27/10/2020 21:15
728 x 90

Qarabağda çoxdan gözlənilən savaş başlanır... Prezident Əliyev BMT Baş Assambleyasının 75-ci sessiyasında hansı mesajları verdi

img

“Təcavüzkar ritorika və təxribatlar Ermənistanın Azərbaycana qarşı yeni təcavüzə hazırlaşdığını nümayiş etdirir. Biz BMT-ni və beynəlxalq ictimaiyyəti Ermənistanın növbəti hərbi təcavüzdən çəkindirilməsinə dəvət edirik”.  

Bu sözləri Prezident İlham Əliyev BMT Baş Assambleyasının 75-ci sessiyası çərçivəsində BMT-nin 75 illiyinə həsr edilmiş Yüksək Səviyyəli İclasında videoformatda çıxışında bildirib.
Dövlət başçısı qeyd edib ki, təxribatların baş verməsinə və gərginliyin artırılmasına görə məsuliyyət Ermənistanın hərbi-siyasi rəhbərliyinin üzərinə düşür. O vurğulayıb ki, Ermənistan-Azərbaycan münaqişəsi Azərbaycanın ərazi bütövlüyü çərçivəsində və BMT Təhlükəsizlik Şurasının qətnamələri əsasında həll edilməlidir. Amma görünən budur ki, Ermənistan münaqişəni beynəlxalq hüquq müstəvisində həll etmək niyyətində deyil.  

Əksinə, Ermənistan daxilində baş verənlər İrəvanın bundan sonra da cəbhədə təxribatlarını daha da intensivləşdirəcəyini deməyə əsas verir. Cəbhədə vəziyyətin yenidən kəskin gərginləşməsi ilə bağlı vəziyyəti şərh edən rusiyalı hərbi ekspert İqor Korotçenko hesab edir ki, bununla Nikol Paşinyan ölkəni səmərəsiz idarə etmələrindən doğan problemlərdən diqqəti yayındırmağa çalışır: “Hazırda Paşinyan çox ağır daxili vəziyyətə düşüb, ona qarşı müxalifət partiyalarının vahid bloku yaranır. Ona qarşı hakimiyyəti qəsb etmək, ölkə idarəçiliyində səriştəsizlik, koronavirusla mübarizəni yarıtmaz aparmaq kimi ittihamlar səsləndirilir. Belə bir vəziyyətdə Paşinyana ictimaiyyətin diqqətini öz problemlərindən yayındırıb xarici düşmənə yönəltmək lazımdır və fikrimcə, baş verənlərin başlıca səbəbi elə budur”.

Digər ekspertlər də hesab edir ki, Prezident İlham Əliyevin yerli telekanallara son müsahibəsində münaqişəyə dair verdiyi mesajlar Azərbaycanın Dağlıq Qarabağda antiterror əməliyyatına başlaya biləcəyi ehtimalını gücləndirir. Ermənistan Qarabağda təxribatçı hücumlarla Azərbaycanı qabaqlamaq istəyir. Amma Qarabağda mümkün müharibədə beynəlxalq hüquqa əsasən Azərbaycan haqlıdır və verilən mesajlar, atılan addımlar münaqişənin həllində hərbi variantın ön plana çıxdığını göstərir. Baş verənlər müharibənin astanasında olduğumuza dəlalət edir. Elə hərbçi ekspert Üzeyir Cəfərov da məsələyə məhz bu prizmadan yanaşır: “Ermənistan Azərbaycana ikinci yol saxlamayıb. Dövlətimiz yəqin ki, lazım olan addımı atacaq. Düşmənin son təxribatları isə onu deməyə əsas verir ki, müharibə qaçılmazdır və buna görə də Xarici İşlər Nazirliyi məlumat yaydı ki, bütün məsuliyyət Ermənistan hərbi-siyasi rəhbərliyinin üzərinə düşür”. Onun sözlərinə görə, müharibə həqiqətən qaçılmazdır və yalnız güc hesabına düşməni ram edib, yerində oturda bilərik: “Müharibə olmalıdır. Çünki hazırda vəziyyət bu istiqamətə doğru gedir. Son vaxtlar Ermənistan həddindən artıq həyasızlaşıb və təxribatlara ara vermir. Goranboy istiqamətində təxribat nəticəsində bir erməni zabiti əsir götürüldü. İndi də qərb istiqamətində - Şəmkirdə Ermənistana məxsus pilotsuz uçuş aparatının (PUA) mövqelərimizə daxil olması, onun sonradan məhv edilməsi, o cümlədən bu gün səhər saatlarında Tovuz istiqamətində hərbi qulluqçumuzun düşmən təxribatı nəticəsində şəhid olması onu deməyə əsas verir ki, Azərbaycan Müdafiə Nazirliyi lazım olan addımı atacaq və atır. Düşmənə layiq olduğu cavab isə verilib”.

Ü.Cəfərov bildirib ki, hazırkı vəziyyətin real döyüş əməliyyatlarına keçib-keçməyəcəyini əvvəlcədən demək olmur: “Biz sadəcə, olacaqları təxmin edə bilərik. Silahlı Qüvvələrin Ali Baş Komandanı İlham Əliyev milli televiziyalarımıza verdiyi müsahibəsində də bu fikrə toxundu ki, Ermənistan faktiki olaraq öz hərəkətləri ilə danışıqlar prosesindən çıxıb. Danışıqlar dayandırılıb və ikinci yol güc amilidir. Azərbaycan da bunu mütləq şəkildə tətbiq edəcək. Bunun nə zaman olacağını dəqiqliklə deyə bilmərik. Amma vəziyyət o istiqamətə gedir ki, ölkəmiz məcburiyyət qarşısında qalıb bu addımı atmalıdır və atacaq. Ermənistan və havadarları Azərbaycana qarşı çox məkrli plan hazırlayıblar. Ermənistan layiq olduğu cəzanı yaxın günlərdə almalıdır. Çünki bu qədər səbr, dözüm nümayiş etdirmişik. Ölkə başçısı da jurnalistlərə müsahibəsində bildirdi ki, beynəlxalq qurumlar vəziyyətin gərginləşməsində bir qədər maraqlı görünürlər. Ermənistan hakimiyyəti Suriyadan, Livandan və digər yerlərdən erməniləri gətirərək Qarabağda qeyri-qanuni məskunlaşdırma həyata keçirir. Ancaq beynəlxalq təşkilatlar buna heç bir halda reaksiya göstərmirlər. Onlar vəziyyət gərginləşəndən sonra peyda olacaqlar. Amma müharibə qaçılmazdır”. 

İndilikdə görünən budur ki, istər Dağlıq Qarabağın təmas xəttində, istər dövlət sərhədində düşmən vəziyyəti gərginləşdirməyə çalışır. Bu isə onu deməyə əsas verir ki, Azərbaycan üçün hərbi əməliyyatlardan başqa bir yol yoxdur. Bunu şərtləndirən həm də odur ki, Minsk Qrupu götürdüyü öhdəliyi yerinə yetirə bilmir. Belə vəziyyətdə Qarabağ məsələsinin sülh yolu ilə həll edilməsi şansı yox səviyyəsindədir. Xüsusən də düşmən təxribatlarının artması nəticəsində Azərbaycan hərb variantına əl atmağa məcburdur və bunun məsuliyyəti Ermənistanın üzərinə düşür.

Nahid SALAYEV

Son xəbərlər