Müxaliflər birləşdi, Paşinyanın kreslosu laxlamağa başladı...
Koronavirus pandemiyasının şiddətlənməsi ilə Ermənistanda dayaqları tam sarsılan Nikol Paşinyana qarşı müxalif qüvvələr həlledici hücuma hazırlaşır. Belə ki, müxalif “Çiçəklənən Ermənistan”, “Daşnaksütyun” və Vətən partiyaları oktyabrın 8-də İrəvanda ümumrespublika mitinqi keçirməyə hazırlaşır. Artıq bu barədə adları çəkilən partiyalar birgə açıqlama yayıb.
Onlar bildirir ki, son iki ildə hökumət ictimaiyyətin ümidlərini doğrultmayıb: 2018-ci ilin yazında ümumxalq hərəkatı Ermənistanın inkişafı üçün keyfiyyətcə yeni imkanlar yaratmışdı. Amma qeyd olunduğu kimi, ötən iki ildən artıq müddət ərzində ictimaiyyətin gözləntiləri özünü doğrultmayıb. Hakimiyyət hər sahədə uğursuz olub. Ermənistanın inkişaf perspektivi təhlükə altındadır. Hakim siyasi qüvvə Ermənistanın milli dövlətçiliyinə yönəlmiş problemlərə müqavimət göstərmək qabiliyyətsizliyini sübut edib”. Qeyd olunur ki, partiyalar Ermənistanda yaranmış vəziyyəti qiymətləndirərək yeni, keyfiyyətli və milli hakimiyyət formalaşdırılması zərurətini qaçılmaz hesab edərək, cari il oktyabrın 8-də Azadlıq meydanında ümumdövlət mitinqi təşkil edir. Vətən Partiyasının sədri, Ermənistan milli təhlükəsizlik xidmətinin keçmiş direktoru Artur Vanetsyan bu fonda bildirir ki, yaxın zamanda Ermənistanda ciddi siyasi hadisələr gözlənilir. Onun sözlərinə görə, başçılıq etdiyi partiya həmin siyasi prosesdə aparıcı rol oynayacaq. Elə “168.am” nəşri də Paşinyan iqtidarı üçün vəziyyətin sürətlə pisləşdiyini yazır. Nəşr vurğulayır ki, Ermənistanın siyasi sahəsindəki prosesləri izlədikdən sonra müxalifət arasında konsolidasiya və ya fikir birliyi olmaması üçün hakimiyyətin hər şeyi etməyə çalışdığı açıq şəkildə görünür: “Paşinyan hakimiyyət kreslosundan zövq alaraq müxalifət sektorunun konsolidasiyasını mümkün və qeyri-mümkün bütün vasitələrlə uğursuzluğa düçar etməyə çalışır. İqtidar düşərgəsində təzahür edən müxalifətə qarşı bu cür hörmətsiz və kinayəli davranışın səbəbi budur. Hakimiyyət daim “Ermənistanda müxalifət, belə bir şey yoxdur” və ya “müxalifət rolunda qisasçılar meydana çıxıblar, nəyin bahasına olursa olsun geri - hakimiyyətə dönməyə çalışırlar” və buna bənzər sadəlövh tezislər ortaya atır. Paşinyan olduqca hiyləgər bir fiqur olaraq, əlində 2.5 ildir ki, özü tərəfindən yaradılan və parlaq şəkildə faydalandığı “qızıl formulu” kozur kimi tutur, bu çox sadə bir formatdır: “Məni hakimiyyətdən uzaqlaşdırsanız, keçmiş iqtidar yenidən hakimiyyətə qayıdacaq”. Bu hələ də işləyən bir formuldur, Paşinyan bu şəkildə oynayır. Paşinyanın müxalifəti parçalamaqdakı növbəti strateji addımı Serj Sarkisyan və Robert Köçəryan ətrafında toxunan əfsanədir. Onun fikrincə, Ermənistanın iki eks-prezidenti arasında ciddi ziddiyyət var, onlar arasında işbirliyi mümkün deyil.
Meydanda davamlı olaraq müxtəlif tezislər atılır, guya Köçəryan və keçmiş iqtidar partiyası olan respublikaçılar artıq bir dəfə bu yolu keçiblər və ikinci dəfə birləşmək mümkün deyil. Siyasi reallıq həqiqətləri ilə heç bir əlaqəsi olmayan, müxtəlif media platformalarından hökumətə xidmət edən “ekspert-analitiklər” tərəfindən həvəslə ortaya atılan iddialar, xüsusi hazırlanmış və hərtərəfli öyrənilmiş bir planın tərkib hissəsidir”. Yazıda qeyd edilir ki, Paşinyan Sarkisyan-Köçəryan ittifaqından qorxur, çünki nə qədər “Ermənistanda hakimiyyət 20 ildən çox işğal altında olub”, “Robert Köçəryan və Serj Sarkisyan Ermənistanı qarət edib”, “1 Mart” hadisəsini onlar törədib” və ya “27 Oktyabr” hadisəsinə görə məsuliyyət daşıyırlar” deyə hay-küy salsa da, bunlar heç bir siyasi əsası və əsaslandırılması olmadan irəli sürülən sadəcə manipulyativ, populist bəyanatlardır: “Bunların sayəsində Paşinyan hakimiyyətə gələ bildi. Əminliklə vurğulaya bilərik ki, yuxarıda göstərilən iddiaların heç biri ilə bağlı bu iki il yarım ərzində heç bir sübut və ya əsaslı ittiham baş verməyib. Növbəti açıq şəkildə hiss olunan qorxu Paşinyan tərəfindən hər gün daşqalaq olunan “Çiçəklənən Ermənistan” – “Daşnaksütyun” - Vətən bloku ilə bağlıdır. Fərqli cinayət işlərini bir-birinə “tikməyin” və ya ən azından bu blokun rəhbərlərini şahid qismində müxtəlif məhkəmə işləri çərçivəsində hüquq-mühafizə və istintaq orqanlarına çağırılmasına hər cür cəhd göstərmələrinin səbəbi budur. Bunlar cəmiyyətdə manipulyasiya edərək həmin birliyin adını çəkməyə və ləkələməyə çalışılan taktiki sxemlərdir. Eyni zamanda, Paşinyan “Parlaq Ermənistan” birliyi baxımından arxayındır, çünki bu siyasi birliyi ciddi qəbul etmir. Yekun vuraraq qeyd etmək olar ki, Paşinyan cəmiyyətdə nifrət və qarşılıqlı inamsızlıq yaratmağa davam edərək, hakimiyyəti ələ keçirmə ömrünün müddətini uzadır”. Amma o da qeyd olunur ki, müxaliflərin birliyi bu payızın Paşinyan üçün çox sərt keçməsini şərtləndirir. İndi Paşinyan repressiv metodlarla rəqiblərini sıradan çıxarmağa çalışır. Amma bu dəfə cəmiyyətin də artan narazılığı repressiv metodların əks effekt verə biləcəyini istisna etmir.
Ramil QULİYEV
