27/10/2020 22:22
728 x 90

BMT-nin və Qoşulmama Hərəkatının eyni hədəfli fəaliyyətini əlaqələndirən mülahizə - İlham Əliyev Hərəkat adından təsdiq etdi...

Ramil Hüseynov: “...dünyada nizamsız miqrasiya müşahidə edilir”

img

“Qoşulmama Hərəkatı təsdiq edir ki, narahatlıq doğuran yeni sahələr və çağırışlar meydana gəlib. Burada BMT Nizamnaməsinin prinsip və məqsədlərinin, beynəlxalq hüququn prinsiplərinin bərqərar olunması və qorunması üçün beynəlxalq ictimaiyyət tərəfindən müvafiq öhdəlik yenidən nümayiş etdirilməlidir”.

Bu fikirləri Prezident İlham Əliyev BMT Baş Assambleyasının 75-ci sessiyası çərçivəsində BMT-nin 75 illiyinə həsr edilmiş Yüksək Səviyyəli İclas zamanı videoformatda çıxışında bildirib.

Dövlət başçısı deyib ki, insan hüquqlarının pozulması, maliyyə böhranları və ekologiyanın pisləşməsi ilə müşahidə olunan silahlı münaqişələr, təcavüzkar ekspansionist siyasətlər, terrorçuluq, separatizm, beynəlxalq mütəşəkkil cinayətkarlıq və ekstremizm dünyada milyonlarla insana mənfi təsir etməkdə davam edir: “Bu gün dünyanın hər zaman olduğundan daha çox beynəlxalq hüquqa hörmət və bunu təmin etmək iqtidarında olan səmərəli qlobal təsisatlara ehtiyacı var. Bu baxımdan, Qoşulmama Hərəkatının rolu mühüm əhəmiyyətə malikdir. Özünün tarixi boyunca Qoşulmama Hərəkatı beynəlxalq sülh və təhlükəsizliyin möhkəmləndirilməsində fundamental rol oynamış və davamlı olaraq beynəlxalq hüququn norma və prinsiplərinə ciddi riayət edilməsinə çağırmışdır. Qoşulmama Hərəkatı BMT-nin rolunun gücləndirilməsinə çox böyük əhəmiyyət verir və onun potensialından tam istifadə olunması üçün səylərin göstərilməsini vacib hesab edir”.

Həqiqətən də son illər dünyada narahatlıq doğuran yeni sahələr, çağırışlar meydana gəlib. O baxımdan, müvafiq beynəlxalq öhdəliklərin yenidən nümayiş etdirilməsinə ehtiyac var.

Maraqlıdır, bəs ekspertlər bunu necə dəyərləndirirlər?

  • “Bütün bu problemlər ölkələr beynəlxalq öhdəliklərə əməl edərlərsə, öz həllini tapa bilər”

Məsələyə münasibət bildirən siyasi ekspert Ramil Hüseynovun sözlərinə görə, ölkə başçısı bununla beynəlxalq müstəvidə son dərəcə vacib olan bir məsələni gündəmə gətirib: “Məsələ ondadır ki, son illər dünyada bir sıra təhdidlər, narahatlıq doğuran sahələr meydana gəlib. Separatizm meylləri artıb, yeni münaqişə ocaqları yaranıb. Yoxsulluq və münaqişələr səbəbindən dünyada nizamsız miqrasiya müşahidə edilir. Bu da sosial gərginliyə, insan alverinin genişlənməsinə və digər bu kimi problemlərin yaranmasına səbəb olur. Son illər müharibələr və aclıq, səfalət üzündən Yaxın Şərq, Afrika ölkələrindən Avropaya miqrasiya axını xeyli güclənib. Yaranan problemlər bir sıra inkişaf etmiş ölkələri təhdid edir. Çünki miqrantlar məhz həmin ölkələrə üz tuturlar. Bütün bu problemlər ölkələr beynəlxalq öhdəliklərə əməl edərlərsə, öz həllini tapa bilər. Bunun başqa çıxış yolu yoxdur. Nəzərə almaq lazımdır ki, sözügedən problemlər bir-birilə sıx bağlıdır. Məsələn, münaqişə ocaqları, yoxsulluq olmasa, o zaman kütləvi miqrasiyalar da anormal şəkil almaz. Reallıq ondan ibarətdir ki, beynəlxalq öhdəliklərə bir sıra hallarda əməl edilmir. Bəzən bu öhdəlikləri elə məhz aparıcı dövlətlər pozur və yaxud da saya salmırlar. BMT-nin nə qədər qəbul etdiyi qərarı, öhdəliyi var ki, faktiki olaraq, onlara əməl edilmir, praktikada işləmir. İkili standartlar və digər səbəblər üzündən belə vəziyyət yaranıb”.

Yekun olaraq ekspert onu da qeyd etdi ki, mövcud problemlərin həlli bütün ölkələrin beynəlxalq öhdəliklərə əməl etməsindən keçir.

Vidadi ORDAHALLI

Son xəbərlər