Dövlət Dumasının MDB işləri üzrə Komitəsinin sədr müavini Konstantin Zatulin “Sputnik” radiosunun efirində Rusiyanın Ermənistana silah göndərilməsi ilə bağlı yalanını ifşa edib.
Bu yaxınlarda Rusiyadan Ermənistana hərbi texnika göndərilməsi ilə bağlı hadisəni şərh edən Zatulin deyib: “Məsələn, bu yaxınlarda Gürcüstan Rusiyanın müqavilə əsasında Gürcüstan ərazisindən tranzitlə keçirməyə çalışdığı hərbi texnikanın Ermənistana göndərilməsinin qarşısını alıb. Ermənistanın bizimlə ortaq sərhədi yoxdur. Gürcüstan bunu həyata keçirməyə imkan verməyib, buna görə ABŞ dövlət katibi Mayk Pompeo ona təşəkkür edib. Bu ötən həftə baş verib. Onun təşəkkürü açıq şəkildə ifadə olunub. Bir sözlə, Gürcüstan bizə maneə yaratmağa, ayağımızın altına daş qoymağa davam etdiyi halda hansı etimaddan və Rusiya ilə hansı münasibətlərdən danışmaq olar?!”.
Xatırladaq ki, Rusiyanın Ermənistana silah ötürməsi ilə bağlı Prezident İlham Əliyev səviyyəsində Rusiya rəhbərliyinə narahatlıq ifadə olunmuşdu. Sonra Rusiyanın bəzi rəsmi dairələri Ermənistana silah yox, tikinti materialı göndərildiyini bəyan etdi. Artıq Rusiyanın öz rəsmi şəxsləri belə bunu etiraf etmiş olurlar. Zatulinin açıqlaması Rusiyanın Ermənistana silah ötürdüyünün təsdiqi sayıla bilərmi?
Politoloq Elşən Mustafayev “Bakı-Xəbər”ə açıqlamasında bildirdi ki, Zatulinin açıqlamasında məhz həmin silah tədarükü nəzərdə tutulur: “Burada başqa əlamətlər nəzərə çarpmır. Zatulin Gürcüstana etdiyi narazılığın fonunda Rusiyanın Ermənistana silah göndərdiyini tam təsdiqləyir. Tovuz təxribatından sonra Rusiyadan Ermənistana hərbi təyinatlı yüklərin daşınmasının kəskin şəkildə artırması Azərbaycanda ciddi müzakirələrə səbəb olub. Rəsmi məlumata görə, Rusiya Tovuzdakı təxribatdan ötən 20 gün ərazində Ermənistana müasir silahlarla dolu 9 hərbi təyyarə (400 ton hərbi təyinatlı yük) göndərib. Hətta göndərilən marşrut da bəlli oldu. Məlum oldu ki, Rusiyanın İl-76TD hərbi-nəqliyyat təyyarələri Ermənistana silah daşımaq üçün Rostov-Mineralnıye Vodı-Aqtau-Türkmənbaşı-Novşəhr-Rəşt-Meğri-İrəvan marşrutunu seçib. Çünki Gürcüstan Azərbaycanın sərt reaksiyasından sonra Rusiyanın Ermənistana göndərdiyi silah-sursatın öz ərazisindən keçirilməsinə icazə verməyib. Rusiya Qazaxıstan-Türkmənistən-İran-Ermənistan marşrutundən istifadə etməyə məcbur olub. Azərbaycan cəmiyyətini narahat edən bu məsələ ölkə başçısı İlham Əliyevin Rusiya prezidentinə telefon zəngi zamanı geniş müzakirə olunub. İlham Əliyev Vladimir Putinə Azərbaycan ictimaiyyətinin narahatlığını çatdırıb. Maraqlıdır ki, sonra Rusiya rəsmiləri oradakı 102-ci hərbi bazalarına tikinti materialı göndərdiklərini bəyan etdilır. Bu çox gülməli arqument idi. Uçan təyyarələrin hərəkət trayektoriyası sübut edir ki, belə uzaq yolu qət etməklə yalnız bahalı bir yükü daşımaq olar. İlham Əliyev Yunanıstan səfirini qəbul edəndə də bildirdi ki, narazılıqlara baxmayaraq, Rusiya Ermənistana silah daşımağı davam etdirib. Zatulin bu məsələyə tam möhürünü vurdu. Bu rəsmi şəxsin dilindən təsdiqləndi ki, Rusiya Ermənistana tikinti materialı deyil, silah göndərib. Belə etiraf Rusiyanın ATƏT-in Minsk Qrupunun həmsədri kimi neytral olmadığını, açıq-aşkar Ermənistanın tərəfində olduğunu təsdiqləyir. Düşünürəm ki, Azərbaycan Minsk Qrupu formatından tam imtina etməlidir”.
Zatulinin bu etirafı bizim üçün iddialarımızın Rusiya tərəfindən rəsmən təsdiqi də sayıla bilər.
Məhəmmədəli QƏRİBLİ
