“Düşmən yatmır, o həmişə ayıqdır, əli tətikdə dayanıb” fikri günümüz üçün çox aktualdır. Azərbaycana qarşı təxribat mexanizmini günü-gündən yeniləyən Ermənistan ən müxtəlif metodlardan istifadə etməklə diversiyalar həyata keçirir. Bu gün Ermənistan təkcə dövlət sərhədlərimizə qarşı pozuculuq, təxribat əməlləri ilə məşğul olmur, internet platforması, sosial şəbəkələr üzərindən də bu çirkin hərəkətlərini davam etdirir. Məlum olduğu kimi, ermənilər sosial şəbəkələrdə azərbaycanlı adı ilə təxribata başlayıblar.
Azərbaycan mətbuatının verdiyi xəbərə görə, Tovuz istiqamətində vəziyyət yenidən gərginləşib.
Belə ki, ermənilər sosial şəbəkə vasitəsilə Azərbaycan dilində mesajlar yazmağa və hərbi sirri əldə etməyə çalışırlar. Uğur Rzayev adlı şəxs ona ermənidən gələn mesajı saytımıza belə şərh edib:
“Öncə Ranar Cabbarov adlı şəxsdən mesaj gəldi. Azərbaycanlı olduğunu bildirib, cəbhədə vəziyyətin necə olduğunu soruşdu. Daha sonra “Ermənistana hücum olacaqmı” sualını verdi. Onun erməni olduğunu başa düşüb, söyüb bloka atdım. Yenidən ona mesaj yazmaq istəyirdim deyə, blokdan çıxartdım. Çıxartdıqda isə həmin şəxsin adı Berik Koçaryan yazılmışdı. Xahiş edirəm, bir azərbaycanlı kimi, bütün Azərbaycan xalqı bir olaq, oyaq olaq, düşmənə hərbi sirr verməyək”.
Sosial şəbəkələrdə aktiv olan vətəndaşlarımıza diqqətli olmalarını, cəbhə və hərbi məsələlərlə bağlı heç bir şərh və mesaj yazmamalarını tövsiyə edirik.
Azərbaycanlı donuna girən ermənilər sosial şəbəkə hesablarında kəşfiyyat məlumatları toplamağa başlayıblar, əsl azərbaycanlılar nələrin müzakirəsindən yan keçməlidirlər?
“Bu istiqamətdə maarifçilik işləri gücləndirilməlidir”
Tanınmış sosioloq, professor Əhməd Qəşəmoğlu bizimlə söhbətində bildirdi ki, ermənilər illərdir bizə qarşı bu tip təxribatlar həyata keçirməklə məşğuldurlar.
Ə.Qəşəmoğlunun sözlərinə görə, indiki vəziyyətdə hər bir Azərbaycan vətəndaşı, xüsusilə də sosial şəbəkə istifadəçiləri çox diqqətli, ayıq-sayıq olmalı, paylaşımlarına, statuslarına diqqət yetirməlidirlər ki, ermənilər həmin məlumatlardan bizə qarşı istifadə edə bilməsinlər. Ermənilərin son zamanlar sosial şəbəkələrdə aktivləşdiyini, xüsusən də Tovuz hadisələrindən sonra daha da həyasızlaşdığını vurğulayan Ə.Qəşəmoğlunun bildirdiyinə görə, sosial şəbəkə istifadəçiləri hər onlara dostluq göndərən insanı dostluğa almamalıdırlar. “Ermənilərin Azərbaycana qarşı təxribatı yeni deyil, onlar müxtəlif dövrlərdə bu çirkin əməllərini ortaya qoyublar. Tovuz cəbhəsində baş verən erməni təxribatından sonra düşmən yeni təxribat üsullarına əl atmağa başlayıb. Onlar bu təxribatları sosial şəbəkələr vasitəsilə edirlər. Ermənilər kütləvi olaraq azərbaycanlı adı ilə sosial şəbəkələrdə hesablar açır və bununla da azərbaycanlılarla əlaqələr qurmaq istəyirlər. Onlar çalışırlar ki, “dostluq”larına daha çox tanınmış, ictimai-siyasi mühitdə az-çox çəkisi olan adamları cəlb etsinlər. Məqsədləri aydındır, ölkəmizlə bağlı kəşfiyyat xarakterli məlumatlar əldə etmək, sonradan isə onları bizim özümüzə qarşı istifadə etmək. Çox təəssüf ki, bir çox halda bizim sosial şəbəkə istifadəçilərimiz ağlına gələni yazıb paylaşır, ermənilər üçün kəşfiyyat məlumatı ola biləcək informasiyalar paylaşırlar. Ümumiyyətlə, bu yolverilməzdir. Xüsusən də indiki halda. Vətəndaşlara tövsiyəm o olardı ki, paylaşımlarına diqqət etsinlər, ordumuzla, cəbhədəki vəziyyətlə, strateji obyektlərimizlə, digər məsələlərlə bağlı paylaşımlar etməsinlər. Bir də görürsən ki, həqiqətə uyğun olmayan bir məlumat paylaşıldı. Bunlara yol vermək olmaz. Bizim vətəndaşlar, sosial şəbəkə istifadəçiləri bilməlidirlər ki, istənilən kiçik bir yanlış fikir, status, rəy düşmən üçün böyük kəşfiyyat məlumatı ola bilər. Bir də ki, dostluq göndərən adamların səhifələrini ciddi yoxlamaq lazımdır, yəni sənə dostluq göndərən kimdir. Deyim ki, təxribat məqsədilə dostluq göndərən adam həmin an tanınır. Odur ki, elələrini tez tanımaq, düşmənə sirr verməmək lazımdır”.
Ə.Qəşəmoğlu hesab edir ki, vətəndaşlarımızın bir qisminin sosial şəbəkələrdən elə də mükəmməl istifadə etmək bacarığı olmadığına görə bəzən ehtiyatsız işlənən bir söz də ermənilər üçün informasiya mənbəyi ola bilər. “Fikrimcə, hazırda Azərbaycanda aidiyyəti qurumlar tərəfindən sosial şəbəkələrə nəzarət artırılmalıdır. Eyni zamanda, bu istiqamətdə maarifçilik işləri gücləndirilməlidir ki, vətəndaş sosial şəbəkədə nəyi paylaşa bilər, nəyi yox. Çox geniş maarifləndirməyə, ayıq-sayıq olmağa ehtiyac var. Sosial şəbəkələrin özündə də ictimai qınaq formalaşdırılmalıdır ki, proses diqqətdə saxlansın. Məsələn, kimsə erməni kəşfiyyatının marağına səbəb ola biləcək hansısa informasiya paylaşarsa, dərhal bunun zərərini ona çatdırmaq və tezliklə yazdığını sildirmək lazımdır. İctimai qınaq mütləqdir” - deyə Ə.Qəşəmoğlu dedi.
İradə SARIYEVA
