01/11/2020 01:59
728 x 90

Ermənistanın yeni təcavüzkar müharibə hazırlıqları BMT müzakirələrində - İrəvanın işğalçı imicini gücləndirən triumfal jest…

Elman Nəsirov: “Belə real faktlar qarşısında BMT hərəkətə keçib, Ermənistana qarşı təsirli mexanizmlərə əl atmalıdır”

img

Sentyabrın 21-də BMT Baş Assambleyasının 75-ci Sessiyası çərçivəsində BMT-nin 75 illiyinə həsr edilmiş Yüksək Səviyyəli İclas keçirilib. Azərbaycan Prezidenti, Qoşulmama Hərəkatının sədri İlham Əliyev iclasda videoformatda çıxış edib.

İclasda ümumilikdə 182 ölkənin dövlət və hökümət başçısı videoformatda çıxış edib. Azərbaycan Prezidenti İlham Əliyevin çıxışı sayca altıncı olub. Dünya üzrə 182 ölkə arasında Azərbaycanın dövlət başçısının sayca altıncı çıxış etməsi, şübhəsiz ki, Prezident İlham Əliyevə həm Azərbaycanın dövlət başçısı, həm də Qoşulmama Hərəkatının sədri kimi beynəlxalq səviyyədə göstərilən hörmət və etimadın təzahürüdür. Qeyd edək ki, dövlət başçısı çıxışını iki hissədə - Qoşulmama Hərəkatının sədri və Azərbaycan Prezidenti kimi edib. Prezident çıxışında Ermənistanın təcavüzkar mahiyyəti və  Azərbaycana qarşı yeni hərbi təcavüzə hazırlaşdığından danışıb: “...Ermənistanın baş naziri Azərbaycana qarşı hərbi əməliyyatlarda iştirak etməyə məcbur ediləcək on minlərlə mülki vətəndaşdan ibarət silahlandırılmış mülki könüllülər dəstələrinin yaradılmasını elan etmişdir. Bu, Ermənistan rəhbərliyinin yeni təcavüzkar niyyətini açıq şəkildə nümayiş etdirir. Ermənistanın müdafiə naziri Azərbaycanı “yeni ərazilər uğrunda yeni müharibə” bəyanatları ilə hədələyir.

Nasizmin şöhrətləndirilməsi Ermənistanın dövlət siyasətidir. Mənfur nasist general Qaregin Njde milli qəhrəmana çevrilib. Ermənistanın rəsmi ideologiyasında “Azərbaycanofobiya” siyasəti hökm sürür. Gənc nəslə Azərbaycan xalqına nifrət aşılanır. Ermənistan bu yaxınlarda təcavüzkar və hücum xarakterli hərbi doktrina və milli təhlükəsizlik strategiyası qəbul edib. Milli təhlükəsizlik strategiyasında irqçi, şovinist və “Azərbaycanofob” fikirlər əks olunub. Təcavüzkar ritorika və təxribatlar Ermənistanın Azərbaycana qarşı yeni təcavüzə hazırlaşdığını nümayiş etdirir. Biz BMT-ni və beynəlxalq ictimaiyyəti Ermənistanın növbəti hərbi təcavüzdən çəkindirilməsinə dəvət edirik”.

Prezidentin BMT tribunasından Ermənistanı bu şəkildə ifşasından qurum hansı nəticəni çıxarmalıdır?

Millət vəkili Elman Nəsirov  “Bakı-Xəbər”ə açıqlamasında bildirdi ki, Prezident həmin tədbirdə iki statusda nitq söyləyib: “Birincisi, Qoşulmama Hərəkatının sədri, ikincisi isə Azərbaycan dövlətinin başçısı kimi.  Sədr kimi görülmüş işlər haqda ətraflı məlumat verdi.  Xüsusilə də pandemiya dönəmində Azərbaycanın sədr kimi atdığı addımlardan geniş danışdı. Çıxışının ikinci hissəsində cənab Prezident Azərbaycan dövlətinin üzləşdiyi ən ağır problem olan Ermənistanın təcavüzkar siyasətini fakt və arqumentlərlə BMT-nin diqqətinə çatdırdı. Bu çıxış BMT-nin sessiyası çərçivəsində olduğundan, cənab Prezident diqqəti ona yönəltdi ki,  həmin qurumun Ermənistanın təcavüzkar siyasətini sübut edən 4 qətnaməsi var. Bu qətnamələrdə birmənalı şəkildə yazılıb ki, erməni silahlı birləşmələri işğal olunmuş Azərbaycan ərazilərindən qeyd-şərtsiz çıxmalıdır. Bu günə qədər də həmin sənədlər icra olunmur. Bu da Ermənistanın rəhbərliyində bir arxayınlıq sindromu  formalaşdırır. Nəticədə işğalçı şirniklənir. Cənab Prezident qeyd etdi ki, məhz bu şirniklənmənin nəticəsi olaraq Ermənistan iyul ayında növbəti təxribata əl atdı.  Avqust ayında isə növbəti diversiya hərəkətləri ifşa olundu. Onların diversant qrupunun rəhbəri hərbçilərimiz tərəfindən əsir götürüldü. Məlum oldu ki, onlar mülki və hərbçi şəxslərə qarşı terror hərəkətləri həyata keçirməyi planlayırmışlar. Bütün bunların hamısını Prezident söylədi. Nitqin ən böyük əhəmiyyəti budur ki, fikirlər dünyanın ən böyük universal qurumunun tribunasından söylənildi. Məhz ordan deyildi ki, BMT-nin qəbul etdiyi qətnamələr icra olunmur. Qurumun nizamnəaməsinin 25-ci maddəsinə görə, Təhlükəsizlik Şurasının qəbul etdiyi qətnamələrin icrası məcburidir. Cənab Prezident təşkilatı  dəvət etdi ki, Ermənistanın yeni təcavüzkar siyasətinə qiymət versin. Bu kontekstdə konkret təzyiq və təsir mexanizmlərini işə salsın. Ermənistanın rəsmiləri son vaxtlar yeni müharibə, yeni ərazilər işğal etmək niyyətlərini gizlətmir. Bu, dünyanın gözü qarşısında baş verir. Belə real faktlar qarşısında BMT hərəkətə keçib, Ermənistana qarşı təsirli mexanizmlərə əl atmalıdır”.

Bütün bunların fonunda BMT öz qətnamələrinin işlək mexanizmini təmin etsə, öz nüfuzunu da qorumuş olar.

Məhəmmədəli QƏRİBLİ

Son xəbərlər