Prezident İlham Əliyevin sentyabrın 19-da “Abşeron” yatağının dəniz əməliyyatlarının təməlqoyma mərasimində mətbuata verdiyi müsahibədə səsləndirdiyi mühüm bəyanatlar, nəinki yerli, hətta dünya KİV-ində geniş rezonans doğurub.
Həmin müsahibədə Prezident qeyd edib ki, Ermənistan cəbhədə vəziyyəti qəsdən gərginləşdirir, müharibəyə hazırlaşır, yeni işğal planları qurur. Proseslərin təhlili göstərir ki, Ermənistan doğrudan da cəbhədə ardıcıl təxribatlar törədir, böyük müharibəyə hazırlaşır. Son illər ərzində Ermənistan dəfələrlə belə təxribatlara əl atıb və hər dəfə də layiqli cavabını alıb. Bura “Lələtəpə”, “Günnüt” kimi Azərbaycanın uğurlu əməliyyatlarını aid edə bilərik. Ordumuzun Aprel zəfəri Ermənistanın köhnə hakimiyyəti dönəmində baş versə də, Naxçıvan istiqamətində Günnüt əməliyyatı Paşinyanın yenicə hakimiyyətə gəldiyi zamana təsadüf etdi. Həmin əməliyyat nəticəsində Azərbaycan Ordusu qətiyyətli qələbə çalaraq, çox böyük ərazilərə nəzarəti ələ keçirdi. Görünür, həmin əməliyyatı N.Paşinyan hələ də həzm edə bilmir və revanş əldə etmək planları qurur. Ermənistan Nikol Paşinyanın rəhbərliyi altında son zamanlar belə təxribatlara tez-tez əl atır və hər dəfə də layiqli cavabını alır. Gəlin, son bir neçə ay ərzində Ermənistanın törətdiyi təxribatlara xronoloji olaraq nəzər salaq. Ermənistan bu il iyulun 12-16-da Azərbaycan-Ermənistan dövlət sərhədinin Tovuz rayonu istiqamətində təxribat törədib, lakin layiqli cavabını alıb.
- Ermənistan müharibə hazırlıqlarında
Avqustun 23-də saat 06 radələrində cəbhənin Goranboy rayonu istiqamətində Ermənistan silahlı qüvvələrinin diversiya-kəşfiyyat qrupunun komandiri, baş leytenant, 1989-cu il təvəllüdlü Qurgen Alaverdyan Azərbaycan ordusu tərəfindən həyata keçirilmiş tədbirlər nəticəsində müəyyən edilərək saxlanıb. Bunun ardınca Ermənistanın və qondarma qurumun rəhbərləri Azərbaycan Respublikasının iri yaşayış məntəqələrinin və Mingəçevir SES kimi strateji əhəmiyyətli mülki obyektlərinin “hərbi hədəf” kimi nəzərdən keçirildiyinə dair bəyanatlar verdi. Ardınca, Ermənistan tərəfi Azərbaycanın işğal edilmiş ərazilərində yaratdığı qanunsuz rejimin qondarma “başçısı” vasitəsilə Azərbaycan Respublikasının Gəncə şəhərinə hərbi zərbə endirməklə təhdid etdi. Sentyabrın 20-də saat 23.13-də Ermənistan silahlı qüvvələrinin bölmələrinə məxsus taktiki pilotsuz uçuş aparatı (PUA) Hava Hücumundan Müdafiə bölmələrimiz tərəfindən məhv edilib. Sentyabrın 21-də saat 09:20 radələrində Ermənistan-Azərbaycan dövlət sərhədinin Tovuz rayonu istiqamətində düşmənin növbəti təxribatı nəticəsində isə Azərbaycan Ordusunun müddətdən artıq həqiqi hərbi xidmət qulluqçusu, kiçik çavuş Məmmədov Elşən Əli oğlu şəhid olub. Bütün bu faktlar göstərir ki, Ermənistan sülh danışıqlarına sadiqlik göstərmir və hədəfi bir daha müharibəyə başlayıb yeni ərazilər işğal etməkdir. Azərbaycanın bütün bu planlardan dəqiq məlumatı var.
- Fəaliyyətləri ermənilərlə sinxronluq təşkil edən yutuberlər...
Qeyd edək ki, Ermənistan bizimlə həm də informasiya cəbhəsində açıq savaş aparır. Bu istiqamətdə onların yararlandığı vacib silahlardan biri də erməni diasporu və onun dəstəyidir. Təəssüflə qeyd etməliyik ki, bu sarıdan bizim diasporumuzun fəaliyyətində müəyyən çatışmazlıqlar var. Heç də o anlama gəlməsin ki, bizim diasporumuzun bütün üzvləri erməni yalanları qarşısında baş əyir. Bu istiqamətdə xüsusi fəallıq göstərən soydaşlarımız da az deyil. Ancaq diasporumuzun içində olan bəzi naxələflər onlara ciddi mane olmağa çalışır. Söhbət xarici ölkələrdə oturub, Azərbaycandakı proseslərə soyuş vasitəsilə verilişlər hazırlayan yutuberlərdən gedir. Danılmaz faktdır ki, son illər ərzində xarici ölkələrdə xeyli müxalifyönlü soydaşımız məskunlaşıb. Onların bəziləri təmsil olunduqları ölkələrdə də Azərbaycan diasporunun gücünü parçalayır, uzaq diyarlarda belə iqtidar-müxalifət söhbəti aparırlar. Biz bunun ən bariz nümünəsini ermənilərin Tovuz təxribatı zamanı gördük. Həmin vaxt ermənilər bütün dünyada soydaşlarımızın üzərinə açıq hücuma keçdilər. Hətta onlara fiziki xəsarətlər yetirənlər də oldu. Məhz bizim dediyimiz yutuberlərin hazırladığı verilişlərdə soydaşlarımıza, nəinki dəstək ifadə olundu, əksinə, onların belə vəziyyətə düşməsində bütün günahı Azərbaycan hakimiyyətinin üzərinə yıxmağa çalışdılar. Bir sözlə, həmin günlərdə bizim söyüşçül yutuberlərin fəaliyyəti erməni təbliğatı ilə tam sinxronluq təşkil etdi.
- Mehriban Əliyevanın çağırışından beynəlxalq təşkilatlar, dünya birliyi də lazımi dərs götürmüş oldu
Ötən yazılarımızda xaricdəki mühacir azərbaycanlıların təsnifatlandırılmasını aparmışdıq. Bəlli olur ki, diasporumuza aid olan həmin kateqoriya heç də yekcins deyil. Onların arasında mövcud Azərbaycan hakimiyyətinə qarşı radikal mövqedə olan insanlar da az deyil. Ən maraqlısı isə budur ki, həmin adamlar artıq fəaliyyətlərini hakimiyyətlə deyil, bütöv dövlətlə mübarizə üzərində qururlar. Əksər hallarda isə bu fəaliyyət dövlətin dayaqlarının linc edilməsinə cəhdlə müşahidə olunur. Buna baxmayaraq, ötən aylar ərzində müxtəlif xarici ölkələrdə, o cümlədən Avropa ölkələrində və ABŞ-da uzun illərdən bəri formalaşan erməni diasporu Azərbaycan diasporunun ortaya qoyduğu birlik, həmrəylik və cəsarət nümunələri qarşısında aciz duruma düşdü. Erməni diasporunun qəfil aldığı bu zərbə onu dərindən sarsıtdı. Hətta vəziyyət elə bir şəkil aldı ki, Nikol Paşinyan Ermənistanın diasporla iş üzrə komissarının ofisində təmizləmə əməliyyatı apardı. Təmizləmə əməliyyatı zamanı, rəhbər vəzifəli şəxslər də daxil olmaqla, 13 nəfəri işdən kənarlaşdırması erməni diasporunun fəaliyyətində ciddi problemlər yarandığını aydın şəkildə ortaya qoyur. Qeyd edək ki, Azərbaycan diasporuna qarşı erməni lobbisinin təşkil etdiyi təxribatlar ölkəmizdə də ciddi narazılıqla qarşılandı və ən yüksək formada soydaşlarımıza dəstək göstərildi. Bildiyimiz kimi, hadisələrdən dərhal sonra, iyulun 24-də ölkəmizin Birinci vitse-prezidenti Mehriban Əliyeva Amerikanın Los Anceles şəhərində və bəzi Avropa ölkələrinin paytaxtlarında yaxın günlərdə baş vermiş hadisələrlə bağlı həmvətənlərimizə müraciət etdi. Mehriban xanımın bu müraciəti də xaricdəki Azərbaycan diasporunun daha da aktivləşməsinə, güclənməsinə təkan oldu. Heç şübhəsiz, Mehriban Əliyevanın bu çağırışından beynəlxalq təşkilatlar, dünya birliyi də lazımi dərs götürmüş oldu.
- “Bütün bu problemlərin hələ də mövcud olması Azərbaycan diasporunun formalaşma mərhələsindən inkişaf mərhələsinə keçməsində müəyyən çətinliklər yaradır”
Çox təəssüflə qeyd etməliyik ki, Ermənilərin böyük müharibəyə hazırlaşdığı indiki məqamda da “sapı özümüzdən olan baltalar “ ənənəvi təbliğatlarına başlayıblar. Onlar verilişlərində və apardıqları təbliğatda, bir kəlmə də olsun, Ermənistanın təxribatlarından danışmırlar. Bu azmış kimi, hətta bu istiqamətdə fəallıq edən diaspor fəallarımızı linc edirlər. Öz aləmlərində onları “satqın” sayırlar. Onlarla mübarizənin ünvanı kimi erməniləri deyil, Azərbaycan hakimiyyətini göstərirlər. Belə dönüklərin apardığı təbliğatı necə dəyərləndirmək olar?
Milli İstiqlal Partiyasının xarici məsələlər üzrə sədr müavini Elşən Mustafayev “Bakı-Xəbər”ə açıqlamasında bildirdi ki, bütövlükdə bu məsələlərlə bağlı belə bir ümumi nəticəyə gəlmək olar: “Azərbaycan diasporunu düşündürən və narahat edən problemlər ümumi ideologiyanın zəifliyi, milli birliyin və həmrəyliyin zəif olması, Azərbaycan diasporu nümayəndələri arasında qarşılıqlı münasibətlərin, ünsiyyət və əlaqələrin qaneedici olmaması, xarici ölkələrdəki səfirliklərimizin heç birində həmin ölkələrdəki diasporlarımızla məşğul olan xüsusi bir nümayəndəliyin açılmaması, Vətənə bağlılıq hissinin zəifliyi, ümumi məqsəd naminə bir araya gələ bilməmək, şəxsi iddia və mənəmliyin milli-mənəvi prinsiplərdən üstün tutulmasıdır. Xaricdə soydaşlarımızın daha çox iqtisadi maraqlarla əməkdaşlığa meylli olmaları, xaricdə yaşayan azərbaycanlıların müxtəlif qüvvələr ətrafında birləşmələri diasporumuzun fəaliyyətində pərakəndəlik yaradır. Bütün bu problemlərin hələ də mövcud olması Azərbaycan diasporunun formalaşma mərhələsindən inkişaf mərhələsinə keçməsində müəyyən çətinliklər yaradır. Ölkə mətbuatında çıxış edən hər bir rəsmi dövlət xadimi, mütəxəssis, tədqiqatçı milli diasporumuzun kifayət qədər güclü potensiala malik ictimai-siyasi təsir qüvvəsi olduğunu önə çəksə də, problemlərdən çox az danışılır.
- “Ötən əsrin əvvəllərində xaricə sığınmış mühacirlərimizin həyat və yaradıcılığından örnək götürsünlər”
Bu problemlərdən qurtuluş yollarını aramaq üçünsə çox uzağa getmək lazım deyil. Diaspor problemlərini yetərincə işıqlandıran milli mətbuatımız həmin problemlərdən çıxış yollarını da göstərir. Dünya azərbaycanlılarının hər hansı bir ölkədə və mühitdə yaşamaq, inkişaf etmək, beynəlxalq aləmdə mədəni, istedadlı, qədim tarixə və demokratik dövlətə malik olan xalq kimi təmsil olunmaq kimi məsuliyyəti var. Bütün bu qeyd olunan vacib məsələlər Azərbaycan diasporu probemlərinin həlli istiqamətində dövlətimizin, eləcə də xaricdə yaşayan soydaşlarımızın üzərinə qoyulan, bilavasitə onlara aid olunan tələblərdir. Milli diasporumuzun qarşısına çıxan problemlərin aradan qaldırılması istiqamətində ciddi işlər görülməlidir. Ermənilərlə informasiya savaşında bəzi diaspor nümayəndələrimizin tutduğu mövqe bizi qane edə bilməz. Bu məsələdə hamı zərbəni bir nöqtəyə vurmalıdır. Belə taleyüklü məsələlərdə iqtidar və müxalifət anlaşyışı olmur. Yaxşı olar ki, özlərinə mühacir adı qoyan bu adamlar ötən əsrin əvvələrində xaricə sığınmış mühacirlərimizin həyat və yaradıcılığından örnək götürsünlər. Düşmənlə mübarizədə kimsə soydaşlarımızı başqa istiqamətə yönəldirsə, bunun bir adı ola bilər - naqislik. Hesab edirəm ki, bu istiqamətdə fəaliyyət göstərən qurumlar diasporumuzun maarifləndirilməsi istiqamətində önəmli layihələr həyata keçirməlidir”.
Bunun üçün Azərbaycan diasporunun vahid mövqe sərgiləməsi, həlledici məqamda bütün siyasi intriqaları kənara atıb, öz dövlətinin, vətəninin, ordusunun müdafiəsinə qalxması gərəkdir. Nəzərə almalıyıq ki, bizim keyfiyyətli diaspor siyasətimiz olmasa, əsrlərlə təşkilatlanma təcrübəsi olan rəqibimiz erməni diasporuna asanlıqla məğlub ola bilərik. Son hadisələr bizim diasporumuzun fədakarlığını üzə çıxardı. Eyni zamanda, problemlərin olduğunu da gördük. Təəssüflər olsun ki, diasporumuzda fikir ayrılığı yaradan fərdlər hələ də mövcuddur.
Məhəmmədəli QƏRİBLİ
Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyilə çap olunur.
