29/10/2020 16:53
728 x 90

Qüdrət Həsənquliyevin suçu nə? - Məlum açıqlama rəsmi strukturları niyə narahat etdi...

Ramil Məmmədli: “Dövlətin qurumlarının məsələyə münasibətilə fərdi şəxslərin baxışları arasında fərqin olması tam təbiidir”

img

Milli Məclisin deputatı Qüdrət Həsənquliyevin “Əsgərlərimiz Paşinyanın arvadını əsir götürəcəkləri günü səbrsizliklə gözləyir” fikirləri ciddi reaksiyalara səbəb olub. Müdafiə Nazirliyi deputat, Bütöv Azərbaycan Xalq Cəbhəsi Partiyasının (BAXJP) sədri Qüdrət Həsənquliyevin həmin sözləri ilə bağlı açıqlama yayıb.

Nazirlik bildirir ki, bu cür fikirlərin səsləndirilməsi Azərbaycan xalqının milli adət-ənənələri, xüsusiyyətləri və mənəvi dəyərlərinə, xüsusilə Azərbaycan əsgərinin döyüş əzmi və nizam-intizamına, ümumilikdə, hərbi qanunlara ziddir:

"Azərbaycanın mülki əhalisinə - qadınlara, uşaqlara və ahıllara qarşı daim vəhşilik nümayiş etdirmiş düşməndən fərqli olaraq, Azərbaycan Ordusu hər zaman beynəlxalq hüquq normaları çərçivəsində hərəkət edir. Xocalı faciəsi, 2016-cı ilin "Aprel hadisələri" zamanı mülki şəxslərin, 2017-ci ilin iyulunda azyaşlı Zəhra və onun nənəsinin, eləcə də 2020-ci ilin iyulunda 76 yaşlı kənd sakini Əziz Əzizovun qətlə yetirilməsi və digər qanunsuz qətllər Ermənistanın beynəlxalq humanitar hüququn təməl prinsip və normalarını kobud pozmasının bariz nümunəsidir. Azərbaycan Ordusunun yalnız bir məqsədi var - işğal olunmuş ərazilərimizi azad etmək. Ordumuz bu məqsədə çatmaq üçün tam hazırdır”.

Azərbayan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev də deputatın fikirlərinə reaksiya verib. Prezidentin köməkçisi bildirib ki, Azərbaycan ordusu qadın, uşaq və yaşlılarla müharibə aparmır: "Əgər Qüdrət Həsənquliyev dövlət məmuru olsaydı, Prezident tərəfindən cəzalandırılardı". O deyib ki, Milli Məclis deputatla bağlı qanunda təsbit olunmuş qaydada müvafiq tədbirlər görə bilər: "Ümid edirik ki, hakimiyyətin qanunverici qanadı olan Milli Məclis tərəfindən qanunda təsbit olunmuş qaydada müvafiq tədbirlər görüləcək. Qadın, uşaq və yaşlı insanlara qarşı müharibə aparan və onları hədəfə alan məhz Ermənistan silahlı qüvvələridir. 2016-cı ilin aprel döyüşlərində, bu il 12 iyulda Ermənistan-Azərbaycan dövlət sərhədinin Tovuz istiqamətində baş vermiş toqquşma zamanı biz bir daha bunun şahidi olduq".

Milli Məclisin (MM) İntizam komissiyasının katibi Nurlan Həsənov isə bildirib ki, Milli Məclisin İntizam komissiyasının üzvləri bununla bağlı məsləhətləşmə apararaq məsələyə baxa bilər.

Göründüyü kimi, Qüdrət Həsənquliyevin məlum fikirlərini rəsmi qurumlar normal qarşılamayıb. Maraqlıdır, həmin açıqlamada rəsmi qurumları daha çox hansı məqamlar narahat edib?

Hərbi-siyasi ekspert Ramil Məmmədli də “Bakı-Xəbər”ə açıqlamasında bildirdi ki, BAXCP sədri Qüdrət Həsənquliyevin Nikol Paşinyanın arvadı ilə bağlı söylədiyi fikirlərə reaksiyalar birmənalı olmadı: “Prezident Administarsiyası və Müdafiə Nazirliyinin məsələyə verdiyi reaksiyada Qüdrət Həsənquliyevin fikirləri kəskin tənqid edilib. Azərbaycanın rəsmi qurumlarının məsələyə bu şəkildə reaksiya bildirməsi anlaşılandır. Digər tərəfdən isə bu, bir partiya sədrinin fikirlərindən çıxarılan beynəlxalq nəticələrlə bağlı ola bilər. Amma nəzərə almalıyıq ki, hansısa partiya sədrinin fikrinə görə Azərbaycan dövlətinə hər hansı irad bildirilə bilməz. Bu onun partiyasının şəxsi mövqeyidir ki, onunla razılaşıb-razılaşmamaq olar. Qüdrət Həsənquliyevin bu fikri söyləməsinə səbəb olan amillərdən biri də Anna Akopyanın müəmmalı davranışlarıdır. Artıq neçənci dəfədir ki, o, əlində silah işğal olunmuş ərazilərdə poz verib, fotolar çəkdirir.  Bu hərəkətlər hər bir azərbaycanlıda ikrah hissi doğura bilər. Hesab edirəm ki, rəsmi qurumları narahat edən bir istiqamət də bizim milli-mənəvi dəyərlərimizlə bağlıdır. Hesab olunur ki, Azərbaycan əsgəri kişi ilə döyüşməlidir, Anna Akopyan isə qadın və mülki şəxsdir.  Yaxşı olardı ki, həmin qadın sülh çağırışı olan mülki tədbirlər təşkil edəydi. Belə olan təqdirdə, onun adı bu cür mövzuda hallanmazdı. Azərbaycan əsgərinə tuşlanan silah birmənalı qarşılanmır. Dövlətin qurumlarının məsələyə münasibətilə fərdi şəxslərin baxışları arasında fərqin olması tam təbiidir. Biz erməni vəhşiliyini çox görmüşük. Ancaq bu o anlama gəlmir ki, onların qadınlara, uşaqlara qarşı etdikıərini biz də təkrar etməliyik. Bir qədər həssas mövzu olduğu üçün məsələyə birmənalı cavab vermək çətindir”.

Bu cür həssas məsələlərlə bağlı münasibətin birmənalı olmadığını təbii qarşılamaq lazımdır.

Məhəmmədəli QƏRİBLİ

Son xəbərlər