25/10/2020 18:16
728 x 90

Azərbaycanda fəallaşmağa çalışan erməni kəşfiyyatı ilə mübarizəyə DTX açıq şəkildə qoşuldu

Rasim Quliyev: “Hər hansı bir rəsmi orqan bununla bağlı narahatlığını ifadə edirsə, deməli, həmin istiqamətə ciddi fikir verilməlidir”

img

Azərbaycan Dövlət Təhlükəsizliyi Xidməti (DTX)  vətəndaşlarımızın sosial şəbəkələrdə hansı amillərə diqqət etmələrinin zəruriliyi ilə bağlı açıqlama yayıb.

DTX-nın rəsmi saytında yer alan açıqlamada deyilir: "Ermənistan-Azərbaycan qoşunlarının təmas xəttində hərbi təxribatların intensivləşməsi ilə eyni vaxtda düşmən tərəfi sosial şəbəkə resurslarında saxta azərbaycanlı adlarından və Azərbaycan dilindən istifadə etməklə cəbhə bölgələrində əhali arasında gərginlik və çaxnaşma yaratmaq, eləcə də Silahlı Qüvvələrimizin hərbi bölmələrinin fəaliyyəti, əməliyyat niyyətləri, yerdəyişmələri və s. barədə məlumatlar toplamaq məqsədilə davamlı fəaliyyət göstərir.

Qeyd edilən hallarla əlaqədar Dövlət Təhlükəsizliyi Xidməti Azərbaycan vətəndaşlarını ayıq-sayıq olmağa, düşmən təxribatlarına uymamağa, hərbi sirr təşkil edən və ordumuzun döyüş qabiliyyətinə, yerli əhalinin təhlükəsizliyinə zərər vura biləcək məlumatları yaymamağa çağırır.

Anonim profillərlə onlara edilmiş bu qəbil müraciətlər, sosial şəbəkə yazışmaları və mesengerlərlə ötürülən məlumatlara reaksiya verməmək, həmin məlumatları tanış və qohumlar arasında paylaşmamaq tövsiyə edilir. Cəbhədəki vəziyyətlə bağlı yalnız ölkəmizin rəsmi dövlət qurumlarının məlumatlarına istinad edilməsi zəruridir. Saxta adlar və müxtəlif kommunikasiya kanalları ilə Azərbaycan vətəndaşlarına ünvanlanmış kəşfiyyat-təxribat xarakterli müraciətlərlə əlaqədar Dövlət Təhlükəsizliyi Xidmətinin rəsmi internet səhifəsi (www.dtx.gov.az), əlaqə telefon (+99412 405 99 99) və qaynar xətt (+99412 1656) nömrələri, habelə DTX-nın rəsmi sosial şəbəkə resursları (https://www.facebook.com/DTXAzerbaijan, https://www.instagram.com/azerbaijandtx və https://twitter.com/DTX_Azerbaijan),  WhatsApp və Telegram (+994 77 405 99 99) vasitəsilə məlumat verilməsi xahiş olunur.

Unutmayaq ki, hər hansı məsuliyyətsiz davranışdan çoxlu sayda hərbi qulluqçumuzun və mülki şəxsin həyat və sağlamlığı təhlükə altına düşə bilər".

DTX-nın bu müraciətindən vətəndaşlarımız özləri üçün hansı nəticələri  çıxramalıdır?

"Resurs" Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında  bildirdi ki, söhbət ictimai rəydə çaşqınlıq yaratmaq üçün erməni və digər xüsusi xidmətlərin və ideoloji mərkəzlərinin planlı, məqsədli təxribat əməllərindən gedir: "Sosial səbəkə və elektron KİV-də bu tip təxribatların qarşısını almaq təkcə dövlətin, aidiyyəti qurumların vəzifəsi deyil. Eyni zamanda cəmiyyət, vətəndaşlarımız mənbəyi məlum olmayan, dəqiqləşdirilməmiş, dezinformativ xarakterli məlumatlarla diqqətli olmalı, belə təxribatçı dezinformasiyaların ictimai rəydə dövriyyəsində vasitəçi olmamalı, təxribat planının icraçısına çevrilməməlidir. Bu dezinformasiyaların ideoloji-psixoloji yükü və məqsədi aydınlaşdırılıb izah olunmalı və mətbuat bu istiqamətdə cəmiyyətdə maarifləndirmə işi aparmalıdır. Müharibə şəraitində olduğumuz üçün düşmən  əhalimiz arasında çaşqınlıq yaratmaqda xüsusən maraqlıdır. Belə vəziyyətdə  KİV-in üzərinə böyük məsuliyyət düşür. Bu baxımdan DTX-nın bəyanatının zamanında verildiyi qənaətindəyəm. Xüsusilə də biz sosial şəbəkələrdə diqqətli olmalıyıq. Çünki bu məkan sərhəd tanımır. Ora ermənilər də azərbaycanlı adı ilə girib açıq təxribat apara bilər. Ola bilər ki, sadə vətəndaşlar bunun fərqinə vara bilmir və düşmən təbliğatının təsiri altına düşmüş olur.  Hər hansı bir rəsmi orqan bununla bağlı narahatlığını ifadə edirsə, deməli, həmin istiqamətə ciddi fikir verilməlidir. Tam müharibə şəraitində isə bunlar konkret qanunlarla tənzimlənməlidir. Belə hallarla bağlı ciddi nəzarət və ölçülər götürülüməlidir. Çox təəssüflə qeyd etməliyik ki, bəzən elektron KİV də mənbəyi bilinməyən məlumatı götürüb paylaşır. Belə olan halda həmin məlumata inanma əmsalı daha da böyüyür. Çünki feyk xəbər rəsmi örtüyün altında cəmiyyətə asanlıqla sırıdılır. Bəzən isə belə hallar yalnışlıqla deyil, məqsədli edilir”.

Xüsusilə həssas olan dönəmlərdə ermənilərin sosial şəbəkələrin bizə aid seqmentində fəallığı artır. Maksimum diqqətli olmalıyıq.

Məhəmmədəli QƏRİBLİ

Son xəbərlər