər iki ölkə, xüsusən Dağlıq Qarabağ münaqişəsinin həllində daim Azərbaycanın haqlı mövqeyinə tam dəstək ifadə edib, münaqişənin ölkəmizin ərazi bütövlüyü və sərhədlərin toxunulmazlığı çərçivəsində çözümünə tərəfdar çıxıb.

Yuxarıda qeyd olunduğu kimi, 44 günlük Vətən müharibəsi zamanı da hər iki ölkə Azərbaycanın beynəlxalq hüquqa əsaslanan mövqeyinə qətiyyətli dəstək nümayiş etdirib. Azərbaycan da hər zaman Türkiyə və Pakistanla əməkdaşlığa xüsusi önəm verib, onlarla münasibətləri strateji müttəfiqlik səviyyəsinə yüksəldib. Rəsmi Bakı daim bu ölkələrin problemlərinə böyük həssaslıqla yanaşıb, onların həlli istiqamətində real dəstəyini ifadə edib. Hazırda üç dost İslam ölkəsinin sıx əməkdaşlığı və bir-birini dəstəkləməsi müsəlman dünyasında həmrəyliyin uğur nümunəsi kimi qiymətləndirilir. Ölkələrimiz arasında mövcud münasibətlər, belə demək olarsa, ideal xarakterə malikdir. Bundan da qazanan  tərəf həmin ölkələrin qardaş xalqları və bütün müsəlman dünyasıdır. Elə Azərbaycan, Türkiyə və Pakistan Xarici işlər nazirlərinin İslamabadda baş tutan üçtərəfli görüşü də ölkələrimiz arasında münasibətlərin daha da dərinləşməsinə xidmət edir, bu mənada çox böyük və müstəsna əhəmiyyətə malik hadisə sayılır.

Real vəziyyətin təhlili qarşıdakı dövr ərzində Azərbaycanla Pakistan arasında hərbi müstəvidə də əlaqələrin daha da dərinləşəcəyini deməyə əsas verir. Pakistana rəsmi səfəri çərçivəsində Azərbaycan xarici işlər naziri Ceyhun Bayramovun keçirdiyi görüşlər də bunu təsdiq edir.

Qeyd edək ki, səfər zamanı Ceyhun Bayramov Pakistan ordusunun Baş Qərargah rəisi, ordu generalı Qamar Cavid Bacva ilə də görüşüb. Qamar Cavid Bacva Pakistanın hər zaman Azərbaycanın yanında olduğunu, Azərbaycanın haqlı mövqeyini dəstəklədiyini və Pakistan ordusunun ölkəmizə verdiyi mənəvi dəstəyi, həmrəyliyi diqqətə çatdırıb. Burada iki ölkə arasında əlaqələrin inkişaf etdirilməsi, o cümlədən hərbi texniki, hərbi təhsil sahələrində əməkdaşlığın davam etdirilməsinin əhəmiyyəti vurğulanıb. Bundan əvvəl isə Pakistan Hərbi Hava Qüvvələrinin komandanı, aviasiya marşalı Mücahid Anvar Xanın rəhbərlik etdiyi nümayəndə heyəti ölkəmizdə səfərdə olub. Mücahid Anvar Xanın Azərbaycan müdafiə naziri, general-polkovnik Zakir Həsənovla görüşü zamanı iki ölkə arasında hərbi əlaqələrin inkişafı yenə xüsusi diqqət mərkəzində olub. Burada tərəflər Azərbaycanla Pakistan arasında hərbi, hərbi-texniki və hərbi təhsil sahələrində, o cümlədən iki ölkənin hərbi hava qüvvələri arasında əməkdaşlığın inkişaf etdirilməsi və əlaqələrin daha da genişləndirilməsi barədə razılıq əldə edib. Mücahid Anvar Xanın Azərbaycan Hərbi Hava Qüvvələri komandanı. general-leytenant Ramiz Tahirovla görüşündə də bu xüsusda razılıqlar əldə olunub. Tərəflər Azərbaycan və Pakistan hərbi hava qüvvələri arasında əməkdaşlığın inkişaf etdirilməsi və əlaqələrin daha da genişləndirilməsi, həmçinin birgə hərbi təlimlərin keçirilməsi məsələləri ətrafında razılığa gəlib.

Ekspertlər bütün bunları ölkəmiz üçün vacib hal sayır. Hesab edilir ki, bütün bunlar hərbi aviasiya sahəsində Azərbaycanın mövqeyini daha güclü hala gətirəcək. Bu fonda gözlənilir ki, Azərbaycan, nəhayət, “JF-17 Thunder” qırıcı təyyarəsinin də alışını həyata keçirəcək. Pakistan bəyan edir ki, təyyarənin satışında heç bir problem yoxdur. Xatırladaq ki, “JF-17 Thunder” hava kəşfiyyatı aparmağa, yer hədəflərinə qarşı sarsıdıcı hücum həyata keçirməyə və qarşı tərəfin hava hədəflərini tutmaq, yaxud məhv etməyə qadirdir. Onu da qeyd edək ki, "JF-17 Thunder" yüngül, tək mühərrikli, çoxməqsədli dördüncü nəsil qırıcı-bombardmançı təyyarədir. Qırıcı ilk növbədə Pakistan hava qüvvələrinin təlabatını ödəmək üçün Pakistan Aviasiya Kompleksinin və Çin şirkəti olan Çenqdu Aviasiya Sənaye Korporasiyası tərəfindən hazırlanıb. "JF-17 Thunder" "hava-hava", "hava-yer" raketləri, döyüş imkanları və bir çox xüsusiyyətləri ilə öz sinfindən olan digər təyyarələri üstələyir. Xüsusilə də keçmiş Sovet, hazırki Rusiya istehsalı olan təyyarələrlə müqayisədə bir çox üstünlüyə malikdir. Məsələn, analoqu hesab olunan MİQ-29 cəmi 2 ton faydalı yük götürərək raketlərlə maksimum 60 kilometr məsafədə olan hədəflərə zərbə endirə bilir. "JF -17 Thunder" isə 3 ton yüklə 100 kilometr məsafədə hədəfləri məhv etmək qabiliyyətindədir. "JF -17 Thunder" Azərbaycan ordusuna digər parametrlər bxımından da üstünlük qazandıra bilər. Belə ki, həmin təyyarələrə Azərbaycanın Türkiyədən alıdğı SOM qanadlı raketlərinin quraşdırılması "JF -17 Thunder"in döyüş qabiliyyətini daha da artıra bilər. Xatırladaq ki, Türkiyənin “Roketsan” şirkəti tərəfindən işlənib hazırlanan SOM qanadlı raketlərinin çəkisi 600 kiloqrama yaxın, atəş mənzili 250 kilometrdir. 

Tahir TAĞIYEV

Son xəbərlər