23/10/2020 00:43
728 x 90

Etnik təmizləmə və təcavüzkarlıq edən ölkəyə pulsuz silahlar – İlham Əliyev Ermənistanı silahlandıranları BMT-də sərt vurdu...

Ramil Hüseynov: “Bəzi aparıcı dövlətlərin belə siyasət yeritməsi beynəlxalq hüquqa tüpürmək deməkdir”

img

“Biz Ermənistana artmaqda olan silah təchizatından ciddi narahatıq. Xüsusilə də Azərbaycanın Tovuz rayonu istiqamətində Ermənistan tərəfindən törədilmiş hərbi təxribatdan sonra”. Bu fikirləri Prezident İlham Əliyev BMT Baş Assambleyasının 75-ci sessiyasının ümumi debatlarında videoformatda çıxışında deyib.

Prezident qeyd edib ki, dövlət sərhədindəki toqquşmaların qaynar fazası iyulun 16-da sona çatıb: “Növbəti gün - iyulun 17-dən etibarən sentyabr ayına qədər biz hərbi yük təyyarələri ilə Ermənistana min tondan artıq hərbi avadanlığın daşınmasının şahidi olduq. Ermənistanın dünyanın ən yoxsul ölkələrindən biri olduğunu və silahlara milyardlarla dollar xərcləmək imkanına malik olmadığını nəzərə alsaq, silahların ona pulsuz verildiyi qənaətinə gələ bilərik.

Ölkə başçısı onu da qeyd edib ki, etnik təmizləmə aparmış işğalçı ölkənin silahlarla təchiz edilməsi sülh danışıqlarını ciddi şəkildə sarsıdır: “Və işğalçı dövləti yeni hərbi təxribatlara əl atmağa həvəsləndirir. Bu mənada biz bütün ölkələri Ermənistana silah təchizatından çəkinməyə çağırırıq”.

Göründüyü kimi, Prezident İlham Əliyev ən ali beynəlxalq tribunalardan biri olan BMT-də heç kimdən, heç nədən çəkinmədən Ermənistanın işğalçılıq siyasətini, yeni müharibə planlarını qətiyyətlə ifşa etdi. Bununla yanaşı, dünyada hökm sürən ikili standartlara müəlliflik edən dövlətlərə, Ermənistanı pulsuz silahlarla təchiz edən qüvvələrə mesaj verərək bunun yolverilməz olduğunu bildirdi.

  • “Təcavüzkar siyasət yeridən, etnik təmizləmə aparan ölkəni silahlandırmaq cinayətdir”

Məsələyə münasibət bildirən siyasi ekspert Ramil Hüseynovun sözlərinə görə, Prezident məlum çıxışı ilə həm Ermənistanın işğalçılıq siyasətini, həm də açıq və gizli şəkildə təcavüzkar ölkəni silahlandıran dövlətlərin fəaliyyətini ifşa etdi: “O baxımdan, ölkə başçısı çox cəsarətli mövqe ortaya qoyaraq həm BMT-ni, həm də Ermənistanı himayə edən dövlətləri fakt qarşısında qoydu. Açıq şəkildə bildirdi ki, Ermənistanı işğalçılığa həvəsləndirən məhz bu cür himayədarlıq siyasətidir. Ermənistan ən yoxsul ölkələrdən biridir. Təbii ki, sözügedən dövlət məhdud maliyyə imkanları ilə yeni silahlar əldə edə bilməz. Bu, dünən də belə idi, bu gün də belədir. Söhbət məhz Rusiyanın Ermənistanı pulsuz silahlandırmasından gedir. Özü də paradoksal olan həm də odur ki, münaqişənin həllində vasitəçilik missiyasında çıxış edən həmsədr ölkələrdən biri bunu edir. Belə olan halda, hansı beynəlxalq ədalətdən söhbət gedə bilər? Belə vəziyyətdə, heç şübhəsiz ki, Ermənistan təcavüzkar hərəkətlərindən əl çəkməyəcək. Bəzi aparıcı dövlətlərin belə siyasət yeritməsi beynəlxalq hüquqa tüpürmək deməkdir. Eyni zamanda, təcavüzkar siyasət yeridən, etnik təmizləmə aparan ölkəni silahlandırmaq cinayətdir. Buna başqa ad vermək çətindir”.

Siyasi ekspertin fikrincə, Ermənistanı himayə edən dövlətlərin beynəlxalq hüquqa az da olsa hörmətləri varsa, bundan nəticə çıxarmalıdırlar.

Vidadi ORDAHALLI

Son xəbərlər