“Mən bu hadisələrdə Gürcüstan hökumətinin fəaliyyətini yüksək qiymətləndirmək istəyirəm. Bilirsiniz ki, Gürcüstan öz ərazisindən Ermənistana silahların daşınmasına imkan vermədi. Məhz buna görə Xəzəryanı ölkələrin əraziləri və hava sahələri vasitəsilə yük təyyarələri Ermənistana silahlar daşıyır. Gürcüstan özünü çox etibarlı tərəfdaş kimi apardı. Ona görə mən Gürcüstan hökumətinə təşəkkürümü bildirirəm. Deyə bilərəm ki, Gürcüstan hökumətinin simasında biz etibarlı tərəfdaş və dost görürük”.
Bu fikirləri iyul ayında törədilən erməni təxribatı zamanı və ondan sonrakı dövrdə yerli və xarici mətbuatda Rusiya və Serbiyadan Ermənistana silah göndərilməsi barədə məlumatlara münasibət bildirən Prezident İlham Əliyev Azərbaycan Televiziyasına müsahibəsində deyib.
Prezident, həmçinin, əlavə edib: “Ancaq o da həqiqətdir ki, Ermənistan və Gürcüstanda yaşayan ermənilər, eyni zamanda, gürcü familiyaları altında gizlənən etnik ermənilər hər vəchlə çalışırlar ki, Gürcüstan-Azərbaycan əlaqələrinə zərbə vursunlar. Gürcüstanda keçən il baş vermiş bəzi təxribat xarakterli hadisələrin mənbəyi də dünya erməniliyidir. Onların əsas məqsədi Gürcüstan-Azərbaycan əlaqələrini pozmaqdır. Amma buna nail olmayacaqlar. Çünki yenə də deyirəm, biz etibarlı tərəfdaşıq və bütün məsələləri açıq şəkildə müzakirə edirik. Azərbaycan hər zaman Gürcüstanın yanında olub. Mən indi bu tarixi faktları sadalamaq istəmirəm. Ancaq Azərbaycan hər zaman Gürcüstanda inkişafın, rifahın, sabitliyin tərəfdarı olubdur. Amma baxın, Ermənistan özünü necə aparır? Gürcüstanda yaşayan bəzi yerli ermənilər Ermənistan rəhbərliyinin təhriki ilə orada qızışdırıcı fəaliyyətlə məşğuldurlar. Onlar separatizmə meyl göstərirlər. Orada altdan-altdan təxribat xarakterli işlər görürlər, ideoloji iş aparırlar. Amma Ermənistan Gürcüstana qarşı səmimi münasibət göstərir? Xeyr, göstərmir. Onlar gürcü kilsələrinə əsassız iddialar edirlər. Ermənilərin yaşadıqları bölgədə tarixi abidələri erməniləşdirirlər. Orada Gürcüstanın dövlət rəmzlərinə lazımi hörmət göstərmirlər. Eyni zamanda, Ermənistan BMT və digər beynəlxalq təşkilatlarda həmişə Gürcüstanın əleyhinə səs verib. Ərazi bütövlüyü məsələlərində həmişə Gürcüstanın əleyhinə olub. Necə ola bilər? Sən bu ölkənin ərazi bütövlüyünü tanımırsan. Eyni zamanda, əminəm, gürcü xalqı unutmayıb ki, Abxaziyada gedən müharibədə erməni Baqramyan batalyonu hansı vəhşilikləri törətmişdir, kimin tərəfindən vuruşub və bu gün kimin tərəfindədir? Abxaziyada yaşayan və hakimiyyətin artıq böyük hissəsini zəbt etmiş ermənilər. Azərbaycan isə bütün dövrlərdə Gürcüstanın yanında olub. Bütün beynəlxalq təşkilatlarda Gürcüstanın ərazi bütövlüyü ilə əlaqədar birmənalı mövqe göstərib və göstərəcəkdir. Fərq bundadır. Əlbəttə, bu gün Gürcüstan xalqı hesab edirəm ki, yaxşı bilir kim onun dostudur, kim onun düşmənidir”.
“Gürcüstanda yaşayan və gürcü soyadı altında gizlənən ermənilərin müxtəlif vəzifələr tutmasına...”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, Prezident İlham Əliyevin Gürcüstanda gürcü soyadı daşıyan ermənilərin Azərbaycan və Gürcüstan arasındakı çoxəsrlik əlaqələrə qarşı təxribat törətməsi ilə bağlı açıqladığı faktlar çox mühüm məsələlərə işıq tutur. Q.Hacıyevin sözlərinə görə, indiyə qədər Gürcüstan tarixçiləri, alimləri bu barədə yazsalar da, danışsalar da, Gürcüstan rəsmiləri bu məsələləri səsləndirməyiblər.
Q.Hacıyev vurğuladı ki, Ermənistan hökumətinin son dövrlər Azərbaycana qarşı etdiyi hədələr, ərazilərimizin işğalını davam etdirməklə bağlı səsləndirdiyi yersiz fikirləri insanlarımızı narahat etməklə yanaşı, həm də bizi onlara tutarlı cavab verməyə vadar edir. “Bax, elə bu səbəbdən də cənab Prezident haqlı olaraq belə bir fikir söyləyir ki, biz Ermənistanla bağlı məsələləri izləyirik, öyrənirik, bilirik, ona görə ki, o bizim haqqımızda, müasir dövrdə olan bu gərgin problem haqqında fikir söyləyir, hərəkətlər edir, biz də onlara cavab verməliyik. Ölkə başçısının fikirlərinin mahiyyəti nədən ibarətdir? Haqlı olaraq cənab Prezident İlham Əliyev deyir: “Ermənistan bizim üçün daim təhlükə mənbəyidir”. Prezidentin bu fikri indiyə qədər Ermənistanın apardığı siyasətin mahiyyətini açıq şəkildə göstərir, Ermənistanın, ermənilərin bütün məkrinin, hiyləsinin, separatçılığının, kimliyinin əsl mahiyyətini açır. Haqlı olaraq Prezident tərəfindən qeyd edilir ki, Ermənistan terrorizmə sponsorluq edən ölkədir. Heç kim üçün şübhəli deyil ki, Ermənistan dövləti regionda separatizmin, terrorizmin yuvasıdır. Ermənistan Azərbaycan ərazilərinin 20 faizini işğal altında saxlamasına baxmayaraq, ərazilərimizin işğaldan azad edilməsi ilə bağlı beynəlxalq təşkilatların qərar və qətnamələrini yerinə yetirmək əvəzinə, bizə qarşı yeni-yeni təhdidlər irəli sürür. Ermənistan ona görə arxayın danışır ki, Prezidentimizin dediyi kimi, Rusiyadan Ermənistana silahlar daşınır. Görünür ki, Ermənistan buna arxayın olaraq və Rusiyanın buradakı münaqişələrə yenidən qoşulacağına ümid edərək, belə “cəsarətli” çıxışlar edir. Reallıq budur ki, Ermənistanın əsas niyyəti Gürcüstan və Azərbaycan arasındakı mehriban, isti qonşuluq münasibətlərini pozmaqdır, ona görə də bu cür təxribatlara əl atır. Amma, gördüyünüz kimi, Azərbaycan Prezidenti Ermənistanın bu məkrli planlarını ifşa etdi”.
Q.Hacıyev qeyd etdi ki, ölkə başçısının “mən Gürcüstan hökumətinin fəaliyyətini yüksək qiymətləndirmək istəyirəm. Bilirsiniz ki, Gürcüstan öz ərazisindən Ermənistana silahların daşınmasına imkan vermədi” fikrinin böyük əhəmiyyəti var. “Ermənistana silah daşınması üçün imkan yaratmayan Gürcüstan hökuməti ilə bağlı fikirləri də təqdirəlayiqdir. Bu, konkret olaraq, müasir dövrdə Azərbaycana qarşı yönələn dəhşətli faciənin qarşısını almaq üçün Gürcüstanın, öz növbəsində, qonşu dövlət kimi ləyaqətli qonşuluğunu yerinə yetirməsinə aid olan münasibətdir. Prezidentimiz belə qiymətləndirdi ki, Gürcüstan özünü etibarlı tərəfdaş, dost kimi apardı. Biz onların simasında dost ölkə gördük. Prezident açıq söylədi ki, bütün tarixi abidələr ermənilər tərəfindən saxtalaşdırılır, Gürcüstanda yaşayan ermənilər gürcü soyadı altında Azərbaycanla Gürcüstanın arasını vurmaq, narazılıq yaratmaq üçün təxribat xarakterli təbliğatlar aparırlar. Təxribatlarla bağlı digər faktlar haqqında cənab Prezident fikrini bildirir və haqlı olaraq deyir ki, təxribatın mənbəyi dünya erməniliyidir. Burada qaranlıq heç nə qalmır. Prezident öz çıxışında həm Ermənistanın yürütdüyü siyasəti, həm erməniliyin mahiyyətini, həm bu ölkənin region dövlətlərinə, o cümlədən də gürcülərə olan münasibətini, həm də Gürcüstan-Azərbaycan münasibətlərinə dair pozuculuq fəaliyyətini ifşa etdi. Prezident çıxışında Ermənistanın Gürcüstana qarşı həmişə düşmən mövqeyində dayandığını, beynəlxalq təşkilatlarda Gürcüstan əleyhinə səs verdiyini, eləcə də Gürcüstanın ərazi bütövlüyünün parçalanmasında ermənilərin xəyanətkarlığını ortaya qoydu. Bütün bunlar tarixi gerçəkliklərdir. Ermənistan Azərbaycanla yanaşı, Gürcüstana da açıq düşmənçilik edir”.
Q.Hacıyev qeyd etdi ki, ölkə başçısı çıxışında ermənilərin Gürcüstanda törətdiyi təxribatın heç də hamısını qeyd etmək istəmədiyini, lakin bu təxribatların sayının çox olduğunu da vurğulayıb. “Azərbaycan tarixçiləri olaraq bildirmək istəyirik ki, Gürcüstanda yaşayan və gürcü soyadı altında gizlənən ermənilərin müxtəlif vəzifələr tutmasına baxmayaraq, onlar Gürcüstan dövlətinin maraqlarına deyil, erməniçiliyə, erməni separatizminə xidmət edir. XIX əsrin əvvəllərindən İran və Türkiyə ərazisindən Cənubi Qafqaza köçürülən və əvvəldən kompakt yaşamadıqları bir regionda onlar üçün dövlət yaradılmasına imkan verilən ermənilər həm Azərbaycan-türk, həm də gürcü xalqına qarşı həmişə xəyanətkar mövqedə dayanıblar. Deyə bilərik ki, Gürcüstanın bütün xristian abidələrini (müxtəlif mənsəblərə aid olan bu abidələri) erməni-qriqoryan kilsəsi mənimsəyib və onları erməni kilsələri kimi qələmə verirlər. İmkan düşən kimi bu gün ermənilərin qrup şəklində yaşadıqları yerlərdəki həmin abidələrin quruluşunu, mahiyyətini, atributlarını dəyişərək onları qriqoryanlaşdırmağa cəhdlər edirlər. Hətta gürcü tarixçilərinin, arxeoloqlarının, yazıçılarının müxtəlif səpkilərdə olan əsərlərində bu məsələlər öz əksini tapıb. Təəssüflər olsun ki, indiyə qədər bunlar ermənilərin əleyhinə təbliğat kimi işlədilməyib. Halbuki, bu faktlar Çavçavadze, Qarbi tərəfindən yazılıb, XX əsrin əvvəllərində və digər vaxtlarda ermənilərin bu xəyanətkar əməlləri dəfələrlə işıqlandırılıb”.
Q.Hacıyev qeyd etdi ki, beynəlxalq münasibətlər tarixi üzrə Azərbaycanda çox tanınan, AMEA-nın müxbir üzvü Musa Qasımlının həm əsərlərində, həm çıxışlarında, həm də məqalələrində erməni təşkilatlarının Gürcüstanda, bütövlükdə, Cənubi Qafqaz regionunda törətdikləri təxribatlar haqqında çox dəyərli, diqqətçəkən faktlar var. “Musa müəllimin əsərlərində, məqalələrində bütün bu faktlar əks olunub. Bu gün Azərbaycan Prezidentinin belə bir istiqamətdə düşüncələri ilə eynilik təşkil edən, üst-üstə düşən və mahiyyətcə düzgün siyasət baxımından qiymətli olan bu fikirlərin həm Azərbaycan ictimaiyyəti, həm də dünya ictimaiyyəti üçün böyük maraq kəsb etməsinə şübhəmiz yoxdur” - deyə Q.Hacıyev qeyd etdi.
İradə SARIYEVA
