Azərbaycanın Ermənistana qarşı məhkəmə hazırlıqlarına beynəlxalq dəstək addımları başladı - ISESCO...

Fatimə Hacıbəyli: “...bu, Azərbaycanla yanaşı, dünya üçün də vacibdir”

img

“Biz buraya Azərbaycan hökumətini dəstəkləməyə gəlmişik. İşğaldan azad edilmiş ərazilərə səfər zamanı orada dağıdılmış şəhərləri, mədəni-tarixi abidələrin məhv edildiyini gördük”. Bunu ICESCO-nun baş direktoru Salim bin Məhəmməd əl-Malik keçirdiyi brifinqdə deyib.

Salim bin Məhəmməd əl-Malik qeyd edib ki, ermənilərin bu cinayətlərinə məhkəmədə baxılmalıdır: “Çünki bu, bəşəriyyətə qarşı törədilən cinayətdir. Ağdam vaxtilə insanlarla dolu şəhər idi. İndi orada yalnız divar qalıqları qalıb".

İşğalçı ölkənin törətdiyi cinayətlərə görə beynəlxalq məhkəmədə cavab verməsini xarici ölkələr də dəstəkləyirlər. Artıq beynəlxalq təşkilatlar, xarici ölkələr ermənilərin qanun qarşısında cavab vermələrini tələb edirlər.

  • “Bəşəriyyətə qarşı mənfur əməlləri ilə özlərini gələcəksizliyə məhkum etmiş ermənilərin...

“Vəfa” Sosial-İctimai Birliyinin rəhbəri Fatimə Hacıbəyli qeyd etdi ki, bəşəriyyətə qarşı mənfur əməlləri ilə özlərini gələcəksizliyə məhkum etmiş ermənilərin dağıdıcılıq əməlləri isə cavabsız qalmayacaq. Onlar bu vəhşiliyə görə beynəlxalq məhkəmələr qarşısında cavab verməli olacaqlar. Azərbaycan 30 ilə yaxın dövr ərzində bu vəhşiliyi törətmiş Ermənistana qarşı təzminat davası açacaq: “Ermənistan illərlə törətdiyi başqa cinayət əməlləri kimi, bu dağıntılara görə də cavab verməli olacaq. Çünki bizim apardığımız dava təkcə torpaqlarımızın azadlığı uğrunda deyil. Bu, bir haqq davasıdır. Ədalətin bərpası uğrunda aparılan savaşdır. Bu dava vətəndaşlarımızın mülkiyyətini dağıdanlardan hesab sorulmasını, soydaşlarımızın pozulmuş haqlarının bərpasını da əhatə edir”.

Birlik sədri onu da əlavə etdi ki, ermənilərin həyata keçirdikləri bütün cinayətlərə, o cümlədən, ekoloji cinayətlərə görə beynəlxalq məhkəmə qarşısında cavab vermələri vacibdir: “İşğal dövründə Dağlıq Qarabağ və ətraf ərazilərdə ermənilər tərəfindən törədilmiş bütün cinayət xarakterli məsələlərlə əlaqədar hüquqi prosedurlar aparılmalıdır. Haaqa və Cenevrə konvensiyalarının müddəaları əsas götürülərək beynəlxalq məhkəmə qarşısında iddialar qaldırılmalı və ifşa olunmalıdırlar. Dünya birliyi əsl erməni kimliyini görməlidir”.

F.Hacıbəylinin sözlərinə görə, Azərbaycan xalqı öz torpaqlarını işğaldan azad etdi. Ali Baş Komandanın qətiyyətli mövqeyi, xalqla birliyinin nəticəsində torpaqlarımız düşmən tapdağından təmizləndi. Amma baş verən cinayətlər cavabsız qalmamalıdır. Dinc əhalinin erməni vəhşiliklərinin dəhşətlərini yaşaması cəzasız qalmamalıdır. İnsanların başlarına gətirilənlərə görə cinayətkarlar cavab verməlidirlər. Bu, Azərbaycanla yanaşı, dünya üçün də vacibdir.

Günel CƏLİLOVA

Son xəbərlər