Prezident İlham Əliyev yerli televiziya kanallarına verdiyi müsahibədə ölkənin bir nömrəli problemi olan Dağlıq Qarabağ münaqişəsinə dair həm ictimaiyyətə, həm beynəlxalq aləmə, eyni zamanda təbii ki, düşmən ölkəyə ünvanlanmış dəqiq və aydın mesajlar verdi.
Prezident bildirdi ki, Ermənistanla danışıqlar praktiki olaraq dayanıb, heç bir danışıqlar getmir, heç bir nizamlama planı müzakirə olunmur və bütün bunların tək günahkarı var: “Yerevanda erməni xalqının məhz Qarabağdan, münaqişənin həll edilməməsindən qaynaqlanan problemlərindən istifadə edərək hakimiyyətə gələn avantürist Nikol Paşinyan!”
Azərbaycan Prezidenti bəyan edir ki, Bakı imitasiya xarakterli heç bir danışıqlara qoşulmayacaq. Çünki Ermənistan rəhbərliyi danışıqları pozub, sülh prosesi dayanıb və bunun bütün məsuliyyəti, danışıqların pozulmasının nəticəsi olaraq baş verə biləcək bütün hadisələrin günahı Yerevanın üzərindədir. Çünki bu müddət ərzində Azərbaycan tərəfi mümkün qədər konstruktiv davranıb, danışıqlar prosesini pozacaq heç bir addım atmayıb. İlham Əliyev isə bəyan edir ki, Ermənistan yenə hərbi avantüraya əl atmaq istəyirsə, Azərbaycan buna hazırdır - düşmən öz çirkin planlarından əl çəkməsə nəticələri onun üçün çox ağır olacaq!
Prezident bu çıxışı ilə dünya birliyinə, Minsk Qrupu həmsədrlərinə hansı mesajları verdi? Belə nəticəyə gəlmək olarmı ki, Azərbaycan problemin sülh yolu ilə həllinə artıq inanmır və müharibənin qaçılmaz olduğunu hesab edir?
Politoloq Yeganə Hacıyeva “Bakı-Xəbər”ə açıqlamasında bildirdi ki, Prezident son müsahibəsində Ermənistanla danışıqların praktiki olaraq dayandığını, heç bir danışıqların getmədiyini bildirdi: “Azərbaycan Prezidenti İlham Əliyev yerli televiziya kanallarına verdiyi müsahibəsində Azərbaycan dövləti və cəmiyyətinin problemlərindən danışdı. Prezident ümumi maraqlar çərçivəsində olan problemlərin ətrafında çoxsaylı mesajlar verdi. Mesajları cəmiyyətin dövlətdən və şəxsən Prezidentdən gözləntilərinə cavab kimi qəbul etməliyik. Ən böyük narahatlıq, əlbəttə, ölkənin əsas problemi olan Dağlıq Qarabağ münaqişəsi və bu münaqişə ətrafında ölkədə və regionda baş verən proseslərlə bağlıdır.
Məsələ ondadır ki, iyul ayında bu ölkənin yüksək hərbi eşelona məxsus zabitlərin ölümü ilə nəticələnən hərbi təxribatından sonra biz uzun illər nəticəsiz danışıqlarla bağlı əhalinin necə hiddətli olduğunu və bunu ifadə etdiyini beynəlxalq instansiyalara çatdırmış olduq. İyulun 14-dən sonra xalqın küçələrə çıxaraq Azərbaycan ordusu və Ali Baş Komandana dəstəyini ifadə etməsini nəticəsiz danışıqlardan yorulma haqqında mesaj kimi də qəbul edə bilərik. Bütün bunları şərtləndirən digər məqamlar da var. Məsələ ondadır ki, Ermənistanın əvvəlki rəhbərliyi proseslərdə var gücü ilə işğal faktının möhkəmlənməsi ilə status-kvonun davam etdirilməsinə çalışırdı. Paşınyanla küçədən gələn erməni diplomatiyası isə beynəlxalq hüququn pozulması ilə paralel regionun enerji, demoqrafik və ekoloji təhlükəsizliyinin pozulması istiqamətində sistemli iş aparmaqdadır. Bura işğal olunmuş ərazilərimizə etnik ermənilərin qanunsuz məskunlaşdırılmasını, işğal olunmuş ərazilərdə “xalq ordusu” adı altında Suriyadan etnik erməni terror qruplarının yerləşdirilməsini, baş nazirin arvadının hərbi təlim keçməsini, qanunsuz silah daşımaları və bu kimi regionun uzun illərdir mövcud olan düzəninin pozulması siyasətini aid edə bilərik.
Ancaq Azərbaycan Prezidentinin Dağlıq Qarabağ konflikti ilə bağlı mesajlarını tək daxili auditoriyaya şamil edə bilmərik. Məsələ ondadır ki, çıxışı zamanı Prezident sistemli şəkildə beynəlxalq huququn ədalətə xidmət etməkdə yararsızlığı, beynəlxalq nizamlayıcı instansiyaların, ATƏT-in Minsk Qrupunun danışıqlar prosesinin imitasiya xarakteri daşımasını, ATƏT-in Minsk Qrupu üzvlərindən birinin prosesdə iştirakçı tərəf kimi görsəndiyini, Azərbaycan xalqının isə bütün bunların fərqində olduğunu xatırlatdı.
Bu çıxış, həmçinin bir xatırltma idi ki, beynəlxalq instansiyalar qlobal enerji təhlükəsizliyinin təmin olunmasında önəmli rol oynayan bu qədər strateji bir regionda təhlükəsizliyi nümayişkaranə pozan Ermənistana qarşı konkret mövqe tutmur. İrəvanın fəaliyyəti təkcə Azərbaycana təhdid deyil. Bu sahədə Avropa Birliyi və ABŞ rəsmilərinin Azərbaycan höküməti ilə görüşlərdə etdiyi etiraflar açıq şəkildə ifadə olunmalı və ümumi maraqlar üçün hədə olan aqressor cəzalandırılmalıdır.
Uzun illər Azərbaycanın sülh danışıqlarına sədaqəti də məhz bu beynəlxalq instansiyaların qapalı görüşlərdəki etiraflarına inam idi. Bunun məntiqi davamı kimi beynəlxalq hüququn təmin olunmasında real sanksiyaların həyata keçiriləcəyinə əminliyimiz var idi. Bunun əvəzində isə Ermənistan tərəfi regiona kənar terror ünsürlər qoşmaqla 3 -cü bir tərəf formalaşdırmağa çalışır. Bu isə, Azərbaycanın təhlükəsizliyindən başqa, həm də qlobal səviyyədə təhlükəsiliyə hədədir, növbəti bir qaynar ocaq yaratmaq təşəbbüsüdür. Bir daha bu nəticəyə gəlirik ki, Ermənistan bizim üçün sülh danışıqları ilə bağlı heç bir ümid yeri saxlamayıb”.
Azərbaycan Ermənistanın təxribatlarını yaxşı anlayır və dərk edir. Yaxın zamanlarda işğalçıya layiqli cavabın veriləcəyinə əminik.
Məhəmmədəli QƏRİBLİ
