“Ermənistan qoşunların təmas xətti və Ermənistan-Azərbaycan sərhədi boyunca mülki əhalini qəsdən hədəf alır və təxribatlar törədir. Ermənistan sonuncu təxribat aktını iyul ayında Ermənistan-Azərbaycan sərhədində törətdi. Azərbaycanın Tovuz rayonunun artilleriya atəşinə məruz qalması nəticəsində hərbçilərimiz və bir mülki şəxsimiz öldürüldü, mülki infrastruktura ciddi zərər vuruldu...”
Bu fikirləri sentyabrın 21-də BMT Baş Assambleyasının 75-ci sessiyası çərçivəsində BMT-nin 75 illiyinə həsr edilmiş Yüksək Səviyyəli İclas zamanı videoformatda çıxış edən Prezident İlham Əliyev deyib.
Azərbaycan Prezidentinin səsləndirdiyi fikirlərin arxasında çox ciddi faktlar durur və Ermənistan dövlətinin əsas hədəfi Azərbaycanın mülki əhalisidir.
Fakt budur ki, separatçı Ermənistan dövləti Azərbaycana qarşı ardıcıl olaraq terror əməllərini davam etdirir. Bütün beynəlxalq konvensiyaların, qanunvericiliyin tələblərini pozan Ermənistanın əsas hədəfi Azərbaycanın mülki əhalisidir. Həm müharibə dövründə, həm də atəşkəsdən sonrakı dövrlərdə terror fəaliyyətini davam etdirən Ermənistan ordusu bir hissəsi uşaq olmaqla, Azərbaycanın onlarla mülki şəxsini qətlə yetirib. Ermənilərin minaladığı ərazilərdə mülki sakinlər, o cümlədən, uşaqlar minaya düşərək həlak, yaxud da şikəst olurlar. Bundan başqa, ermənilər uşaqları cəlb etmək üçün oyuncaq formasında partlayıcı maddələrdən istifadə edirlər. 2011-ci il iyulun 15-də ermənilər tərəfindən Əlibəyli kəndinə daxil olan Tovuz çayına buraxılmış partlayıcı qurğu quraşdırılmış "itəbənzər" uşaq oyuncağını ərazidə oynayan Cəfərov Elsəvər Həsən oğlu və Şahmalıyeva Aygün Zirəddin qızı taparaq evə gətirib və "oyuncaq”la oynayan zaman partlayış baş verib, nəticədə 13 yaşlı Şahmalıyeva Aygün həlak olub, anası isə yaralanıb. Yenə həmin il martın 8-də Ağdamın işğal olunmuş Şıxlar kəndi istiqamətində erməni snayperinin atəş açması nəticəsində başından ağır yaralanan Orta Qərvənd kənd sakini, 9 yaşlı Fariz Bədəlov həyatını itirib. 2015-ci il aprelin 4-ü axşam saatlarında Ermənistan silahlı qüvvələrinin Ağdamın cəbhə xəttindən xeyli uzaqda yerləşən Üçoğlan kəndini reaktiv artilleriyadan və toplardan atəşə tutması nəticəsində 16 yaşlı Pakizə Məhərrəmli baş nahiyəsindən yaralandı. 2016-cı il aprelin 4-də düşmən Ağdam rayonunun Əhmədağalı kəndini atəşə tutan zaman Dadaşov Qaraş Şahlar oğlu qoyunlarını otararkən həlak oldu. 2016-cı il aprelin 5-də erməni silahlı qüvvələrinin atəşkəsi pozması nəticəsində Tərtər rayonunun Həsənqaya kənd sakini, 16 yaşlı Turanə Həsənova dünyasını dəyişib. 2016-cı il iyulun 14-də erməni silahlı bölmələrinin açdığı atəş nəticəsində Tovuzun Ermənistanla təmas xəttində yerləşən Əlibəyli kəndində 12 yaşlı Nərmin Xanbabayeva, onun 8 yaşlı qardaşı Tuncay ağır yaralanıblar. 2017-ci il iyulun 4-də Füzuli rayonunun Alxanlı kəndinin atəşə tutulması nəticəsində 2015-ci il təvəllüdlü 2 yaşlı Quliyeva Zəhra Elnur qızı və nənəsi həlak oldular. 2017-ci il avqustun 8-də Ermənistan silahlı qüvvələrinin Tovuz rayonunun Qaralar kəndini atəşə tutması nəticəsində 2004-cü il təvəllüdlü 13 yaşlı Ramin Yusifov ağır yaralanıb. 2016-cı il aprelin 4-də isə Ermənistan silahlı qüvvələrinin atdığı atəş nəticəsində Ağdamda 1 mülki şəxsi öldürülüb, 4-ü yaralanıb.
Belə ki, həmin tarixdə rayonun Sarıçoban kəndinin ərazisinə düşmüş 3 ədəd mərminin partlaması nəticəsində kənd sakini, 1968-ci il təvəllüdlü Cəfərov İlqar Hidayət oğlu qəlpə yarası xəsarəti alıb. Rayonun Əhmədağalı kəndinin ərazisində yerləşən məscidin yaxınlığına düşmüş mərminin partlaması nəticəsində orada qoyun otaran kənd sakini, 1954-cü il təvəllüdlü Dadaşov Qaraş Şahmar oğlu isə qəlpə yarası xəsarətləri alaraq hadisə yerində ölüb, 30-a qədər qoyun-quzu tələf olub.
Rayonun Orta Qərvənd kəndinin ərazisinə atılmış mərminin partlaması nəticəsində kənd sakini, 1989-cu il təvəllüdlü Heydərov Rəşad Qulu oğlu və 1968-ci il təvəllüdlü Heydərov Fərhad Lənkəran oğlu qəlpə yarası xəsarətləri alıblar. Qaradağlı kəndinin ərazisində mərminin partlaması nəticəsində rayon dövlət yanğın mühafizə hissəsinin manqa komandiri, 1974-cü il təvəllüdlü Mustafayev Akif Musa oğlu qəlpə yarası xəsarətləri alıb.
2020-ci ilin 12 iyul tarixində Azərbaycan-Ermənistan dövlət sərhəddində ermənilərin həyata keçirdiyi təxribat zamanı Tovuz rayonu istiqamətində mülki əhali və yaşayış məntəqələri də atəşə tutulub, 14 iyul 2020-ci il tarixində Ermənistan silahlı qüvvələri tərəfindən açılmış artilleriya atəşi nəticəsində mülki şəxs - Tovuz rayonunun Ağdam kəndinin sakini, 1944-cü il təvəllüdlü (76 yaş) Əzizov Əziz İzzət oğlu həlak olub.
Bildiyimiz kimi, Prezident BMT-nin tribunasından açıq bildirdi ki, Ermənistan bizim dinc əhaliyə qarşı müharibə aparır, işğalçı ölkə qəsdən təmas xəttində əhalini öldürür, qətlə yetirir. Ermənistanın bu sayaq cinayətləri niyə cavabsız qalır?
Əsli Kazımova: “Cənab Prezident doğru vurğulayır ki, ermənilərin hədəfi mülki əhalidir”
Azərbaycan Sosial Rifah Partiyasının sədri Əsli Kazımova “Bakı-Xəbər”ə şərhində məsələyə bu cür yanaşma sərgilədi. “Cənab Prezidentin “Ermənilər təkbaşına bizim torpaqlarımızı işğal edə bilməzdilər” fikri, əslində, hər kəsin bilib, amma deməyə cürət etmədiyi bir fikirdir”.
Onun sözlərinə görə, cənab Prezidentin bu mesajı ermənilərin sahiblərinə ünvanlanmış bir mesaj idi: “Bu isə, birmənalı olaraq, Azərbaycanın güc göstərisi kimi də dəyərləndirilə bilər. Çünki bu mesaj eyni zamanda gücümüzü, həmçinin, siyasətimizin müstəqillik dərəcəsini əks etdirməklə, Azərbaycanın həm də Ermənistanı savaş meydanına təkbətək çağırışı kimi də qəbul oluna bilər. Ermənistan son zamanlar aqressiya nümayiş etdirməklə danışıqlar prosesini pozmağa davam edir. Tovuz hadisələrindən sonra əsgərimizin erməni gülləsi ilə şəhid olması faktları qarşısında Azərbaycan susmayacaq. Bunu cənab Prezident də öz çıxışlarında dəfələrlə qeyd edir. Sülh və diplomatik üsullara sadiq olan Azərbaycan Ermənistanın öz işğalçılıq prinsiplərini davam etdirdiyi sürəcə, təcavüzkar və məkrli siyasətlərindən əl çəkmədiyi təqdirdə mümkün müharibəni inkar etməyəcək. Cənab Prezidentin də dediyi kimi, torpaqlarımızın bir qarışını belə ermənilərə güzəştə getməyəcəyik. Rəsmi İrəvandan fərqli olaraq, nə qardaş Türkiyə, nə də Azərbaycan ermənilərin etnik təmizlənməsini aparmaq niyyətində deyil. Türkiyə Prezidenti sayın Ərdoğanın dediyi kimi, “Biz bir türk olaraq, hər zaman məzlumun yanındayıq”. İllərlə torpaqsız və vətənsiz erməniyə torpaqlarımızda məskunlaşmağa izn vermişik. Bu gün də Bakıda Azərbaycan vətəndaşı olan erməni əsilli insanlar var. Azərbaycan hökuməti heç bir zaman milli və etnik ayrıseçkiliyə yol verməyib. Bu gün Bakıda yaşayan ermənilər də eynən Azərbaycan vətəndaşları qədər hüquq bərabərliyinə malikdirlər. Amma gəlin baxaq, Ermənistanda bir nəfər belə olsa azərbaycanlı tapmaq mümkündürmü? Bu gün erməni əsilli insanlarla azərbaycanlıların evləndiyini, ailə qurduğunu belə müşahidə edirik. Biz erməni xalqının məhvini istəmirik. Biz, sadəcə, torpaqlarımızı geri qaytarmaq istəyirik. Biz regionda sülh və əmin-amanlıq istəyirik. Ermənilər isə bu gün atəşkəsi pozaraq, sözün əsl mənasında, mülki şəxsləri hədəf alırlar. Tovuz hadisələri zamanı 76 yaşlı insanı qətlə yetirib erməni hərbçiləri. 92-ci ildə də Xocalı soyqırımı zamanı hədəf yaşlılar və uşaqlar idi. 30 ildir dəyişən heç bir şey yoxdur. Cənab Prezident doğru vurğulayır ki, ermənilərin hədəfi mülki əhalidir, beynəlxalq təşkilatlar bu kimi məsələləri diqqətə almalıdırlar. İkili standartlarla 30 ili yola verdilər. Amma Azərbaycan növbəti 30 il ikili standartları qəbul etməyəcək. Bu gün rəsmi İrəvandan 30 ilin hesabını sormaq gərəkdir. Hesab edirəm, bu təklifə həm millət vəkillərimiz, həm də siyasi partiyalarımız dəstək verəcəklər. Bu gün status-kvo-nu saxlamaq istəyən Ermənistan Azərbaycan tərəfinə verdiyi ziyanlara görə təzminat ödəməyə başlamalıdır. İşğalçı Ermənistanın BMT-nin Təhlükəsizlik Şurasında təmsil olunmasına veto və 4 qətnamənin yerinə yetirilməsi öhdəliyi qoyulmalıdır. Hesab edirəm, Azərbaycanın bu iki məsələni realizə etməyə həm beynəlxalq siyasi nüfuzu, həm də iradəsi yetər!”
Şakir Ağayev: “Prezidentin BMT-nin tribunasında bu fikirləri səsləndirməsi beynəlxalq birliyin Ermənistana qarşı tədbirlər görməsinə bir çağırış idi”
“Novoye vremya” qəzetinin baş redaktoru Şakir Ağayev bildirdi ki, Prezident İlham Əliyev BMT-nin sözügedən iclasında həm Qoşulmama Hərəkatının rəhbəri, həm də Azərbaycan Prezidenti kimi çıxış edib. “Azərbaycan Prezidentinin çıxışının əsas mövzusu Ermənistan-Azərbaycan Dağlıq Qarabağ probleminə həsr edilib. Prezident açıq şəkildə göstərdi ki, Ermənistanın bizim mülki əhaliyə qarşı törətdiyi cinayətlər, bu ölkənin əl atdığı terror aktları beynəlxalq hüquq qaydalarına ziddir. Ermənistan artıq işğal altında saxladığı ərazilərimizdə yox, təmas xəttində təxribatlar törədir, cəbhəyanı yaşayış məntəqələrimizi atəşə tutur, dinc əhalini qətlə yetirir. Ölkə başçısının səsləndirdiyi bütün fikirlərin arxasında danılmaz faktlar, təkzibolunmaz sübutlar dayanır. Erməni silahlı qüvvələri indiyə kimi onlarla mülki sakinimizi qətlə yetiriblər. Tovuz hadisələri zamanı 76 yaşlı ağsaqqalın ermənilər tərəfindən qətlə yetirildiyini misal çəkdi. Buna qədər də Ermənistan ordusu Azərbaycanın mülki şəxslərini hədəfə alıb, qətlə yetirib. Prezidentin BMT-nin tribunasında bu fikirləri səsləndirməsi beynəlxalq birliyin Ermənistana qarşı tədbirlər görməsinə bir çağırış idi. Beynəlxalq birlik artıq ikili standartlara son qoyaraq beynəlxalq qanunlara əməl etməyən Ermənistana qarşı ölçü götürməlidir” - deyə Ş.Ağayev qeyd etdi.
İradə SARIYEVA
