Bakının icazəsi olmadan Ermənistan XİN rəhbərinin ərazilərimizə səfər etməsi onlara baha başa gələ bilər. Bu barədə Azərbaycan Xarici İşlər Nazirliyinin açıqlamasında bildirilir ki, Ermənistanın dövlət rəsmilərinin Azərbaycanın ərazilərinə qanunsuz səfərləri qəbuledilməzdir:
“Rəsmi Bakının icazəsi olmadan Ermənistan xarici işlər naziri bir daha Azərbaycan ərazilərinə səfər edəcəyi təqdirdə, bu, Ermənistan tərəfinə baha başa gələ bilər. Azərbaycanın Dağlıq Qarabağ bölgəsinin statusu ilə bağlı Ermənistan xarici işlər nazirinin əsassız iddiasına gəldikdə isə, Prezident İlham Əliyevin status məsələsini tarixin zibilliyinə göndərdiyini Ermənistan rəsmilərinə xatırlatmaq istərdik".
Göründüyü kimi, Azərbaycan Ermənistan rəsmilərinin icazəsiz olaraq Qarabağa səfərilə bağlı sərt xəbərdarlığını edib. Erməni rəsmilərinin icazəsiz səfərləri davam edərsə, Azərbaycan hüquqi, siyasi, diplomatik və hətta hərbi baxımdan hansı addımları ata bilər?
Qabil Hüseynli: “Yaxşı olar ki, Ermənistan bu bəyanatdan ciddi nəticə çıxarsın və bunun daha ağır nəticələrə gətirib çıxara biləcəyinin fərqində olsun”
Politoloq Qabil Hüseynli “Bakı-Xəbər”ə açıqlamasında bildirdi ki, hətta müharibə başlamazdan əvvəl də bütün dünya Azərbaycanın ərazi bütövlüyünü tanıyırdı:
“Müharibədən sonra isə reallıqlar bir az da dəyişdi. Qondarma rejim tarixin arxivinə göndərildi. Münasibətləri tənzimləmək üçün regiona Rusiyanın sülhməramlıları yerləşdirilib. Son dövrlərdə biz ermənilərin sərsəm addımları ilə rastlaşırıq. Bir tərəfdən Qarabağın statusu ilə bağlı əsası olmayan fikirləri yenidən qabardırlar, digər tərəfdən isə sanki öz əraziləri kimi ora rəsmilərin səfərini təşkil edirlər. Bu, beynəlxalq konvensiyalara zidd olmaqla yanaşı, həm də 10 noyabrda imzalanan Bəyanatın mahiyyətinə uyğun addımlar deyil. Azərbaycan ordusu həmin ərazilərə, hətta dəhliz olaraq istifadə olunan Laçına belə nəzarət edir. Orada lazımi istehkamlar qurub. Əgər belə hallar təkrar olunarsa, Azərbaycan hərbçilərin köməyi ilə buna mane olacaq. Erməni rəsmilərini müşahidə edən silahlılar olarsa, hərbi əməliyyatla onların məhv edilməsi əməliyyatı da keçirilə bilər. Buna bizim tam hüququmuz çatır. Çünki bizim sərhədimizi icazəsiz silahlıların iştirakı ilə kimsə poza bilməz. XİN-in bəyanatını yerində edilmiş xəbərdarlıq kimi qəbul edirəm”.
Politoloqun sözlərinə görə, Azərbaycan diplomatik müstəvidə də öz addımlarını atacaq: “Bunun əsası müharibədən əvvəl də qoyulub. Kimsə icazəsiz belə addımı atırdısa, adı “qara siyahı”ya salınırdı. Bundan sonra üçtərəfli bəyanat imzalanıb. Ermənistan bu addımı ilə həm də həmin razılaşmanı pozur. Bu da regionda əldə olunan sülhə yenidən təhdid yaradır. Yaxşı olar ki, Ermənistan bu bəyanatdan ciddi nəticə çıxarsın və bunun daha ağır nəticələrə gətirib çıxara biləcəyinin fərqində olsun”.
Məhəmmədəli QƏRİBLİ
