İşağlçı Ermənistan, cəbhədə olduğu kimi, informasiya müharibəsində də təxribata əl atır. Görünən budur ki, ermənilərin kəşfiyyat-təxribat qrupu təkcə cəbhədə deyil, sosial şəbəkələr vasitəsilə də çaşqınlıq yaratmaqda maraqlıdır. Onlar sosial şəbəkələrdə saxta hesab açaraq müxtəlif dezinformasiyalar yayırlar. Düşmənin tək məqsədi xalq arasında çaşqınlıq yaratmaqdır.
İyul ayında Tovuzda gedən döyüşlərdə də bu kimi hallar baş vermişdi. Votsap və digər ünsiyyət vasitələrində səs yayaraq bildirmişdilər ki, guya hərbi hissə partladılıb və əsgərlərimiz kütləvi şəkildə həlak olub. Aydın məsələdir ki, münaqişə davam etdiyi müddətdə erməni təxribatlarının davamı da gələcək. Buna görə də sosial şəbəkə istifadəçiləri bu məsələdə çox diqqətli olmalı, xüsusən də ordumuzla bağlı yayılan məlumatlara rəsmi açıqlama olmadan istinad etməməlidir.
Məsələn, erməni Alen Qulyan. Bu şəxs Ermənistan Müdafiə Nazirliyinin ştatlı dezinformatorudur. O, hər fürsətdə müxtəlif saxta məlumatlar yayaraq çaşqınlıq yaratmağa çalışır. Özünü bloqqer adlandıran Qulyan son olaraq iddia edib ki, guya Suriyadan Azərbaycana döyüşmək üçün 300 şəxs göndərilib və onların hər birinə aylıq 2000 dollar maaş veriləcək. Halbuki, ermənilər muzdlu döyüşçü yığmaqla bu prosesi işğal etdikləri Dağlıq Qarabağda həyata keçirirlər.
Azərbaycana qarşı təxribata cəhd göstərənlərdən biri də din bayrağı altına sığınan Tohid İbrahimbəylidir. Daima Azərbaycan dövlətçiliyi əleyhinə radikal çağırışlar edən Tohid İbrahimbəyli 2017-ci ilin yanvarında “nur-az.com” internet saytı vasitəsilə Elmar Vəliyevin öldürülməsinə çağırış etməsi ilə yadda qalıb. Bu şəxslə yanaşı, İbrahimli Həbib Əkbər oğlu, Musayev Pərviz Əlimusa oğlu, Ziyadov Elmir Savadxan oğlu 2013-2016-cı illər ərzində Suriya ərazisindəki döyüşlərdə iştirak etmək üçün bu ölkəyə gediblər. DTX-nın 2018-ci ildə yaydığı məlumata əsasən, onlar qanunsuz silahlı birləşmələrin tərkibində vuruşublar. Çox maraqlıdır ki, bu dönəmdə Tohidin rəhbərlik etdiyi sayt və səhifələr yenidən fəallaşıb. Xüsusilə də Türkiyə ilə Azərbaycanın hərbi əməkdaşlığı və ölkəmizdə ehtiyat zabitlərin orduda təlimlərə çağırılması ilə bağlı həqiqətə uyğun olmayan informasiyalar tirajlayırlar. Bizi təəccübləndirən bu cür şəxslərin yaxın qonşumuz olan İranda gizlənərək bu təxribataları həyata keçirmələridir. İran dövləti deyə bilər ki, bunlar müstəqil blogerlərdir, şəxsi fikirlərini ifadə edirlər. Amma bu, əsaslı arqument deyil. Çünki onların çoxu Azərbaycanda axtarışdadır və apardıqları təbliğat sırf Azərbaycan dövlətçiliyi əleyhinədir. İranın bu məsələdə üzərinə hansı öhdəlik düşür?
AMİP Mərkəzi Şurasının sədri Rəşad Bayramov “Bakı-Xəbər”ə açıqlamasında bildirdi ki, bu məsələ ilə bağlı ciddi narahatlıq var: “Hətta DTX bununla bağlı əhaliyə müraciət etdi. Həmin müraciət əsasən gizli profillərlə bağlı idi. Sizin dediyiniz məsələdə isə mövzu konkretdir. İslam pərdəsi arxasında gizlənən bəzi təxribatçılar ölkəmizə qarşı zərərli təbliğat aparırlar. Təəssüflə qeyd etməliyik ki, açıq təxribatlar həm də bizə qonşu olan İran üzərindən aparılır. Tohid İbrahimbəylinin bütün fəaliyyəti Azərbaycan əleyhinə yönəlib. Ölkəmiz üçün ən həssas məqamlarda o öz ziyanlı təbliğatı ilə ictimai rəyi çaşdırıb. İndi də həmin yönlü təbliğatını davam etdirir. Yaxşı olar ki, İran rəsmiləri bu məsələdə həssaslıq nümayiş etdirsinlər. İslam pərdəsi arxasında gizlənən bu şəxs sırf ermənilərin marağına qulluq edir. Belə zərərli fəaliyyətlər iki ölkə arasındakı qonşuluq münasibətlərinə də xələl gətirmiş olur. İslam atributlarını təhqir edən bir ölkəyə dəstək verən şəxs heç dindar parametrlərinə də uyğun gəlmir. İran Tohid kimi təxribatçıların fəaliyyətinə son qoymaqla bağlı addımlar atmalıdır”.
Çox təəssüflə qeyd etməliyik ki, dini libasda meydana çıxan bu adamlar təbliğatı altına bəzi vətəndaşlarımızı da sala bilir. Buna görə də belə şarlatanlara inanmamalıyıq.
Məhəmmədəli QƏRİBLİ
