Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev xarici mediada və bəzi sosial şəbəkə profillərində guya Suriyadan Azərbaycana döyüşçülərin gətirilməsi barədə məlumatlara aydınlıq gətirərkən maraqlı mətləblərə toxunub:
“Birmənalı şəkildə qeyd etmək istərdim ki, bu, yalan və saxta məlumatdır. Bu məlumatın arxasında Ermənistanın xüsusi xidmət orqanları durur. Azərbaycan Silahlı Qüvvələri şəxsi heyətlə tam komplektləşdirilmişdir. Ordumuzun yüksək döyüş hazırlığı vardır və Ermənistanın hər bir təxribatının qarşısını almağa qadirdir. Muzdlulara və terrorçulara ehtiyacı olan məhz Ermənistan ordusudur. 90-cı illərdə Ermənistan-Azərbaycan münaqişəsinin aktiv fazasında Ermənistan Livan, Fransa, ABŞ vətəndaşı olan erməni terrorçularından muzdlu kimi istifadə etmişdir. Xocalı soyqırımının törədilməsində iştirak etmiş və muzdlu terrorçulardan ibarət Arabo və Aramo terrorçu dəstələrinin Ermənistan silahlı qüvvələrinin tərkibində xidmət etməsi faktdır. İndi də Ermənistan Livan və Suriyadan gətirilən erməni mənşəli şəxsləri muzdlu kimi Ermənistan silahlı qüvvələrinin tərkibinə daxil edir. Ermənistan tərəfi Yaxın Şərqdə digər istiqamət üzrə terrorçuların Azərbaycanın işğal olunmuş ərazilərinə gətirilməsi kanalları üzərində iş aparır”.
Göründüyü kimi, Hikmət Hacıyev Ermənistanın Yaxın Şərq ölkələri olan Suriya və Livandan terrorçuları cəlb etdiyini bildirməklə yanaşı, həm də həmin regionun digər istiqamətləri üzrə də terrorçuların cəlbinə çalışdığını bildirib. Maraqlıdır, Yaxın Şərqin digər istiqamətləri deyiləndə hansı ölkələr nəzərdə tutula bilər?
Təhlükəsizlik qurumlarının sabiq əməkdaşı, Azərbaycan Sosialist Partiyasının sədri Elşən Həsənov: “Hikmət Hacıyevin bildirdiyi fikirdə, əlbəttə ki, həqiqət öz əksini tapıb. Hələ 80-ci illərin axırı, 90-cı illərin əvvəllərindən ölkəyə Yaxın Şərq regionundan adlarını çəkdiyiniz ölkələrdən – Livan, Suriya, İraq, İran və digər ölkələrdən də yaraqlı muzdlular gətirilərək Azərbaycana qarşı döyüş əməliyyatlarında istifadə edilirdi. Ola bilər ki, ermənilər yenidən bu istiqamətləri nəzərdən keçirsinlər. Yaraqlılarla birlikdə, Azərbaycan əks-kəşfiyyat orqanlarında erməni əsilli adamların istər biznes şəbəkələri, istər jurnalist korpusu, istərsə də digər sahələri əhatə edən müxtəlif strukturlarda Azərbaycana qarşı siyasi kəşfiyyat, diversiya və s. sahələrdə də çoxlu sayda məlumatlar vardır. Ermənilərin məhz Yaxın Şərq ölkələri ərazisində yerləşən, həmən ölkələrin ərazilərində də döyüş təlimi keçən terror dəstələri zaman-zaman istər Azərbaycanda, istərsə də Türkiyə və başqa ölkələrin ərazisində istifadə edilməklə bərabər, həm də aktiv bölgələrdə döyüş əməliyyatlarına qatılırlar. Hikmət Hacıyevin daha hansı ölkələri nəzərdə tutduğunu deyə bilmərəm. Amma görünən budur ki, söylənilən fikir dəqiq məlumata əsaslanır”.
Dünya birliyi bu həyəcan təbilini nəzərə alıb, bölgə və dünya üçün təhdid mənbəyi olan prosesi dayandırmalıdır.
Məhəmmədəli QƏRİBLİ
