Ermənistan Azərbaycan torpaqlarını işğal altında saxlamaqda davam edir və bununla kifayətlənməyib oradakı abidələrimizə qarşı vandalizm aktları həyata keçirir, dövlət səviyyəsində “Azərbaycanfobiya” siyasəti yürüdürlər. Bütün bu və digər faktlarla bağlı isə hələ də dünya birliyi, beynəlxalq qurumlar Ermənistana “gözün üstə qaşın var” deməyib...
Ermənistanın anti-Azərbaycan siyasəti, bu ölkənin işğal altında saxladığı torpaqlarımızda həyata keçirdiyi, heç bir qanun çərçivəsinə, insanlığa sığmayan cinayətləri barədə Azərbaycan Prezidenti İlham Əliyev dəfələrlə beynəlxalq qurumların tribunalarında etdiyi çıxışlarda bildirib və bu faktı dünya ictimaiyyətinə çatdırıb.
Bildiyimiz kimi, sentyabrın 21-də BMT Baş Assambleyasının 75-ci sessiyası çərçivəsində BMT-nin 75 illiyinə həsr edilmiş Yüksək Səviyyəli İclas keçirilib və Azərbaycan Prezidenti, Qoşulmama Hərəkatının sədri İlham Əliyev iclasda videoformatda çıxış edib. Prezident İlham Əliyev çıxışında qeyd edib: “...Ermənistan işğal olunmuş ərazilərdə azərbaycanlı əhaliyə qarşı etnik təmizləmə həyata keçirmişdir. Bir milyondan çox azərbaycanlı qaçqın və məcburi köçkün vəziyyətinə düşmüşdür. Ermənistan Xocalı soyqırımını törətmişdir. Ondan çox ölkə Xocalı soyqırımını tanımışdır. Ermənistan işğal olunmuş ərazilərdə beynəlxalq hüquq normalarını kobud şəkildə pozaraq qanunsuz məskunlaşdırma siyasəti həyata keçirir. Ermənistan işğal olunmuş ərazilərdə Azərbaycan xalqına məxsus tarixi və dini abidələri məhv edib”.
Ölkə başçısı həmçinin “...Nasizmin şöhrətləndirilməsi Ermənistanın dövlət siyasətidir. Mənfur nasist general Qaregin Njde milli qəhrəmana çevrilib. Ermənistanın rəsmi ideologiyasında “Azərbaycanofobiya” siyasəti hökm sürür. Gənc nəslə Azərbaycan xalqına nifrət aşılanır. Ermənistan bu yaxınlarda təcavüzkar və hücum xarakterli hərbi doktrina və milli təhlükəsizlik strategiyası qəbul edib. Milli təhlükəsizlik strategiyasında irqçi, şovinist və “Azərbaycanofob” fikirlər əks olunub” - deyə çıxışında bildirib.
“...Ermənistana qarşı tədbirlər görməlidirlər”
Tanınmış tədqiqatçı, tarixçi-araşdırmaçı Ənvər Çingizoğlu “Bakı-Xəbər”ə bildirdi ki, Ermənistanın Azərbaycana qarşı həyata keçirdiyi bu mənfur siyasətin qarşısı beynəlxalq qurumlar, dünya dövlətləri tərəfindən alınmasa, bu dövlətin qanunsuz əməlləri bütün dünya üçün açıq təhdid yaradır. “Cənab Prezident BMT Baş Assambleyasının 75-ci sessiyası çərçivəsində BMT-nin 75 illiyinə həsr edilən iclasda Ermənistanın illərdən bəri Azərbaycana qarşı davam etdirdiyi mənfur siyasəti tam olaraq bir daha ifşa etdi. 180-dən artıq ölkənin dövlət və hökumət başçılarının qatıldığı belə bir iclasda Azərbaycan Prezidentinin səsləndirdiyi fikirlər bir dövlət kimi Ermənistanın mahiyyətini aydın şəkildə ortaya qoydu. Onsuz da beynəlxalq təşkilatlar da, dünya dövlətləri də Ermənistanın yürütdüyü məkrli siyasətdən xəbərdardır. Hesab edirəm ki, ölkə başçısı tərəfindən bu faktların bir daha onların diqqətinə çatdırılması təqdirəlayiqdir. Bir tarixçi-etnoqraf kimi deyə bilərəm ki, Ermənistanın işğalı altında olan ərazilərimizdə abidələrimizə divan tutulub. Bunu ölkə başçısı da qeyd etdi. Faktiki olaraq, Ermənistan dünyanın gözü qarşısında bütün beynəlxalq konvensiyaların şərtlərini kobud şəkildə pozaraq həm ərazilərimizdə etnik təmizləmə siyasəti həyata keçirib, həm də tarixi, arxeoloji, mədəni, dini abidələrimizi məhv edib, bəzilərini isə erməniləşdirib. Ermənistanın əsas məqsədi işğal altında saxladığı Azərbaycan ərazilərindən süni şəkildə Azərbaycan xalqının izlərini silməkdir. Ermənistan hər gün işğal altında olan ərazilərimizdə qanunsuz əməllərini davam etdirir, qanunsuz arxeoloji qazıntılar aparır, tariximizin, mədəniyyətimizin izlərini silməklə məşğul olur. Qeyd etdiyim kimi, dəfələrlə cənab Prezident öz çıxışlarında, rəsmi görüşlərində bu məsələni qabardıb, səsləndirib. Ölkə başçısı tərəfindən BMT-nin yüksək səviyyəli iclasında bu məsələnin yenidən gündəmə gətirilməsinin əhəmiyyəti böyükdür. Hesab edirəm ki, Prezidentin bu çıxışı çox mətləbi yenidən dünya üçün aydınlatdı. Fikrimcə, həm BMT, həm digər beynəlxalq təşkilatlar, eləcə də dünya dövlətləri artıq Ermənistana təzyiqlər göstərməli, ondan qanunsuz əməllərini dayandırmağı tələb etməlidirlər. Əslində, ölkə başçısı da BMT-nin tədbirində bu mesajları verdi ki, Ermənistan BMT-nin, eləcə də digər beynəlxalq qurumların çağırışlarına, qəbul etdiyi qərarlara əhəmiyyət vermir, işğalçı dövlətin qanunsuz əməllərinə son qoyulmalıdır. Beynəlxalq qurumlar susduqca və bəzi dövlətlər ermənilərə arxa-dayaq durduqca, onlar daha böyük cinayətlərə əl atacaqlar.
Ermənistan öz işğalçılıq hərəkətlərinə son qoymalıdır və bunu ondan beynəlxalq qurumlar tələb etməlidir. Əks halda, bu ölkənin qara niyyəti başqa dövlətləri də təhdid edəcək, artıq etməkdədir də”.
Ə.Çingizoğlu qeyd etdi ki, Prezidentin çıxışında Ermənistanın nasizmi dövlət siyasətinə çevirməsini, bu ölkədə Azərbaycana nifrət edən nəslin formalaşdırılmasını, burada “Azərbaycanafobiya”nın təlqin edilməsini xüsusi vurğulması Ermənistanın necə bir təhlükəli ölkə olduğunu bir daha dünyaya sübut etdi. “Cənab Prezident öz çıxışında Ermənistanın dünya üçün necə böyük təhlükə yaratdığını əsaslı şəkildə bir daha bəyan etdi. Prezidentimiz çıxışında dünyaya mesaj verdi ki, Ermənistanda faşist əlaltısı, insanlığın, sülhün düşməni Njdeyə heykəl qoyulur, faşizm, nasizm dövlət siyasəti olaraq təbliğ edilir, yeni nəslin şüuruna yeridilir, bu ölkədə Azərbaycan xalqına qarşı nifrət mühiti formalaşdırılır. Faktiki olaraq, Ermənistan sülhün, əmin-amanlığın, dinc və birgəyaşayışın düşməni olduğunu monoetnik dövlət kimi çoxdan ortaya qoyub. Ermənistan monoetnik dövlətdir, orada özlərindən başqa heç kəs yaşamır, orada qalmağa məcbur olan yezidi kürdlər isə çoxdan assimilyasiya edilərək erməniləşdirilib. Bütün bunlar Ermənistanın əsl simasının üzə çıxmasını şərtləndirən amillərdir. Ermənistanın orta və ali məktəblərində tədris edilən dərsliklərdə Azərbaycana qarşı kəskin nifrət, “Azərbaycanafobiya” yer alıb. Hətta yadımdadır, bir neçə il əvvəl bir Qərb sosioloqu Ermənistan dərsliklərini görüb dəhşətə gəlmişdi ki, dərsliklər başdan-başa Azərbaycana qarşı nifrətlə doludur. Xüsusən də tarix dərsliklərində bu hal müşahidə edilir.
Ermənistanın hərəkətlərinin qraşısı alınmasa, bu ölkədə dövlət siyasətinə çevrimiş nasizm, njdeizm təhlükəsi bütün dünyanı təhdid edəcək, “Azərbaycanafobiya”nın ardınca başqa xalqlara qarşı da fobiya təbliğ olunacaq. Çünki bu ölkənin tutduğu yol budur. Fikrimcə, dünya birliyi, BMT və digər beynəlxalq qurumlar Prezident İlham Əliyevin Ermənistanın yürütdüyü mənfur siyasətlə bağlı mesajlarından ciddi nəticə çıxarmalı və Ermənistana qarşı tədbirlər görməlidirlər” - deyə Ə.Çingizoğlu vurğuladı.
İradə SARIYEVA
