25/10/2020 17:56
728 x 90

Ermənistan dövlətinin faşizmlə tən ortaqlığına kəskin sübutlar - ən son BMT-də səsləndi, dünya nə vaxtadək susa bilər...

Samir Adıgözəlli: “Ümidvarıq ki, bu problemin sonuncu dəfə BMT tribunasından səsləndirilməsi bəzi qurumları və faşizmdən ziyan görən ölkələri hərəkətə gətirəcək”

img

Azərbaycan Ermənistanın faşist mahiyyətli dövlət olduğunu, bu zərərli ideologiyaya dövlət səviyyəsində verilən dəstəyi ən müxtəlif mötəbər tribunalardan ifşa edib.

Qeyd edək ki, Ermənistanda faşist Njdenin qəhrəman obrazının yaradılması ilə bağlı məsələni ilk dəfə İlham Əliyev  Aşqabadda MDB Dövlət Başçıları Şurasının iclasında qaldırıb. Dövlət başçısı faşistlərin qəhrəman kimi qələmə verilməsini qətiyyətlə pisləyib. Azərbaycan Prezidenti MDB məkanında faşizmin qəhrəmanlıq kimi qələmə verilməsinə yer olmadığını vurğulayıb. Ermənistan paytaxtının mərkəzində faşist cəlladı Qaregin Njdeyə heykəl qoyulmasını kəskin şəkildə pisləyən və bunu faşizmin təbliği kimi dəyərləndirən Azərbaycan Prezidentinin həmin  çıxışı geniş əks-səda doğurdu. Rusiyanın Armavir şəhərində Njdeyə qoyulan xatirə lövhəsi qara boya ilə boyandı, daha sonra heykəl söküldü. Bundan sonra da ölkə başçısı çıxışlarında tez-tez bu mövzuya toxunub. Azərbaycan qeyd edilən xüsusda düşmənə növbəti sarsıdıcı zərbəni BMT tribunasından vurdu. Belə ki, Prezident İlham Əliyev BMT Baş Assambleyasının 75-ci sessiyası çərçivəsində BMT-nin 75 illiyinə həsr edilmiş Yüksək Səviyyəli İclasında videoformatda çıxışında faşizmin şöhrətləndirilməsinin Ermənistanın dövlət siyasəti olduğunu diqqətə çatdırıb. Dövlət başçısı vurğulayıb ki, mənfur nasist general Qaregin Njde milli qəhrəmana çevrilib: “Ermənistanın rəsmi ideologiyasında “Azərbaycanofobiya” siyasəti hökm sürür. Gənc nəslə Azərbaycan xalqına nifrət aşılanır. Ermənistanın bu yaxınlarda təcavüzkar və hücum xarakterli hərbi doktrinası və milli təhlükəsizlik strategiyası qəbul edilib. Milli təhlükəsizlik strategiyasında irqçi, şovinist və “Azərbaycanofob” fikirlər əks olunub”.

Beləliklə, növbəti dəfə yüksək tribunadan Azərbaycan Ermənistanın faşizm ideologiyasına bağlılığını bütün dünyanın diqqətinə çatdırıb. Azərbaycan sayəsində artıq dünya bilir ki, təcavüzkar Ermənistanda faşizm ideologiyası uzun illərdir dövlət siyasətinə çevrilib. Ermənistanda bu ideologiya elə qurulub ki, burada bütün dövlət rəhbərləri faşizmə sədaqət məsələsində sələflərinin yolunu davam etdirir. Məhz bu, Azərbaycan Prezidenti İlham Əliyev tərəfindən yüksək tribunalarda ifşa edilsə də dünya, xüsusilə də faşizmdən ziyan görən ölkələrdən və beynəlxalq təşkilatlardan Ermənistana qarşı lazımi təzyiq hiss edilmir. Bunun səbəbi nə ilə bağlıdır?

İctimai Siyasi Proseslər Beynəlxalq Araşdırmalar Mərkəzinin (İSBAM) rəhbəri Samir Adıgözəlli “Bakı-Xəbər”ə açıqlamasında bildirdi ki, Prezident İlham Əliyev dəfələrlə istər ölkədə, istərsə də ölkədən kənarda iştirak etdiyi beynəlxalq tədbirlərdəki çıxışlarında Ermənistanın faşist, terrorçu mahiyyətni ifşa edib: “Həmin ölkə mahiyyət etibarı ilə faşizm ideologiyası ilə idarə olunur. Müstəqillikdən bu tərəfə onların dövlətinin başına gələnlərin çoxunun keçmişi terrorçu olub. Köçəryan, Serj Sarkisyan kimi adamlara ən layiqli qiyməti elə öz qurduqları dövlət verir. Birini həbsə atdı, digəri barəsində cinayət işi qaldırılıb. Ermənistan heç vaxt ASALA-ya olan rəğbətini gizlətməyib. Həmin terror təşkilatının üzvləri gəlib Qarabağdakı müharibədə iştirak ediblər. Belələri gəbərəndə, Ermənistan hakimiyyəti onları qəhrəman kimi təbliğ edib. Ermənistan dünyada nadir ölkələrdəndir ki, faşist Qaregin Njdeyə rəsmi olaraq heykəl ucaldıb və onu "milli qəhrəman" statusuna yüksəldib. Njdenin faşistlərlə əlaqəsi, 25 minlik erməni faşist legionunun yaradılmasında rolu, bütün keçmiş sovet xalqlarından formalaşan sovet ordusuna qarşı döyüşməsi və yəhudilərə qarşı soyqırımda aktiv iştirakı danılmazdır və sənədlərlə artıq sübut olunub. Qaregin Njde həm də 1918-1921-ci illərdə Zəngəzur mahalında yerli azərbaycanlılara qarşı vəhşi cinayətlərin törədilməsinə başçılıq edib. Belə bir faşist cinayətkara Ermənistan hökuməti tərəfindən heykəl qoyulması ilk növbədə Ermənistanın xislətindən, faşist ideyalarının daşıyıcısı olmasından irəli gəlir. Çünki məhz onlar eyni faşist metodları ilə Dağlıq Qarabağda azərbaycanlıların qətliamının müəllifləri idi. Bütün bu faktları Prezident İlham Əliyev ən mötəbər tribunalardan səsləndirib. Bu fikirlərin Ermənistanın faşist mahiyyətinin ifşa olunmasında mühüm rolu olub. Ancaq bu yetərli deyil, gərək dünya birliyi də bu məsələyə lazımi reaksiya verə. Xüsusilə də faşizmdən əziyyət çəkən ölkələrin Ermənistana lazımi etirazlar etməməsi təəccüb doğurur. Azərbaycanın qaldırdığı problem yalnız bizimlə Ermənistan arasında olan gərginlik səbəbindən qaynaqlanmır. Ölkəmiz, həmişə olduğu kimi, bu məsələdə də bəşəri problemə diqqəti yönəldir. Çünki belə bir zərərli ideologiyanın dövlət səviyyəsində dəstəklənməsindən bütün dünya ziyan görə bilər. Ümidvarıq ki, bu problemin sonuncu dəfə BMT tribunasından səsləndirilməsi bəzi qurumları və faşizmdən ziyan görən ölkələri hərəkətə gətirəcək. Mən bu yöndə olan passiv reaksiyaları da erməni lobbisinin dünyadakı təsiri və hökm sürən ikili standartlarla əlaqələndirirəm”.

Azərbaycan Ermənistanın faşizm mahiyyətli ölkə olduğunu var gücü ilə ifşa edir. İndi söz dünya birliyinindir.

Məhəmmədəli QƏRİBLİ

Son xəbərlər