30/10/2020 00:04
728 x 90

Azərbaycan Prezidentinin gördüklərini beynəlxalq vasitəçilər görmür? - Ermənistan qoşun toplayır...

Afsəddin Nəbiyev: “Həmsədrlərin səsi ona görə çıxmır ki...”

img

Məlum olduğu kimi, Prezident İlham Əliyev Heydər Əliyev adına Bakı Dərin özüllər zavodunda “Abşeron” yatağının dəniz əməliyyatlarının təməlqoyma mərasimində iştirak edib. Dövlət başçısı mərasimdən sonra yerli telekanallara müsahibə verərək bir sıra məqamlara toxunub.

Prezident deyib ki, ermənilər öz çirkin planlarından əl çəkməsələr, onlar üçün çox ağır nəticələr olacaq: “Ermənistan aqressiv dövlətdir. Onların Azərbaycana, azərbaycanlılara qarşı nifrəti çirkin siyasətlərində də özünü göstərir. Bir daha demək istəyirəm və onlara xəbərdarlıq etmək istəyirəm ki, əgər öz çirkin planlarından əl çəkməsələr, onlar üçün çox ağır nəticələr olacaq. Onlar yeni müharibəyə hazırlaşırlar. Təmas xəttinə yaxın onların qüvvələrinin konsentrasiyası baş verir. Biz hər şeyi görürük, hər şeyi izləyirik. Onların bütün hərəkətlərini izləyirik. Əlbəttə ki, özümüzü müdafiə edəcəyik. Necə ki, Tovuzda özümüzü müdafiə etdik, bütün başqa istiqamətlərdə də özümüzü müdafiə edəcəyik. Onlar üçün Tovuz hadisələri növbəti dərs oldu. Əgər yeni dərs almaq istəyirlərsə, biz buna hazırıq”.

Göründüyü kimi, Ermənistan Tovuz döyüşlərindən sonra aqressiv davranışlarından əl çəkmək istəmir. İşğal olunmuş ərazilərdə hərbi qüvvələrini artırır, atəşkəsi pozmaqla yanaşı, cəbhə bölgəsində müxtəlif diversiya xarakterli təxribatlara cəhd edir. Bütün bunlar da, təbii ki, gərginliyi artırır.

Maraqlıdır, bütün bunlara görə beynəlxalq vasitəçilərin səsi niyə çıxmır? Vasitəçilik missiyasını üzərinə götürən ATƏT-in Minsk Qrupu həmsədrləri niyə bunları görməzdən gəlirlər? Niyə Paşinyandan soruşmurlar ki, sən nə edirsən?

  • “Ermənistanda iqtisadi vəziyyətin ağırlığı ölkə rəhbərliyini yeni hərbi avantüraya meylləndirir”

Sözügedən məsələyə dair fikirlərini “Bakı-Xəbər”lə bölüşən AMİP sədrinin müavini Afsəddin Nəbiyev bununla bağlı bir sıra məsələlərə aydınlıq gətirdi: “Son zamanlar Ermənistanda iqtisadi vəziyyətin ağırlığı ölkə rəhbərliyini yeni hərbi avantüraya meylləndirir. Bu addımlar gözlənilən idi. Ermənistan hakimiyyəti yaxşı başa düşür ki, ölkənin düşdüyü bu ağır durumu yalnız hərbi ritorika ilə əvəzləyə bilər. Müharibə ritorikası Ermənistan hökumətinin əlində yeganə kartıdır. Ermənistanda hərbi səfərbərlik tədbirləri, Livandan, Suriyadan ermənilərin Qarabağda yeləşdirilməsi prosesi onu deməyə əsas verir ki, Paşinyan Azərbaycana qarşı yeni təxribatlar düzənləməkdədir. Biz Baş nazir Paşinyanın Qarabağa tez-tez səfər edərək, “xəstə erməni vətənpərvərlik damarını basaraq”, özünə siyasi dividend qazandığını açıq şəkildə görürük. Beynəlxalq təşkilatlar, hər zaman olduğu kimi, ikili standartlar sərgiləyərək, ciddi bir mövqe ortaya qoymurlar. Həmsədrlərin səsi ona görə çıxmır ki, onlar münaqişənin ədalətli həllində maraqlı deyillər. Yoxsa, işğalçı Ermənistan bu dərəcədə həyasızlıq etməzdi. Prezident İlham Əliyev Ermənistan hakimiyyətinə və xalqına açıq mesajlarını çox aydın şəkildə çatdırdı. Həqiqətən ermənilər və onların havadarları bölgədə gedən prosesləri diqqətlə nəzərdən keçirib, işğal etdikləri Azərbaycan torpaqlarını qeyd-şərtsiz olaraq azad etməsələr, Ermənistanın bir dövlət kimi mövcudluğu sual altında qalacaq. Ermənistan hakimiyyəti və xalqı mövcud durumu dəqiqliklə qiymətləndirib, bölgədə sülhün yaranmasına cəhd edəcəklərsə, bu onlar üçün böyük avantaj ola bilər.

Milli İstiqlal Partiyası Qarabağla, işğalda olan digər ərazilərimizlə bağlı dövlətimizin apardığı siyasəti hər zaman dəstəkləyir və bundan sonra da dövlətimizin, millətimizin yanında olacaq”.

Partiyanın sədr müavini onu da qeyd etdi ki, bütün hallarda, vasitəçilərin işğalçı tərəfə bundan sonra hər hansı təzyiq göstərəcəyi real görünmür.

Vidadi ORDAHALLI

Son xəbərlər