Ermənistan Baş naziri Nikol Paşinyanın Dağlıq Qarabağla bağlı bəzi məxfi danışıqlarda iştirak etdiyinə dair sensasion sübutların olması barədə məlumatlar erməni cəmiyyətində şok effekti yaradıb. Erməni saytlarından birinin yaydığı məlumata görə, bu günlərdə üzə çıxan faktlar zəncirin ilk halqasıdır və ya Ermənistana qarşı xəbərdarlıq atəşidir:
“Gizli danışıqların Azərbaycanın sabiq xarici işlər naziri Elmar Məmmədyarov və onun komandası ilə aparıldığı istisna olunmur. Mövcud məlumatlara görə, bu danışıqların foto və videoları da var. Bu sübutların hamısı Bakıdadır. Bu görüntülər dərc olunsa, Nikol Paşinyan və bütün Ermənistan hakimiyyəti çox acınacaqlı vəziyyətə düşəcək. Ermənistanın Baş naziri və onun siyasi komandası haqqında kompromatlar Bakının əlindədirsə, ən ağıllı çıxış yolu Nikol Paşinyanın istefa verməsidir”.
Bu məlumatları nə dərəcədə əsaslı saymaq olar və bu detallar açıqlanarsa, Paşinyana hansı zərəri dəyə bilər?
“Əminliklə demək olar ki, bu detallar açıqlansa, Paşinyan maksimum ilin sonuna qədər hakimiyyətini qoruya bilər”
Politoloq Yeganə Hacıyeva “Bakı-Xəbər”ə açıqlamasında bildirdi ki, 2018-ci ildə Düşənbədə bizim nümayəndə heyətilə Ermənistan nümayəndə heyəti arasında ümumi bir müzakirənin olduğuna dair fikirlər mövcuddur: “Paşinyana vaxt vermək məsələsində Avropa Birliyi və MDB ölkələrinin də ortaq rəyi olub ki, Paşinyan toparlansın. Bu, Ermənistanda hakimiyyət dəyişikliyi prosesinin getdiyi zamana təsadüf edirdi. Həmin vaxt danışıqlar prosesinin bir müddət təxirə salınması razılığı olub. Detal bundan ibarət idi ki, təmas xəttində gərginlik hər iki tərəfdən aşağı salınacaq, beynəlxalq təşkilatlarda danışıqlar yalnız iki ölkə rəhbərlərinin debatı formasında olacaq. Biz bunu Valday və Davos forumlarında gördük. Prosesin bu şəkildə getməsində digər tərəflər də maraqlıydı. Çünki Ermənistanda yeni hakimiyyət qurulmuşdu və onlar vaxt istəmişdi. Sonra biz Paşinyanın əsl avanturist olduğunu gördük. Yerini möhkəmlədən kimi o, ilk olaraq Dağlıq Qarabağa getdi və orda sərsəm bəyanatlar səsləndirdi. Məsələ burasındadır ki, 2014-cü ildə tərəflər arasında gedən danışıqlarla bağlı Paşinyanın mövqeyi Sarkisyan hakimiyyətilə kəskin fərqlənib. Həmin vaxt Paşinyan Avropa institutlarında pozitiv mesajlar verib. Məğzi bu olub ki, 7 rayon Azərbaycana qaytarılsın, təhlükəsizlik zonası yaradılsın və yalnız bundan sonra Qarabağın statusu ilə bağlı danışıqlara başlanılsın. Onun hakimiyyətə gəlməsində də bu pozitiv mesajların böyük rolu olub. Onun apardığı gizli danışıqların motivi də, çox güman ki, bu istiqamətdə olub. Sonra məlum oldu ki, faktiki olaraq, Paşinyan bu prosesdə bütün tərəflərə yalan danışdığını sübut edən mövqe ortaya qoyub. Hesab edirəm ki, Paşinyan və onun komandasının apardığı gizli danışıqlarla onların öz daxili auditoriyalarına verdikləri mesajlarda daban-dabana zidd məqamlar var. Əminliklə demək olar ki, bu detallar açıqlansa, Paşinyan maksimum ilin sonuna qədər hakimiyyətini qoruya bilər”.
Paşinyanın bütün yalanlarının üstü açıldığı kimi, bu prosesin də onun hakimiyyətdən gedişini tezləşdirə biləcəyinə şübhə yeri qalmır.
Məhəmmədəli QƏRİBLİ
