Məhəmməd Əsədullazadə: “Paşinyanın bütün cəhdlərinə baxmayaraq, bu görüşlər baş tutmayacaq”
“Qraparak” qəzeti yazır ki, ABŞ rəsmiləri yüksək səviyyəli görüşlərdə maraqlı deyillər. Buna baxmayaraq, Ermənistan hakimiyyəti, nəyin bahasına olursa-olsun, oktyabrın əvvəlində Mnatsakanyan-Pompeo görüşünü təşkil etməyə çalışır.
Paşinyan oktyabrın əvvəlində Mnatsakanyan-Pompeo görüşünü təşkil etmək üçün hətta lobbiçi keçmiş senatora pul ödəyib: “Göründüyü kimi, Nikol Paşinyan erməni-amerikan zirvə görüşlərinin olmamasına çox sərt yanaşır və Xarici İşlər naziri Zohrab Mnatsakanyana ABŞ Dövlət katibi Mike Pompeo ilə görüşmək üçün mümkün olan hər şeyi etməyi tapşırıb. Bu görüşü təşkil etmək üçün XİN-in, Ermənistanın Vaşinqtondakı səfirliyinin, erməni lobbiçilərinin və cəmiyyətin qüvvələri səfərbər edilib. Üstəlik, Ermənistan səfirliyi ABŞ Dövlət katibi ilə görüş təşkil etmək üçün amerikalı lobbiçiləri işə götürüb və onlara dövlət büdcəsindən böyük məbləğlər ödəyib. Bunlardan biri keçmiş senator, 97 yaşlı Bob Douldur. Paşinyan bu görüşün baş tutmayacağından çox narahatdır”.
Belə məlum olur ki, Birləşmiş Ştatlar rəsmiləri, əvvəlki kimi, Ermənistanla yüksək səviyyəli görüşlərdə maraqlı deyillər. Vəziyyət o yerə gəlib çatıb ki, Paşinyan korrupsiya yolu ilə buna nail olmağa çalışır.
- “...ABŞ əmin oldu ki, bu ölkə ilə danışmağa dəyməz”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu: “Ermənistan hakimiyyətinin iki il ərzində həyata keçirdiyi siyasət Vaşinqton tərəfindən müsbət qarşılanmadı. Bunun səbəbi Paşinyanin iki stulda oturmaq siyasətidir. ABŞ Paşinyandan regionda işğala son qoyması və Rusiyanın ölkəsindən çıxarılmasında maraqlı olub. Ancaq Paşinyan nəinki bunlara doğru getmədi, əksinə, regionda vəziyyəti mürəkkəbləşdirmək yolunu tutdu. Bu da, nəticə etibarilə, Ermənistanın Rusiyadan asılılığını artırdı. Ona görə də Paşinyan ABŞ üçün arzuolunmaz şəxsdir. ABŞ gördü ki, Ermənistanin siyasi palitrasinda Paşinyan Rusiyanın forpostu kimi ölkəsini idarə edəcək. Ona görə də yüksək səviyyəli görüşlərə maraq göstərmir. Hesab edirəm belə olan təqdirdə, təbii ki, Vaşinqton Paşinyanla nəyi müzakirə edəcək ki? Ona görə də ABŞ üçün bu önəmlidir və vaxt itkisinə getmir. Paşinyanın bütün cəhdlərinə baxmayaraq, bu görüşlər baş tutmayacaq. Çünki Ermənistan Rusiyanın nəzarətindədir və ABŞ əmin oldu ki, bu ölkə ilə danışmağa dəyməz”.
Politoloqun fikrincə, bundan sonra da təmaslar yüksək səviyyədə olmayacaq.
Vidadi ORDAHALLI
