Yadigar Məmmədli: “...davamlı maarifləndirmə işi aparılmalıdır”
Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev müsahibəsində bildirib ki, gənclər arasında sosial şəbəkələrin ziyanlı təsirlərindən qorunmaq üçün maarifləndirmənin artırılmasına ehtiyac var.
“Ümumiyyətlə, ölkəmizin sosial şəbəkə seqmentində bəzi davranış və ifadə tərzi, qeyri-peşəkar və məsuliyyətsiz şərhlər, saxta və yalan məlumatların yayılması tezliyi və intensivliyi, ordunun fəaliyyəti haqqında paylaşımlar ciddi narahatlıq doğurur. Birmənalı şəkildə başa düşülməlidir ki, hər hansı fərdin sosial şəbəkələrdə paylaşdığı məlumat və ya xəbər yoxlanılmamış, yanlış, qərəzli və təhrikçi ola bilər. Bəzən iş o həddə çatır ki, peşəkar media araşdırmadan sosial şəbəkədə yayılmış xəbərə istinad edir. Qeyd olunanlar sosial şəbəkələrin müsbət tərəflərini inkar etmir. Bu problem bütün dünyada mövcuddur. İlk növbədə, ölkə ictimaiyyətində, xüsusilə gənclər arasında sosial şəbəkə maarifləndirilməsinin artırılmasına ehtiyac var. Bu da onlarda sosial şəbəkələrin zərərli təsirlərindən qorunmaq üçün intellektual immuniteti artıra bilər. Sosial şəbəkələri təsis edən böyük şirkətlər də öz məsuliyyətlərini başa düşməli və yalnız müəyyən etdikləri süni intellektin imkanları daxilində bu problemə baxmamalı, sosial şəbəkələrdə cərəyan edən neqativ tendensiyalara qarşı effektiv tənzimləyici mexanizmlər təqdim etməlidirlər”.
Ümumiyyətlə, sosial şəbəkələrin ziyanlı informasiya təsirlərindən cəmiyyəti, gəncliyi, xüsusilə indiki şəraitdə ordumuzu, orada xidmət edən hərbçiləri qorumaq üçün nə etmək lazımdır?
- “Çünki bəzən adi görünən məsələ çox ciddi fəsad verə bilər”
Məsələyə münasibət bildirən media eksperti, Demokratik Jurnalistlər Liqasının rəhbəri Yadigar Məmmədlinin sözlərinə görə, sosial şəbəkələrin ziyanlı təsirlərindən qorunmaq üçün davamlı maarifləndirmə işi aparılmalıdır: “Bu gün sosial şəbəkələrin təsiri çox böyükdür. Bir sıra məsələlərin ictimailəşməsində, məlumatların tez yayılmasında sosial şəbəkələr əlahiddə platformadır. O da məlumdur ki, gənclər sosial şəbəkələrin daha çox təsiri altındadırlar. Müəyyən ziyanlı vərdişlərə yiyələnirlər. Yəni ölkəmizə yönəlik aparılan antitəbliğat işlərinə daha tez uyurlar. Ona görə də bu çox təhlükəli tendensiyadır və gəncləri bundan qorumaq lazımdır. Davamlı olaraq gənclər arasında təbliğat işi aparılmalıdır. Yəni daha çox məlumatlandırma işi aparılmalıdır ki, gənclər sosial şəbəkələrin ziyanlı təsiri altına düşməsinlər. Çünki belə təbliğatlar millətimizə, dövlətimizə yönəlik təhdid xarakterli ola bilər. Ona görə də gənclər arasında daim maarifləndirmə işi aparılmalıdır. Maarifləndirmə ümumtəhsil məktəblərində, ali təhsil ocaqlarında aparılmalıdır. Gənclərə sosial şəbəkələrin üstünlükləri və ziyanlı tərəfləri barədə mütəmadi məlumat verilməlidir. Çünki bəzən adi görünən məsələ çox ciddi fəsad verə bilər. Biz bunu ölkənin müxtəlif çətin vaxtlarında görmüşük”.
Ekspertin fikrincə, sözügedən məsələdə nə qədər ayıq olsaq, bu bir o qədər bizim xeyrimizə olacaq.
Vidadi ORDAHALLI
