Son zamanlar Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu (KİVDF) tərəfindən mətbuatın inkişafı və jurnalistlərin öz peşə bacarıqlarını daha da təkmilləşdirməsi üçün müxtəlif layihələr həyata keçirilir.
Məlum olduğu kimi, KİVDF tərəfindən jurnalistlər üçün xarici təlimçilərin iştirakı ilə onlayn formatda təlimlər təşkil olunub.
Təlimlər Türkiyənin tanınmış media təlimçiləri – Marmara Universitetinin müəllimi, rəqəmsal media araşdırmaları, PR və kommunikasiya üzrə ekspert Dr. Ali Murat Kırık və “TRT”, “Kanal D”, “Star TV” televiziya kanalları, habelə bir sıra digər qabaqcıl informasiya agentliklərində zəngin təcrübəyə malik təlimçi-jurnalist Bora Balar tərəfindən keçirilib.
Qeyd edək ki, 10 sentyabr tarixində reallaşan 1-ci təlim “Müasir dövrdə mətbuatın əsas funksiyaları: məlumat istehsalı və emalı”, 11 sentyabrda isə “Rəqabətli xəbər istehsalı: xəbərin oxunaqlığının artırılması” mövzusunda 2-ci təlim Ali Murat Kırık tərəfindən aparılıb.
14 sentyabr tarixində “Müasir jurnalistika: rəqəmsal texnologiyalarla birlikdə dəyişən yeni dövrün jurnalistikası” mövzusunda keçirilən 3-cü təlimi və sentyabrın 15-də reallaşan “Jurnalistikada saxta xəbər problemi: “fake news” və “deep fake” mövzusunda 4-cü, sonuncu təlimi isə Bora Balar aparıb.
Sonuncu təlimdə müasir jurnalistikada saxta xəbər problemindən bəhs olunub, “fake news” və “deep fake” xəbərlərini müəyyən etməyin metodları barədə məlumat verilib, xəbər emalı zamanı diqqət tələb edən məqamlara aydınlıq gətirilib. Sonra adıçəkilən mövzu üzrə media nümayəndələrinin sualları cavablandırılıb.
KİVDF tərəfindən jurnalistlər üçün xarici təlimçilərin iştirakı ilə onlayn formatda keçirilən təlimlərə sentyabrın 15-də yekun vurulub.
Ümumilikdə, KİVDF tərəfindən hər birində 25 nəfər olmaqda 4 təlim keçirilib. Təlimlərdə televiziya, radio, onlayn media, qəzet və jurnalları təmsil edən jurnalistlər iştirak ediblər. Respublikanın regionlarında fəaliyyət göstərən media nümayəndələri də təşkil olunan təlimlərdə xüsusi fəallıqları ilə seçiliblər.
Sözügedən təlimdə iştirak edən həmkarlarımızla əlaqə saxlayıb onların təəssüratlarını öyrəndik.
KİVDF tərəfindən jurnalistlər üçün xarici təlimçilərin iştirakı ilə onlayn formatda keçirilən təlimləri necə qiymətləndirirlər? KİVDF-nin bu layihəsinə münasibətləri necədir, orada müasir medianın hansı yeni trendləri öyrədilib?
Gülşən Behbud: “Maraqlı və məhsuldar təlimlər üçün KİVDF-yə təşəkkür edirəm”
Təlimlərdə iştirak edən və sertifikat qazanan “RezonansPress.az” saytının rəhbəri, şairə-jurnalist Gülşən Behbud “Bakı-Xəbər”ə bildirdi ki, KİVDF tərəfindən təşkil edilən bu təlimin olduqca böyük əhəmiyyəti var. Müasir dövrün çağırışlarına uyğun şəkildə təşkil edilən təlimlərdə ölkənin bir sıra media qurumlarının əməkdaşlarının iştirak etdiyini qeyd edən G.Behbud hesab edir ki, belə təlimlər çağdaş jurnalistikanın inkişafı, jurnalistlərin peşəkarlığının artması üçün əhəmiyyətlidir. “Kütləvi İnformasiya Vasitələrinin İnkişafına Dövlət Dəstəyi Fondu tərəfindən çox maraqlı layihələr təşkil edilir və son təlim layihəsi də onlardan biridir. Türkiyənin tanınmış media təlimçisi – Marmara Universitetinin müəllimi, rəqəmsal media araşdırmaları, PR və kommunikasiya üzrə ekspert Dr. Ali Murat Kırık maraqlı və yaddaqalan fikirlər söylədi. Əslində, öyrənmək heç zaman gec deyil.
Maraqlı və məhsuldar təlimlər üçün KİVDF-yə təşəkkür edirəm və bu cür layihələrin davamlı şəkildə keçirilməsi Azərbaycan mətbuatının bütün sahələri üçün önəmli və gərəklidir. Cəmiyyət və zaman yüksək inkişaf mərhələsindədir. Bu mərhələdə hər sahə özünü inkişaf etdirməli, ortaya maraqlı iş qoymalıdır. Bu, zamanın tələbidir” - deyə G.Behbud bildirdi.
Aytən Novruz: “Xarici təlimçilərin iştirakı ilə təşkil olunan təlimdə ilk iştirakım idi”
“Publika.az”ın redaktoru Aytən Novruz da treninqlərdən razı qaldığını qeyd etdi: “KİVDF tərəfindən jurnalistlər üçün xarici təlimçilərin iştirakı ilə onlayn formatda təşkil edilən ikinci təlimdə iştirak etdim. “Rəqabətli xəbər istehsalı: xəbərin oxunaqlığının artırılması” mövzusunda reallaşan təlim Türkiyənin tanınmış media təlimçisi – Marmara Universitetinin müəllimi, rəqəmsal media araşdırmaları, PR və kommunikasiya üzrə ekspert Ali Murat Kırık tərəfindən təqdim olundu.
Ekspert rəqabətli xəbər istehsalının hazırlanması, xəbərin oxunaqlığının artırılması üsulları barədə ətraflı məlumat verdi. Bu istiqamətdə Türkiyə təcrübəsini bölüşdü. Bildirdi ki, şişirdilməyən başlıqla da xəbəri oxutmaq mümkündür (kriteriya istənilən ölkənin mediası üçün keçərlidir).
Eyni zamanda, xəbər yazarkən və ya reportaj hazırlayarkən texnoloji vasitələrdən düzgün istifadə qaydaları barədə danışdı. Qeyd etdi ki, Türkiyədə montaj bilməyən müxbir nə qədər professional olsa da, demək olar ki, işə qəbul edilmir. Təlimin sonunda mövzu üzrə suallarımız cavablandırıldı.
Ali Murat Kırıkın mövzu üzrə verdiyi maraqlı şərhlər 2 saat nəzərdə tutulmuş təlim müddətini xeyli uzatdı.
Xarici təlimçilərin iştirakı ilə təşkil olunan təlimdə ilk iştirakım idi, çox razı qaldım. Məhsuldar təlim üçün KİVDF-yə təşəkkür edirəm. KİVDF tərəfindən təlimlərin davamlı olaraq keçirilməsi nəzərdə tutulduğundan, yenidən iştirak etməyi düşünürəm” - deyə A.Novruz vurğuladı.
Pərvin Əsgərli: “...bu təlimlərin davamlı olmasına həqiqətən də böyük ehtiyac var”
Təlimlərə qatıldığı üçün KİVDF tərəfindən sertifikata layiq görülən digər həmkarımız ATV xəbərin jurnalisti və aparıcısı Pərvin Əsgərlidir. P.Əsgərli bizimlə söhbətində bildirdi ki, fondun jurnalistlər üçün xarici təlimçilərin iştirakı ilə keçirdiyi onlayn təlimlərdən ikisində iştirak edib. “İştirak etdiyim birinci təlim “Rəqabətli xəbər istehsalı: xəbərin oxunaqlığının artırılması”, ikinci təlim isə “Jurnalistikada saxta xəbər problemi: “fake news” və “deep fake” mövzusunda olan treninq idi. Hər iki təlim də türkiyəli mütəxəssislərin bələdçiliyi ilə keçdi və təlimlərdə, demək olar, bir neçə saat ərzində çağdaş jurnalistikada olan yeni trendlərdən xəbərdar olmağa çalışdıq. Mən özüm xəbər aparıcısı və xəbər jurnalisti olduğum üçün orada daha çox xəbərin hazırlanması məsələsinə diqqət yetirdim. Mən iştirak etdiyim təlimlərdə son zamanlar sosial şəbəkələrin daha aktivliyini nəzərə alaraq, televiziyada xəbər hazırlanmasında sosial şəbəkələrə istinad edilməsi, xəbərin mənbəyinin daha dəqiq olmasını müəyyən etmək üsulları, hərbi şəraitdə yaşayan bir ölkə vətəndaşı kimi hərbi xəbərlərin yayımlanması zamanı gözlənilməli olan bəzi məqamlarla bağlı sual verdim.
Qadınlara qarşı zorakılıqla, ölüm və qəzalarla bağlı xəbərlərin daha çox oxunmasının səbəbləri ilə əlaqədar təlim keçən mütəxəssislərə suallar ünvanladım. Təbii ki, türkiyəli mütəxəssislər də suala cavab verdilər. Ümumiyyətlə, orada çox mövzu müzakirə olundu, mən də qeydlərimi apardım. Xəbərin hazırlanması zamanı şəxslərə müraciətlər necə olmalıdır? Təlimçilər bildirdilər ki, xəbərin hazırlanması zamanı jurnalist mümkün qədər tərəfsiz olmalı, xəbəri xəbər kimi verməlidir. Türkiyəli mütəxəssis Ali bəy vurğuladı ki, xəbərdə hansısa şəxsin adının əvvəlinə “hörmətli”, “xanım” və digər müraciət formalarının əlavə edilməsi yolverilməzdir. Jurnalistika fakültəsində oxumuşam. Belə təlimlər haqqında isə sonuncu dəfə bir neçə il bundan əvvəl jurnalistika fakültəsində Amerika mütəxəssislərinin iştirakı ilə keçirilən təlim haqqında məlumat almışdım. KİVDF-yə təşəkkür edirik ki, jurnalistlər üçün belə təlimlər keçirdi. İştirak etdiyim təlimlərdən razı qaldım və bu təlimlərin davamlı olmasına həqiqətən də böyük ehtiyac var. Ümid edirəm ki, bu təlimlər davamlı olacaq” - deyə P.Əsgərli bildirdi.
İradə SARIYEVA
