Dağlıq Qarabağdakı separatçı qurumun lideri Araik Arutunyan bildirib ki, “Madrid prinsipləri” birmənalı olaraq qəbuledilməzdir: “Münaqişə ilə bağlı irəliləyiş ola bilər, amma bu irəliləyiş bizi məmnun etmir. Buna görə də mənim tərəfimdən rədd edilir. Qarabağda 1 nəfər belə tapa bilməzsiniz ki, “Madrid prinsipləri”ni bizim üçün qəbuledilən adlandırsın. Bu yanaşmada ikinci mövqeyə yer yoxdur”.
Bununla belə, Arutunyan Ermənistanın danışıqlar prosesində mövqeyinin get-gedə sərtləşdiyini açıq dillə ifadə edib. Belə ki, o, həyasızcasına Dağlıq Qarabağla yanaşı, ətraf 7 rayonun işğalının davam etdiriləcəyini və bunun ilk növbədə təhlükəsizlik məqsədi daşıdığını deyib.
Erməni mediası yazır ki, Ermənistanın sözügedən prinsiplərdən imtina etdiyini rəsmən elan etməyə cəsarəti çatmır. Belə bir addım atsa, o zaman müəyyən təzyiqlərlə üzləşə bilər. O üzdən, rəsmi İrəvan Arutunyanın dililə bunu bəyan etməyə çalışır.
Göründüyü kimi, Ermənistan Qarabağ münaqişəsinin tənzimlənməsi ilə bağlı bütün pozucu vasitələri işə salıb.
Maraqlıdır, bəs ekspertlər Ermənistanın “Madrid prinsipləri”ndən imtina etməsi versiyasını necə dəyərləndirirlər?
“...rasional qərar qəbul etməkdən uzaqlaşaraq işğala son qoymasa...”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyev bununla bağlı bir sıra məqamlara aydınlıq gətirdi: “Əvvəlcə onu bildirim ki, “Madrid prinsipləri” Azərbaycanla Ermənistan arasında Dağlıq Qarabağ münaqişəsinin həll edilməsi üçün ATƏT-in Minsk Qrupu tərəfindən hər iki tərəfə təklif olunan ideal sülh planı hesab olunur. Çünki “Madrid prinsipləri”nə əsasən, Ermənistan tərəfindən işğal edilmiş və Dağlıq Qarabağa daxil olmayan 7 rayon Azərbaycana qaytarılmalı, daha sonra isə Dağlıq Qarabağın statusu müəyyən olunmalıdır. Ermənistan əvvəlki illərdə “Madrid prinsipləri”nin həyata keçirilməsi üçün görüntülər yaradaraq bir az da vaxtı uzatmağı bacardı. Ancaq indiki geosiyasi vəziyyət elədir ki, işğal olunmuş torpaqlarımız üzərindən Ermənistanın siyasi manevrlər etmək imkanları tamamilə tükənib. Məhz buna görə Ermənistanın Baş naziri Nikol Paşinyan vəziyyətin çox ciddi olduğunu dərk edərək, “top”u heç bir ölkə tərəfindən tanınmayan qondarma “DQR”in rəhbəri Araik Arutunyana ötürüb. O da, öz növbəsində, Qarabağda mövqeyini bərkitmək üçün “Madrid prinsipləri”nin qəbuledilməz olduğunu dilə gətirir. Ermənistan tərəfinin ən böyük şansı onda ola bilər ki, qeyd-şərtsiz, işğalda olan Azərbaycan torpaqlarını tərk etsinlər. Ermənistan rasional qərar qəbul etməkdən uzaqlaşaraq işğala son qoymasa, o zaman Azərbaycan prinsiplərinin həyata keçirilməsi qaçılmaz olacaq. Yəni erməni tərəfi “Madrid prinsipləri”ni heçə sayırsa, o zaman Azərbaycan prinsiplərini ordumuzun qəhrəman övladları qələbə ilə başa çatdıracaq. Buna zərrə qədər heç kəsin şübhəsi yoxdur”.
Partiya funksionerinin fikrincə, Ermənistan apardığı pozuculuq siyasəti ilə Azərbaycana müharibədən başqa çıxış yolu qoymur.
Vidadi ORDAHALLI
